មេធាវីថា លោកកឹម សុខា មិនគាំទ្រ និងមិនពាក់ព័ន្ធក្នុងគម្រោងបង្កើតរដ្ឋាភិបាលបង្រួបបង្រួមជាតិរបស់លោកសម រង្ស៊ី
លោក កឹម សុខា ប្រធានអតីតគណបក្សសង្រ្គោះជាតិ តាមរយៈមេធាវី កាលពីរសៀលថ្ងៃសៅរ៍ទី០៧សីហា បានឱ្យដឹងថា លោកមិនគាំទ្រ និងមិនពាក់ព័ន្ធឡើយ នៅក្នុងគម្រោងបង្កើតរដ្ឋាភិបាលបង្រួបបង្រួមជាតិនៅក្រៅប្រទេស របស់លោកសម រង្ស៊ី។ លោកសម រង្ស៊ី កាលពីខែមុន បានចេញមកអំពាវនាវម្តងហើយម្តងទៀតឱ្យប្រជាពលរដ្ឋចូលរួមបង្កើតរដ្ឋាភិបាលបង្រួបបង្រួមជាតិ ដូចទៅនឹងករណីនៅក្នុងប្រទេសភូមា។
ចុះផ្សាយនៅថ្ងៃ៖
លោកកឹម សុខា បានប្រកាសឱ្យដឹងថា លោកមិនពាក់ព័ន្ធ មិនគាំទ្រ និងមិនចូលរួមក្នុងការគ្រោង និងការបង្កើតរដ្ឋាភិបាលក្រៅប្រទេសដែលប្រកាសដោយលោកសម រង្សី កាលពីពេលថ្មីៗនេះទេ។ ការប្រកាសរបស់លោកកឹម សុខា នេះ ត្រូវបង្ហាញឱ្យដឹងជាសាធារណៈដោយលោក ចាន់ ចេន ជាមេធាវី និងជាសហការីម្នាក់របស់លោកកឹម សុខា តាមរយៈបណ្តាញសង្គមហ្វេសប៊ុកកាលពីថ្ងៃសៅរ៍។ មិនតែប៉ុណ្ណោះ លោកមេធាវីចាន់ ចេន ថែមទាំងគូសបញ្ជាក់ឱ្យដឹងទៀតថា លោកកឹម សុខា ក៏មិនអនុញ្ញាតឱ្យយកឈ្មោះរបស់លោកទៅប្រើប្រាស់ និងភ្ជាប់ជាមួយរដ្ឋាភិបាលបង្រួបបង្រួមជាតិនៅក្រៅប្រទេសរបស់លោកសម រង្ស៊ី ដែរ។
លោកសម រង្ស៊ី តាមរយៈទំព័រហ្វេសប៊ុក កាលពីថ្ងៃទី១៧ ខែកក្កដា បានចេញមកអំពាវនាវឱ្យពលរដ្ឋខ្មែរទាំងអស់ពិចារណាអំពីលទ្ធភាពបង្កើតរដ្ឋាភិបាលបង្រួបបង្រួមជាតិថ្មីមួយនៅកម្ពុជាជាមួយរូបលោក។ លោកសម រង្ស៊ី ចង់ឱ្យមានការបង្កើតរដ្ឋាភិបាលនេះ ឱ្យដូចនៅក្នុងប្រទេសភូមាអ៊ីចឹងដែរ។ រំលងបាន២ថ្ងៃ លោកក៏បានចេញមកអំពាវនាវម្តងទៀត តែម្តងនេះ គឺអំពាវនាវដល់កងកម្លាំង កងប្រដាប់អាវុធ ឱ្យចូលរួមជាមួយលោក។ បើតាមលោកសម រង្ស៊ី ការបង្កើតរដ្ឋាភិបាលបង្រួបបង្រួមជាតិនាពេលនេះ គឺជាពេលអំណោយផលនៃស្ថានការណ៍អន្តរជាតិ ដើម្បីរំដោះប្រទេសកម្ពុជាចេញពីរបបដែលលោកសម រង្ស៊ី អះអាងថា ផ្តាច់ការ ពុករលួយ និងក្បត់ជាតិ ដឹកនាំដោយលោកហ៊ុន សែន។
ចំពោះការប្រកាសបង្កើតរដ្ឋាភិបាលបង្រួបបង្រួមជាតិនេះ អ្នកនាំពាក្យគណបក្សប្រជាជនកម្ពុជា លោកសុខ ឥសាន បានចាត់ទុកថា វាគ្រាន់តែអាចបង្កើតបានត្រឹមតែជារដ្ឋាភិបាលនៅក្នុងអារម្មណ៍ប៉ុណ្ណោះ ហើយលោកថា អ្នកដែលឡើងធ្វើជាប្រធានរដ្ឋាភិបាលនេះ នឹងត្រូវឯកោពីពិភពលោក។ លោកសុខ ឥសាន ក៏ធ្លាប់បានគូសបញ្ជាក់នាពេលកន្លងមកថា ករណីប្រទេសកម្ពុជា និងប្រទេសភូមា គឺមិនដូចគ្នាសូម្បីតែបន្តិចឡើយ។
សូមកត់សម្គាល់ថា ស្របពេលលោកសម រង្ស៊ី ប្រកាសបង្កើតរដ្ឋាភិបាលបង្រួបបង្រួមជាតិនេះ សមាជិកនៃអតីតគណបក្សសង្រ្គោះជាតិមួយចំនួនបានចេញមកបង្កើតគណបក្សនយោបាយថ្មី និងខ្លះចង់ចូលរួមជាមួយគណបក្សទើបបង្កើតថ្មី។ ប៉ុន្តែ ទាក់ទងនឹងបញ្ហាបង្កើតគណបក្សនយោបាយថ្មីនេះ លោកកឹម សុខា តាមរយៈលោកមេធាវីចាន់ ចេន ដដែល បានគូសបញ្ជាក់ជាថ្មីថា រូបលោកមិនពាក់ព័ន្ធ មិនគាំទ្រ និងមិននៅពីក្រោយការបង្កើតគណបក្សនយោបាយថ្មីៗ ដោយបុគ្គល ឬក្រុមណាមួយនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ