ទូតចិនទាត់ចោលការចោទប្រកាន់របស់អាមេរិក ដែលថា ក្រុមHackerចិនបានលួចទិន្នន័យពីក្រសួងការបរទេសកម្ពុជា
អ្នកនាំពាក្យស្ថានទូតចិនប្រចាំនៅកម្ពុជា កាលពីយប់ថ្ងៃព្រហស្បតិ៍បានចេញមកទាត់ចោលចំពោះកាចោទប្រកាន់របស់អាមេរិក ដែលបានអះអាងថា ក្រុមHackerចិនបានចូលលួចទិន្នន័យទន្លេមេគង្គពីក្រសួងការបរទេសកម្ពុជា។ ការចោទប្រកាន់របស់អាមេរិកនេះ ត្រូវបានចុះផ្សាយដោយសារព័ត៌មានReuters កាលពីថ្ងៃទី២២ ខែកក្កដា។ អ្នកនាំពាក្យស្ថានទូតចិន បានចាត់ទុកការផ្សព្វផ្សាយព័ត៌មាននេះថាមិនពិត មិនសមហេតុផល និងជាការនិយាយបំផ្លើសបំភ្លៃ ដែលបង្កើតឡើងដោយអាមេរិក។
ចុះផ្សាយនៅថ្ងៃ៖
ស្តាប់ - ០២:១៦
ស្ថានទូតចិនប្រចាំកម្ពុជា តាមរយៈអ្នកនាំពាក្យ បានចេញមកសម្តែងការព្រួយបារម្ភយ៉ាងខ្លាំង និងប្រកាសប្រឆាំងដាច់ខាតចំពោះការលើកឡើងរបស់ក្រសួងយុត្តិធម៌អាមេរិកតាមរយៈសារព័ត៌មានអង់គ្លេសReutersថា ក្រុមHackerចិន បានចូលលួចទិន្នន័យទន្លេមេគង្គពីក្រសួងការបរទេសកម្ពុជា។
សារព័ត៌មានReuters នៅថ្ងៃទី២២ ខែកក្កដា បានសរសេរផ្សាយថា កម្ពុជា គឺជាប្រទេសគោលដៅមួយក្នុងចំណោមគោលដៅផ្សេងៗនៃការចូលលួចទិន្នន័យរបស់ក្រុមHackerចិន ។ Reuters សរសេរថា ក្រុមHackerចិន បានចូលលួចទិន្នន័យនៅក្រសួងការបរទេសកម្ពុជាដែលត្រូវបានបង្ហាញឱ្យដឹងថា ជាទិន្នន័យនៃពិភាក្សាគ្នារវាងចិន និងកម្ពុជាជុំវិញការប្រើប្រាស់ទន្លេមេគង្គកាលពីខែមករា ឆ្នាំ២០១៨។
សារព័ត៌មានReuters ក៏បានចុះផ្សាយឱ្យដឹងដោយដកស្រង់ពីក្រសួងយុត្តិធម៌អាមេរិកថា ជនជាតិចិន៤នាក់ ក្នុងនោះ៣នាក់ ជាមន្រ្តីសន្តិសុខ និងម្នាក់ជាHackerជាប់កិច្ចសន្យាត្រូវបានចោទប្រកាន់នៅអាមេរិកពីបទប៉ុនប៉ងវាយប្រហារទៅលើក្រុមហ៊ុន សាកលវិទ្យាល័យ និងភ្នាក់រដ្ឋាភិបាលនៅក្នុងសហរដ្ឋអាមេរិក និងនៅក្រៅប្រទេស។ បើតាមReuters ក្រុមHackerចិនទាំងនេះជាប់ពាក់ព័ន្ធនឹងក្រុមហ៊ុនឈានមុនមួយ ដែលគ្រប់គ្រងដោយសន្តិសុខរដ្ឋរបស់ចិននៅខេត្តហៃណាន ដែលជាខេត្តដីកោះចិនមួយនៅក្បែរអាស៊ីអាគ្នេយ៍។
ប៉ុន្តែ ស្ថានទូតចិនប្រចាំនៅកម្ពុជាបានឆ្លើយតបវិញថា ការផ្សព្វផ្សាយរបស់Reutersនេះ គឺឈរទាំងស្រុងលើការប្រឌិតរបស់សហរដ្ឋអាមេរិកសុទ្ធសាធ និងមានចន្លោះប្រហោងយ៉ាងច្បាស់លើភាពជាក់ស្តែង និងភាពសមហេតុផល។ បើតាមស្ថានទូតចិន គឺភាគីចិនប្រឆាំង និងតែងបង្ក្រាបលើការវាយប្រហារតាមគ្រប់ទម្រង់នៅក្នុងប្រព័ន្ធអ៊ីនធើណេត កុំថាឡើយលើកទឹកចិត្ត គាំទ្រ ឬអនុគ្រោះចំពោះការវាយប្រហាររបស់ក្រុម Hacker។
ជាមួយគ្នានេះ ស្ថានទូតចិនបានចោទអាមេរិកថា គឺជាប្រភពនៃការវាយប្រហារតាមប្រព័ន្ធអ៊ីនធើណេតដ៏ធំបំផុត ហើយថា អាមេរិកមិនលើកលែងឡើយសូម្បីតែសម្ព័ន្ធមិត្តរបស់ខ្លួន។ ស្ថានទូតចិនបានគូសបញ្ជាក់ថា ការទុកចិត្តលើអាមេរិកលើបញ្ហាសន្តិសុខអ៊ីនធើណេត ត្រូវបានបាត់បង់យូរមកហើយ ដោយប្រទេសនេះតែងពោលពាក្យចចាមអារ៉ាមផ្ដេសផ្ដាស គឺចោរស្រែកចាប់ចោរ ហើយញុះញង់គេឯង។
ជុំវិញបញ្ហានេះ ក្រសួងការបរទេសកម្ពុជា មិនទាន់អាចទាក់ទងសុំធ្វើអត្ថាធិប្បាយបាននៅឡើយទេនៅព្រឹកថ្ងៃសុក្រ ទី២៣ ខែកក្កដា ឆ្នាំ២០២១នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ