សេចក្តីព្រាងច្បាប់ដាក់ទណ្ឌកម្មមន្ត្រីកម្ពុជាត្រូវបានសភាអាមេរិកលើកមកពិនិត្យអនុម័តឡើងវិញ
ជាថ្មីម្តងទៀត សភាអាមេរិកបានលើកយកសេចក្តីព្រាងច្បាប់ដាក់ទណ្ឌកម្មលើលោកនាយករដ្ឋមន្រ្តីហ៊ុន សែន និងមន្ត្រីជាន់ខ្ពស់មួយចំនួន ជុំវិញការធ្វើឲ្យខូចខាតលទ្ធិប្រជាធិបតេយ្យនៅកម្ពុជា។ ក្នុងសេចក្តីព្រាងច្បាប់ស្តីពី«ប្រជាធិបតេយ្យកម្ពុជាឆ្នាំ២០២១» សមាជិកសភាអាមេរិកគ្រោងរុញបន្តទៅស្ថាប័នព្រឹទ្ធសភាដើម្បីពិនិត្យអនុម័តនៅពេលឆាប់ៗខាងមុខ។ ប៉ុន្តែជុំវិញសេចក្តីព្រាងច្បាប់ដាក់ទណ្ឌកម្មនេះ លោកនាយករដ្ឋមន្ត្រីហ៊ុន សែន នៅថ្ងៃអាទិត្យនេះបានធ្វើការបដិសេធមិនឆ្លើយតបច្រើនឡើយ។
ចុះផ្សាយនៅថ្ងៃ៖
ស្តាប់ - ០១:៥៨
«ច្បាប់ប្រជាធិបតេយ្យកម្ពុជាឆ្នាំ២០២១» ដែលរៀបចំឡើងដោយសមាជិកសភាអាមេរិក២រូបមកពីគណបក្សប្រជាធិបតេយ្យ និងគណបក្សសាធារណរដ្ឋ ត្រូវបានគណៈកម្មាធិការកិច្ចការបរទេសនៃរដ្ឋសភាអាមេរិកអនុម័តជាឯកច្ឆ័ន្ទ មុននឹងរុញបន្តទៅឲ្យស្ថាប័នច្បាប់ដែលមានរដ្ឋសភា និងព្រឹទ្ធឹសភាពិនិត្យបន្ត។ នេះបើតាមសេចក្តីប្រកាសព័ត៌មានបន្ទាន់នៅលើគេហទំព័រលោក Steve Chabot សមាជិករដ្ឋសភាមួយរូបនៃគណបក្សសាធារណរដ្ឋមកពីរដ្ឋ Ohio ចេញផ្សាយកាលពីថ្ងៃពុធទី២៨កក្កដា។
បន្ទាប់ពីនោះក្នុងលក្ខខណ្ឌដែលស្ថាប័នច្បាប់ទាំងពីរឯកភាព សេចក្តីព្រាងច្បាប់ដាក់ទណ្ឌកម្មលើមន្ត្រីជាន់ខ្ពស់កម្ពុជានេះនឹងបន្តដាក់ឲ្យប្រធានាធិបតីលោកចូ បៃឌិន ពិនិត្យនិងចូលជាធរមាន។ សេចក្តីព្រាងច្បាប់នេះដែលនឹងមានលទ្ធភាពក្នុងបង្កកទ្រព្យសម្បត្តិរបស់ថ្នាក់ដឹកនាំកម្ពុជា និងមិនផ្តល់ទិដ្ឋាកាឲ្យចូលទឹកដីសហរដ្ឋអាមេរិកឡើយ។
លោក Steve Chabot ដែលជាសមាជិកសភាបានរៀបចំសេចក្តីព្រាងច្បាប់នេះ បានលើកឡើងនៅក្នុងសេចក្តីប្រកាសព័ត៌មានថា លោកនាយករដ្ឋមន្រ្តីហ៊ុន សែន និងបក្ខពួកត្រូវប្រឈមមុខនឹងផលវិបាកដ៏ធំពីសហរដ្ឋអាមេរិកក្នុងការឆ្លើយតបទៅនឹងការចាប់ខ្លួនលោកកឹម សុខា និងការរំលាយគណបក្សប្រឆាំងនៅឆ្នាំ២០១៧ ដែលជាការបង្រ្កាបរហូតដល់មកសព្វថ្ងៃ។
បើតាមសមាជិកសភាមកពីគណបក្សសាធារណរដ្ឋរូបនេះ «ច្បាប់ប្រជាធិបតេយ្យកម្ពុជា» នឹងធ្វើឲ្យលោកនាយករដ្ឋមន្ត្រីហ៊ុន សែន ទទួលខុសត្រូវ និងគាំទ្រសេចក្តីប្រាថ្នារបស់ប្រជាពលរដ្ឋកម្ពុជា ក្នុងការទទួលប្រជាធិបតេយ្យសមស្រប។
ជាមួយគ្នានេះ សមាជិកសភាមួយរូបទៀតគឺលោក Alan Lowenthal បានចាត់ទុកថា ទណ្ឌកម្មនៃច្បាប់ប្រជាធិបតេយ្យកម្ពុជាគឺជាអ្វីដែលលោកនាយករដ្ឋមន្ត្រីហ៊ុន សែន ត្រូវតបស្នងចំពោះការវាយប្រហារលើសេរីភាពរបស់ពលរដ្ឋកម្ពុជា។
យ៉ាងណាមិញនៅព្រឹកថ្ងៃអាទិត្យទី០១សីហានេះ លោកនាយករដ្ឋមន្ត្រីហ៊ុន សែន បដិសេធមិនធ្វើការឆ្លើយតបនឹងសេចក្តីព្រាងច្បាប់នេះ នៅពេលអ្នកកាសែតបានសាកសួរ។ តែលោកបញ្ជាក់ខ្លីថា នោះជារឿងរបស់អាមេរិក។
សូមបញ្ជាក់ថា សេចក្តីព្រាងច្បាប់នេះត្រូវជាប់គាំងកាលពីឆ្នាំ២០១៨ និងឆ្នាំ២០១៩ ក្រោមការដឹកនាំរបស់លោកដូណាល់ត្រាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ