អ្នកជំនាញ៖ ភាគីពាក់ព័ន្ធគួរមានភាពឯកភាពគ្នាជាមុនទើបគោលនយោបាយការបរទេសកម្ពុជាមានប្រសិទ្ធិភាព
រាជបណ្ឌិត្យសភាកម្ពុជានៅព្រឹកថ្ងៃព្រេហស្បតិ៍ទី១៩សីហានេះ បានបើកកិច្ចពិភាក្សាមួយជុំវិញស្ថានភាពកម្ពុជានៅចន្លោះមហាអំណាចចិននិងសហរដ្ឋអាមេរិក។ សម្រាប់អ្នកជំនាញដែលចូលរួម បានលើកឡើងមតិចម្រុះគ្នាជុំវិញកិច្ចការបរទេសដែលកម្ពុជាកំពុងប្រកាន់យក តែយ៉ាងណាអ្នកជំនាញមួយរូបយល់ថាការឯកភាពគ្នាពីភាគីខាងក្នុងរួមមានរដ្ឋាភិបាល គណបក្សនយោបាយ និងសង្គមស៊ីវិល ជារឿងសំខាន់មួយដើម្បីឲ្យគោលនយោបាយការបរទេសកម្ពុជាមានប្រសិទ្ធិភាព។ ពីខាងអ្នកនាំពាក្យ រដ្ឋាភិបាលតែងតែស្តាប់នូវភាគីពាក់ព័ន្ធ តែក៏ត្រូវវាយតម្លៃថាមានប្រយោជន៍ឬយ៉ាងណា។
ចុះផ្សាយនៅថ្ងៃ៖
ស្តាប់ - ០២:០៩
គឺនៅក្នុងកិច្ចពិភាក្សាតុមូលស្តីពី«កម្ពុជានៅចន្លោះមហាអំណាចចិន និងសហរដ្ឋអាមេរិក» ដែលមានវាគ្មិនចំនួន៤រូប លោកឈាង វណ្ណារិទ្ធិ ប្រធានវិទ្យាស្ថានចក្ខុវិស័យអាស៊ី នៅក្នុងបទអន្តរាគមន៍របស់ខ្លួន បានលើកឡើងពីការឯកភាពគ្នាលើគោលនយោបាយការបរទេសកម្ពុជារវាងរដ្ឋាភិបាលនិងក្រុមអង្គការសង្គមស៊ីវិល រួមនឹងគណបក្សនយោបាយនានាក្នុងស្រុក ទើបអាចឈានទៅសម្រេចផ្លែផ្កាដែលកម្ពុជាចង់បាន។ សម្រាប់លោកឈាង វណ្ណារិទ្ធិ ប្រសិនបើមិនមានការជំរុញឲ្យមានការឯកភាពគ្នាផ្នែកខាងក្នុង នោះគោលនយោបាយការបរទេសរបស់កម្ពុជានឹងគ្មានប្រសិទ្ធិភាព។
ទាក់ទងនឹងការលើកឡើងបែបនេះ លោកអំ សំអាត នាយករងទទួលបន្ទុកកម្មវិធីឃ្លាំមើលនៃអង្គការលីកាដូបង្ហាញការយល់ស្របចំពោះការជំរុញឲ្យមានការពិភាក្សាគ្នារវាងរដ្ឋាភិបាល គណបក្សនយោបាយ និងក្រុមអង្គការសង្គមស៊ីវិល។ តាមរយៈវិទ្យុបារាំងអន្តរជាតិនៅព្រឹកនេះ លោកអំ សំអាត យល់ឃើញថារដ្ឋាភិបាលគួរណាស្តាប់និងប្រមូលធាតុចូលដែលក្រុមអង្គការសង្គមស៊ីវិលនានាបានធ្វើការកន្លងមក ដើម្បីដាក់ចេញនូវគោលនយោបាយណាមួយរបស់រដ្ឋាភិបាលទទួលបានប្រសិទ្ធិភាព។ បើតាមលោកអំ សំអាត កន្លងមកខាងសង្គមស៊ីវិលក៏បានចូលរួមខ្លះ និងមិនបានចូលរួមខ្លះដែរជុំវិញការតាក់តែងគោលនយោបាយរបស់រដ្ឋាភិបាលកម្ពុជា ដូច្នេះហើយទើបគោលនយោបាយមួយចំនួនមិនមានប្រសិទ្ធិភាពនោះ។
យ៉ាងណាមិញសម្រាប់លោក ផៃ ស៊ីផាន អ្នកនាំពាក្យរដ្ឋាភិបាលកម្ពុជា បានប្រាប់វិទ្យុបារាំងអន្តរជាតិនៅព្រឹកនេះដែរថា ជាទូទៅរដ្ឋាភិបាលតែងតែស្តាប់និងពិចារណាលើមតិនានាពីភាគីពាក់ព័ន្ធ ក៏ប៉ុន្តែក្នុងនាមរដ្ឋាភិបាលក៏មានសិទ្ធិសម្រេចថាអ្វីទៅជាប្រយោជន៍រួមរបស់កម្ពុជា។ បើតាមលោកផៃ ស៊ីផាន ការតម្កល់បានប្រយោជន៍កម្ពុជា ជារឿងសំខាន់បំផុត ដោយត្រូវធ្វើយ៉ាងណារក្សាបាននូវស្ថេរភាពនយោបាយរបស់ខ្លន។ លោកបញ្ជាក់ថា សម្រាប់ក្រុមអង្គការសង្កមស៊ីវិលមួយចំនួនដែលទទួលការឧបត្ថម្ភពីភាគីខាងក្រៅ ភាគច្រើនបម្រើប្រយោជន៍ភាគីខាងក្រៅច្រើនជាងកម្ពុជា។ សម្រាប់អ្នកនាំពាក្យរូបនេះរដ្ឋាភិបាលកម្ពុជាមានតួនាទីសម្របសម្រួលគ្រប់ភាគីទាំងអស់ដោយឈរលើជំហរកណ្តាល និងមិនដែលចាត់តាំងអ្នកណាជាសត្រូវនោះទេ។ ពោលគឺរដ្ឋាភិបាលនៅតែតម្កល់ប្រយោជន៍រួមជារឿងចម្បង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ