សវនាការបណ្ដឹងសាទុក្ខលើសំណុំរឿង០០២/០២ មិនសូវមានការចាប់អារម្មណ៍ដោយសារកូវីដ១៩
នៅថ្ងៃចន្ទទី១៦សីហាស្អែកនេះ តុលាការកំពូលនៃសាលាក្ដីខ្មែរក្រហមនឹងបើកសវនាការលើបណ្ដឹងសាទុក្ខក្នុងសំណុំរឿង០០២ វគ្គ២ ប្រឆាំងនឹង ខៀវ សំផន។ ខៀវ សំផន ដែលជាអតីតប្រមុខរដ្ឋនៃរបបកម្ពុជាប្រជាធិបតេយ្យ។ ចំពោះការបើកសវនាការនៅក្នុងអំឡុងពេលនៃការរាតត្បាតជំងឺកូវីដ១៩នេះ លោក នេត្រ ភក្ត្រា អ្នកនាំពាក្យសាលាក្ដីខ្មែរក្រហម បានសង្កេតឃើញអំពីការធ្លាក់ចុះនៃចំណាប់អារម្មណ៍ពីសំណាក់ប្រជាពលរដ្ឋ។ សម្រាប់លោក នេត្រ ភក្ត្រា សវនាការនេះមានសារៈសំខាន់ណាស់ និងជាដំណាក់កាលទឹកចុងក្រោយនៃសំណុំរឿង០០២វគ្គ២ ក្នុងដំណើរការផ្ដល់យុត្តិធម៌ដល់ជនរងគ្រោះនៃរបបខ្មែរក្រហម។
ចុះផ្សាយនៅថ្ងៃ៖
ស្តាប់ - ០៣:០៦
«សវនាការលើបណ្ដឹងសាទុក្ខក្នុងសំណុំរឿង០០២វគ្គ២ ហាក់មិនសូវទទួលបានការចាប់អារម្មណ៍ច្រើនទេ បើធៀបទៅនឹងសវនាការមុនៗនៅសាលាក្ដីខ្មែរក្រហម»។
នេះគឺជាការទទួលស្គាល់ចេញពីមាត់លោក នេត្រ ភក្ត្រា ប្រធានផ្នែកកិច្ចការសាធារណៈ និងជាអ្នកនាំពាក្យសាលាក្ដីខ្មែរក្រហម។ ការណ៍នេះគឺដោយសារតែកម្ពុជាកំពុងតែជាប់ដៃប្រយុទ្ធនឹងជំងឺរាតត្បាតកូវីដ១៩ និយាយជារួម និងដោយសារតែប្រជាពលរដ្ឋទូទៅរវល់ខ្វាយខ្វល់នឹងជីវភាពរបស់ខ្លួនដែលធ្លាក់ចុះដោយសារកូវីដ១៩ដែរ និយាយដោយឡែក។
គួររំឭកថា សំណុំរឿង០០២វគ្គ២ បានចាប់ផ្ដើមតាំងពីឆ្នាំ២០១៤មកម្ល៉េះ ដោយផ្ដោតលើអំពើប្រល័យពូជសាសន៍ ឧក្រិដ្ឋកម្មប្រឆាំងនឹងមនុស្សជាតិ និងឧក្រិដ្ឋកម្មសង្គ្រាម ប្រព្រឹត្តឡើងនៅតាមទីកន្លែងនានានៅក្នុងប្រទេសកម្ពុជា ក្រោមការគ្រប់គ្រងប្រទេសដោយរបបកម្ពុជាប្រជាធិបតេយ្យ ពីថ្ងៃទី១៧មេសា ឆ្នាំ១៩៧៥ ដល់ថ្ងៃទី០៦ មករា ឆ្នាំ១៩៧៩។ ក្រោយដំណើរការកាត់សេចក្ដីអស់រយៈពេល៤ឆ្នាំ ពោលគឺនៅថ្ងៃទី១៦វិច្ឆិកាឆ្នាំ២០១៨ សាលាដំបូងនៃសាលាក្ដីខ្មែរក្រហម បានសម្រេចផ្ដន្ទាទោសជនជាប់ចោទ ខៀវ សំផន និង នួន ជា ដាក់ពន្ធនាគារអស់មួយជីវិត។ នួន ជា ដែលបានទទួលមរណភាពទៅហើយ និងខៀវ សំផន មិនសុខចិត្តចំពោះការសម្រេចនេះ ហើយបានប្រើសិទ្ធិប្ដឹងសាទុក្ខទៅកាន់តុលាការកំពូល។
នៅក្នុងបណ្ដឹងសាទុក្ខរបស់ខ្លួន ជនជាប់ចោទ ខៀវ សំផន បានដាក់សំណើចំនួន៣ចំណុចទៅកាន់តុលាការ៖ ទី១ ជាចម្បង ធ្វើមោឃភាពសាលក្រមរបស់អង្គជំនុំជម្រះសាលាដំបូងដែលបានប្រកាសនៅថ្ងៃទី១៦ខែវិច្ឆិកាឆ្នាំ២០១៨ដោយសំអាងហេតុពីការរំលោភលើវិធានផ្ទៃក្នុង។ ទី២ ជាបន្ទាប់បន្សំ ធ្វើមោឃភាពសាលាក្រមពីការគ្មានពិរុទ្ធភាពចំពោះបទចោទនីមួយៗ។ និងទី៣ ជាបន្ទាប់បន្សំបំផុត កែប្រែការផ្ដន្ទាទោស និងប្រកាសដាក់ទោសឲ្យជាប់ពន្ធនាគារក្នុងរយៈពេលកំណត់មួយ។
សម្រាប់លោក នេត្រ ភក្ត្រា សវនាការនេះមានសារៈសំខាន់ណាស់ និងជាដំណាក់កាលទឹកចុងក្រោយនៃសំណុំរឿង០០២វគ្គ២ ក្នុងដំណើរការផ្ដល់យុត្តិធម៌ដល់ជនរងគ្រោះនៃរបបខ្មែរក្រហម។ នៅក្នុងរយៈពេល៤ថ្ងៃនៃសវនាការលើបណ្ដឹងសាទុក្ខនេះ បើទោះបីជាមានការកាត់បន្ថយចំនួនអ្នកចូលរួមតាមដានផ្ទាល់ក្នុងសវនាការដើម្បីបង្ការការឆ្លងជំងឺកូវីដ១៩ ប៉ុន្តែសាលាក្ដីបានសហការជាមួយស្ថានីយទូរទស្សន៍និងវិទ្យុអប្សរា ដើម្បីផ្សព្វផ្សាយអំពីដំណើរការសវនាការជូនដល់សាធារណជន។ បើតាមលោក នេត្រ ភក្ត្រា ក្រោយពេលបើកសវនាការលើបណ្ដឹងនេះរួច អង្គជំនុំជម្រះតុលាការកំពូលរំពឹងថា នឹងប្រកាសសាលដីកាស្ថាពររបស់ខ្លួនលើសំណុំរឿង០០២វគ្គ២ នៅត្រីមាសទី៤ ឆ្នាំ២០២២ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ