ខេត្តដែលបិទខ្ទប់នៅមិនទាន់ប្រាកដថា អាចនឹងបើកឡើងវិញ ឬបន្តបិទខ្ទប់តទៅទៀតនៅថ្ងៃស្អែកនេះ
ថ្ងៃទី១២ ខែសីហាស្អែកនេះ គឺជាថ្ងៃផុតកំណត់នៃការបិទខ្ទប់ខេត្តចំនួន៨ដែលនៅជាប់ព្រំដែនជាមួយប្រទេសថៃរយៈពេល១៤ថ្ងៃ ដើម្បីទប់ស្កាត់ការឆ្លងរាលដាលនៃជំងឺកូវីដ១៩។ ប៉ុន្តែ គិតមកត្រឹមព្រឹកថ្ងៃទី១១ ខែសីហានេះ បណ្តាខេត្តមួយចំនួននៅមិនទាន់ប្រាកដនៅឡើយទេថា នឹងអាចបើកឡើងវិញ ឬក៏បន្តបិទខ្ទប់តទៅទៀត។ បើទោះបីការបើកខេត្តនៅមិនទាន់ច្បាស់លាស់ តែការបើកព្រំដែនជាមួយថៃទំនងជាអាចកើតឡើង ដោយសារតែលោកនាយករដ្ឋមន្រ្តីហ៊ុន សែន កាលពីថ្មីៗនេះ បានសម្រេចឱ្យរៀបចំកន្លែងធ្វើចត្តាឡីស័កបន្ថែម ដើម្បីទទួលពលករខ្មែរមកពីប្រទេសថៃ។
ចុះផ្សាយនៅថ្ងៃ៖
ស្តាប់ - ០២:៣១
សម្រាប់ខេត្តឧត្តរមានជ័យ លោកឌី រ៉ាដូ ដែលជាអភិបាលរងខេត្តបានអះអាងប្រាប់វិទ្យុបារាំងអន្តរជាតិថា អាជ្ញាធរខេត្តកំពុងត្រៀមបើកខេត្តឡើងវិញនៅថ្ងៃទី១២ ខែសីហា ឆ្នាំ២០២១ ដែលជាថ្ងៃផុតកំណត់តាមការសម្រេចរបស់រដ្ឋាភិបាលកម្ពុជា។ ប៉ុន្តែ លោកថា នេះ គឺជាគ្រាន់តែជាការត្រៀមតែប៉ុណ្ណោះ ពោល គឺព័ត៌មានច្បាស់លាស់ត្រូវរង់ចាំការសម្រេចជាផ្លូវការពីរាជរដ្ឋាភិបាល។ ចំណែក ខេត្តបន្ទាយមានជ័យដែលជាខេត្តប្រឈមខ្លាំងនឹងការឆ្លងរាលដាលនៃជំងឺកូវីដ១៩ ជាពិសេស ពីសំណាក់ពលករខ្មែរមកពីប្រទេសថៃនោះ គឺមិនទាន់មានព័ត៌មានច្បាស់លាស់ដូចគ្នាទាក់ទងនឹងបញ្ហានេះ ដោយសារអភិបាលរងខេត្ត គឺលោកង៉ោ ម៉េងជ្រួន បានប្រាប់ថា កំពុងជាប់ប្រជុំមិនអាចផ្តល់ព័ត៌មាននេះបាន។
ដោយឡែក ខេត្តសៀមរាបឯណោះវិញ ក៏មិនច្បាស់លាស់នៅឡើយដែរចំពោះការបើក ឬបន្តបិទខ្ទប់នាថ្ងៃទី១២ ខែសីហានេះ។ លោកលី សំរិទ្ធ ដែលជាអភិបាលរងខេត្តសៀមរាបបានអះអាងថា អាជ្ញាធរខេត្តនឹងពិភាក្សាគ្នាពីបញ្ហានេះក្រោមការដឹកនាំដោយអភិបាលខេត្ត ហើយទន្ទឹមគ្នានេះ អាជ្ញាធរក៏កំពុងរង់ចាំការវាយតម្លៃពីស្ថានភាពការឆ្លងរាលដាលនៃជំងឺកូវីដ១៩នៅក្នុងខេត្តសៀមរាប និងការសម្រេចចុងក្រោយពីគណៈកម្មការប្រយុទ្ធប្រឆាំងនឹងជំងឺកូវីដ១៩។ ចំពោះបញ្ហានេះ លោកគឹម សន្តិភាព រដ្ឋលេខាធិការក្រសួងយុត្តិធម៌ និងជាអ្នកនាំពាក្យគណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ-១៩ មិនទាន់អាចបញ្ជាក់ច្បាស់ការបាននៅឡើយទេ ដោយគ្រាន់តែប្រាប់ឱ្យរង់ចាំបន្តិចសិន។
សូមបញ្ជាក់ថា កាលពីថ្ងៃទី២៨ ខែកក្កដា រដ្ឋាភិបាលកម្ពុជាបានសម្រេចបិទខ្ទប់ខេត្តចំនួន៨ ដែលរួមមាន ខេត្តកោះកុង ពោធិ៍សាត់ បាត់ដំបង ប៉ៃលិន បន្ទាយមានជ័យ ឧត្តរមានជ័យ ព្រះវិហារ និងខេត្តសៀមរាបរយៈពេល១៤ថ្ងៃចាប់ពីថ្ងៃទី២៩ កក្កដារហូតដល់ថ្ងៃទី១២ សីហា ឆ្នាំ២០២១។ ការសម្រេចបិទខ្ទប់ជាបន្ទាន់នេះ គឺដើម្បីទប់ស្កាត់ការនាំចូលមេរោគកូវីដ១៩បំប្លែងថ្មីឈ្មោះដែលតាចូលទៅក្នុងសហគមន៍។ ក្រៅពីខេត្តទាំង៨នេះ រដ្ឋាភិបាលកម្ពុជាក៏បានតម្រូវឱ្យមានបិទព្រំដែនជាមួយនឹងប្រទេសថៃជាបណ្តោះអាសន្នរយៈពេល១៤ថ្ងៃផងដែរ ដើម្បីទប់ស្កាត់ការនាំចូលជំងឺកូវីដ១៩ពីប្រទេសថៃ។
បន្ថែមលើនេះ រដ្ឋាភិបាលកម្ពុជាក៏សម្រេចឱ្យអភិបាលរាជធានី-ខេត្តនៅទូទាំងប្រទេសកម្ពុជាដាក់បំរាមគោរចរពីម៉ោង៩យប់ដល់៣ទៀបភ្លឺ និងកំណត់ដាក់តំបន់ក្រហម លឿនទុំ និងលឿន ដើម្បីគ្រប់គ្រងការឆ្លងរាលដាលនៃជំងឺកូវីដ១៩។ វិធានការទាំងអស់នេះ នឹងត្រូវអស់សុពលភាពនៅយប់ថ្ងៃទី១២ ខែសីហា ឆ្នាំ២០២១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ