ក្រសួងការងារ ព្រមានអនុវត្តច្បាប់លើអ្នកបំផុសពលករខ្មែរនៅថៃឱ្យត្រលប់មកស្រុកវិញ
ក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី ៣០ខែកក្កដានេះ បានអំពាវនាវ ដល់ពលករខ្មែរដែលកំពុងស្នាក់នៅប្រទេសថៃ ផ្អាកការធ្វើដំណើរ ឬ កុំចល័តចេញពីកន្លែងស្នាក់នៅបច្ចុប្បន្នរបស់ខ្លួន ឆ្ពោះមកព្រំដែនកម្ពុជា-ថៃ ចំនួន ១៤ថ្ងៃ។ ហើយបើមានម្ចាស់រថយន្ត ឬ មេខ្យល់ ដែលបំផុស ឬ ដឹកជញ្ជូនពលករ គឺល្មើសនឹងបម្រាមរបស់អាជ្ញាធរថៃ ហើយត្រូវប្រឈមនឹងចំណាត់ការតាមច្បាប់។ ការអំពាវនាវរបស់ក្រសួងការងារកម្ពុជានេះ គឺបន្ទាប់ពីកម្ពុជា មានរកឃើញករណីឆ្លងមេរោគកូវីដបំប្លែងខ្លួន ដែលតា កាន់តែច្រើន រហូតញុំាងឱ្យរដ្ឋាភិបាល ត្រូវបិទខ្ទប់ការពារការឆ្លងចូលក្នុងសហគមន៍ ចំនួន ១៤ថ្ងៃសិន។
ចុះផ្សាយនៅថ្ងៃ៖
ស្តាប់ - ០២:២៦
តាមសេចក្តីជូនដំណឹងរបស់ខ្លួន ក្រសួងការងារកម្ពុជា បានអំពាវនាវឱ្យពលករខ្មែរ ដែលកំពុងស្នាក់នៅ និងធ្វើការនៅប្រទេសថៃ ត្រូវកុំចល័ត ពីកន្លែងស្នាក់នៅបច្ចុប្បន្នរបស់ខ្លួន ឆ្ពោះមកព្រំដែន កម្ពុជា-ថៃ ចំនួន ១៤ថ្ងៃ ចាប់ពីថ្ងៃទី ៣០ខែកក្កដានេះ រហូតដល់ថ្ងៃទី ១២ខែសីហា ឆ្នាំ ២០២១។ ហើយប្រសិនបើមានធុរៈចាំបាច់ ឬ ចប់ការងារត្រូវវិលត្រឡប់មកប្រទេសកម្ពុជា ត្រូវតែរង់ចាំរហូតដល់ក្រោយថ្ងៃទី ១២ខែសីហា។
ក្រសួងការងារ ក៏បានដាក់លេខទូរស័ព្ទ ឱ្យពលរដ្ឋ ឬ ពលករ ដែលមានការលំបាកក្នុងរយៈពេលស្នាក់នៅ និងធ្វើការនៅប្រទេសថៃ ទាក់ទងទៅកាន់ស្ថានឯកអគ្គរាជទូតកម្ពុជា ប្រចាំថ្ងៃ រៀងរាល់ម៉ោងធ្វើការ ឬ ក៏ទាក់ទងនឹងក្រុមការងារស្ម័គ្រចិត្តនៃ «ក្រុមការងារទឹកចិត្តពលករនៅថៃ»។ (លេខទូរស័ព្ទ 092 8050 561 ឬ 094 0925 905 ឬ 062 1414 009 ឬ 086 7999 957 ឬ តេឡេក្រាមឈ្មោះ «ជំនួយកូវីដ-១៩នៅថៃ»)
ចំពោះពលករដែលសង្ស័យថាខ្លួនមានវិជ្ជមានកូវីដ-១៩ ឬ មានវិជ្ជមានកូវីដ-១៩ កម្រិតស្រាល ហើយមិនទាន់ដឹងថាត្រូវទាក់ទងទៅណា ក៏អាចពិគ្រោះយោបល់អំពីការព្យាបាលជំងឺកូវីដ-១៩ តាមរយៈ ក្រុមតេឡេក្រាម «ពិគ្រោះកូវីដ-១៩នៅថៃ» ដែលមានក្រុមគ្រូពេទ្យចាំផ្តល់ប្រឹក្សាយោបល់ និងមានក្រុមស្ម័គ្រចិត្ត ផ្តល់កញ្ចប់ថ្នាំព្យាយាមជំងឺកូវីដ-១៩ កម្រិតស្រាល។
ជាមួយគ្នា ក្រសួងការងារ ក៏បញ្ជាក់ថា ប្រសិនបើមានពលករ ឬ ពលរដ្ឋ នៅតែបង្ខំចិត្តមកព្រំដែនកម្ពុជា-ថៃ នោះអាជ្ញាធរ នឹងតម្រូវឱ្យធ្វើដំណើរវិលត្រលប់ទៅកន្លែងដើមវិញ។ ហើយចំពោះម្ចាស់រថយន្ត ឬ មេខ្យល់ ដែលបំផុស ឬ ដឹកជញ្ជូនពលករ គឺល្មើសនឹងបម្រាមរបស់អាជ្ញាធរថៃ ហើយត្រូវប្រឈមនឹងការចាត់វិធានការតាមច្បាប់។
តាមក្រសួងការងារកម្ពុជា ចំណាត់ការហាមឃាត់មិនឱ្យពលករ ឬ ពលរដ្ឋខ្មែរដែលនៅប្រទេសថៃ ចូលមកកម្ពុជានេះ គឺដើម្បីទប់ស្កាត់ការឆ្លងរាលដាលក្នុងសហគមន៍នៃមេរោគកូវីដ-១៩ ប្រភេទដែលតា សម្តៅការពារសុខភាព និងអាយុជីវិតប្រជាជន ក៏ដូចជាដើម្បីឈានឆ្ពោះទៅបើកដំណើរការប្រទេសជាតិឡើងវិញ លើគ្រប់វិស័យ និងដើម្បីចូលរួមក្នុងវិធានាការបិទខ្ទប់ការធ្វើដំណើរពីខេត្តមួយទៅខេត្តមួយ របស់អាជ្ញាធរថៃផងដែរ។
គួរជម្រាបជូនថា ការអំពាវនាវរបស់ក្រសួងការងារកម្ពុជានេះ ធ្វើឡើងក្រោយពេលរដ្ឋាភិបាលកម្ពុជា នៅពាក់កណ្តាលសប្តាហ៍នេះ ទើបបានចេញសារាចរពង្រឹងការរឹតបណ្តឹងវិធានការការពារកូវីដ-១៩ ប្រភេទ ដែលតា ចូលក្នុងសហគមន៍។ រដ្ឋាភិបាលកម្ពុជា ក៏បានសម្រេចបិទខ្ទប់ខេត្តជាប់ព្រំដែនកម្ពុជា-ថៃ ចំនួន ៨ខេត្ត ដើម្បីការពារការបន្តនាំចូលមេរោគបំប្លែងខ្លួន ប្រភេទ ដែលតា ពីប្រទេសថៃ មកកម្ពុជា ខណៈមានការរកឃើញជាង ១០០ករណីមេរោគដែលតា ដែលឆ្លងតាមរយៈពលករខ្មែរមកពីប្រទេសថៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ