ទូតធំៗនាំគ្នាចោទសួរពីឯករាជ្យភាពនៃតុលាការ និងសិទ្ធិបញ្ចេញមតិនៅកម្ពុជាក្រោយមានការដាក់ទោសលោករ៉ុង ឈុន
ស្ថានទូតបរទេសធំៗនៅកម្ពុជាបាននាំគ្នាបញ្ចេញប្រតិកម្មជាបន្តបន្ទាប់ជុំវិញការកាត់ទោសលើលោករ៉ុង ឈុន និងសកម្មជន២នាក់ទៀតពីសំណាក់តុលាការកម្ពុជា។ ស្ថានទូតបរទេសនានាបានលើកឡើងថា ការកាត់ក្តីឱ្យលោករ៉ុង ឈុន និងសកម្មជន២នាក់ទៀតជាប់ពន្ធនាគារ និងបង់សងជំងឺចិត្តដល់គណៈកម្មាធិការកិច្ចការព្រំដែនកម្ពុជាចំនួន១០ម៉ឺនដុល្លារអាមេរិក គឺធ្វើឱ្យប៉ះពាល់សិទ្ធិបញ្ចេញមតិនៅកម្ពុជា។ មិនតែប៉ុណ្ណោះ ស្ថានទូតបរទេសក៏បានចោទសួរពីឯករាជ្យភាពរបស់តុលាការកម្ពុជាថែមទៀតដែលបានសម្រេចទោសទៅលើពួកគេទាំង៣នាក់នេះ។
ចុះផ្សាយនៅថ្ងៃ៖
ស្តាប់ - ០៣:០៤
ស្ថានទូតសហភាពអឺរ៉ុបប្រចាំនៅកម្ពុជាតាមរយទំព័រហ្វេសប៊ុកនៅព្រឹកថ្ងៃទី១៩ ខែសីហានេះ បានចេញមកសម្តែងនូវការព្រួយបារម្ភចំពោះការកាត់ទោសលើលោករ៉ុង ឈុន និងសកម្មជន២នាក់ផ្សេងទៀត។ សម្រាប់ស្ថានទូតសហភាពអឺរ៉ុប សាលក្រមប្រឆាំងនឹងលោករ៉ុង ឈុន និងសកម្មជន២នាក់ទៀតនេះ គឺធ្វើឱ្យប៉ះពាល់ដល់សិទ្ធិបញ្ចេញមតិជំទាស់ជាសាធារណៈ ឬការរិះគន់នយោបាយ និងបានចោទសួរអំពីឯករាជ្យភាពនៃប្រព័ន្ធតុលាការកម្ពុជា។
ស្ថានទូតសហភាពអឺរ៉ុបបានអះអាងថា ប្រជាពលរដ្ឋកម្ពុជាត្រូវការការធានាលើការបញ្ចេញមតិ និងការជួបជុំប្រមូលផ្តុំដោយសន្តិវិធីដែលស្របទៅតាមកតិកាសញ្ញាអន្តរជាតិស្តីពីសិទ្ធិស៊ីវិល និងសិទ្ធិនយោបាយ ព្រមទាំងសិទ្ធិ សេរីភាពដែលមានចែងនៅក្នុងរដ្ឋធម្មនុញ្ញកម្ពុជា។ ស្ថានទូតសហភាពអឺរ៉ុបបានគូសបញ្ជាក់ទៀតថា សេរីភាពនៃការបញ្ចេញមតិ គឺជាផ្នែកដ៏សំខាន់មួយនៃដំណើរការលទ្ធិប្រជាធិបតេយ្យដូចទៅនឹងការមានតុលាការឯករាជ្យអ៊ីចឹងដែរដែលមិនគួរត្រូវបានប្រើប្រាស់ដើម្បីបំបិទសំឡេងសកម្មជនតវ៉ាដោយសន្តិវិធី។ ហេតុដូច្នេះហើយ សហភាពអឺរ៉ុបបានអំពាវនាវជាថ្មីដល់អាជ្ញាធរកម្ពុជាអនុញ្ញាតឱ្យមានសេរីភាពក្នុងការបញ្ចេញមតិ និងការជួបជុំគ្នាដោយសន្តិវិធី។
ស្ថានទូតបារាំងប្រចាំនៅកម្ពុជាបានគាំទ្រលើការលើកឡើង និងការអំពាវនាវរបស់ស្ថានទូតសហភាពអឺរ៉ុបប្រចាំនៅកម្ពុជានេះ ដោយបានចែករំលែកបន្តនៅលើទំព័រហ្វេសប៊ុករបស់ខ្លួន។ ចំណែក ស្ថានទូតអាមេរិក និងអង់គ្លេសប្រចាំនៅកម្ពុជាវិញ ក៏មិនពេញចិត្ត និងសម្តែងកង្វល់អំពីបញ្ហាកាត់ទោសនេះផងដែរ។
ឯកអគ្គរដ្ឋទូតអាមេរិក លោក Patrick Murphy បានអះអាងថា ការកាត់ទោសលោក រ៉ុង ឈុន គឺធ្វើឱ្យមានការចោទសួរយ៉ាងខ្លាំងទៅលើសេរីភាពក្នុងការបញ្ចេញមតិ ដែលត្រូវបានការពារដោយរដ្ឋធម្មនុញ្ញកម្ពុជា និងសារៈសំខាន់នៃដំណើរការលទ្ធិប្រជាធិបតេយ្យ។ លោកថា ប្រព័ន្ធតុលាការមិនគួរត្រូវបានគេរំលោភបំពាន ដើម្បីបំបិទសំឡេងសកម្មជនសន្តិភាពទេ។ រីឯ លោកស្រី Tina Redshaw ឯកអគ្គរាជទូតអង់គ្លេសវិញថា សេរីភាពនៃការបញ្ចេញមតិ គឺត្រូវបានការពារដោយរដ្ឋធម្មនុញ្ញកម្ពុជា ហើយប្រព័ន្ធតុលាការមិនគួរត្រូវបានប្រើប្រាស់ដើម្បីកាត់តម្រឹមវាឡើយ។
ចំពោះប្រតិកម្មរបស់ក្រុមអង្គទូតបរទេសទាំងនេះ លោកជិន ម៉ាលីន អ្នកនាំពាក្យក្រសួងយុត្តិធម៌ និងជាអនុប្រធានគណៈកម្មាធិការសិទ្ធិមនុស្សកម្ពុជាចាត់ទុកថា មិនមែនជារឿងថ្មីនោះទេ ហើយថា ការបញ្ចេញប្រតិកម្មរបស់ពួកគេទាំងនេះ គឺធ្វើឡើងទៅតាមរបៀបវារៈនយោបាយ។ លោកបន្តថា កម្ពុជានៅតែប្រកាន់នីតិរដ្ឋ និងការពារអធិតេយ្យរបស់ខ្លួន។ ប៉ុន្តែ លោកក៏គូសបញ្ជាក់ដែរថា កម្ពុជានៅតែបន្តសហការ និងសន្ទនាជាមួយនឹងបណ្តាទូតបរទេសនានា ដើម្បីពន្យល់ឱ្យយល់អំពីវិធានការច្បាប់របស់កម្ពុជាក្នុងការការពារសន្តិសុខ និងផលប្រយោជន៍របស់ជាតិ។
សូមបញ្ជាក់ថា កាលពីថ្ងៃពុធ សាលាដំបូងរាជធានីភ្នំពេញបានសម្រេចផ្តន្ទាទោសលោករ៉ុង ឈុន ដាក់ពន្ធនាគារ២ឆ្នាំ និងពិន័យជាទឹកប្រាក់២លានរៀល។ ដោយឡែក សកម្មជន២នាក់ទៀតត្រូវបានតុលាការកាត់ទោសឱ្យពន្ធនាគារម្នាក់២០ខែ និងពិន័យជាទឹកប្រាក់២លានរៀលដូចគ្នាដែរ។ មិនតែប៉ុណ្ណោះ តុលាការក៏បានបង្គាប់ឱ្យពួកគេសងជំងឺចិត្តទៅគណៈកម្មាធិការកិច្ចព្រំដែនកម្ពុជាចំនួន៤០០លានរៀល ឬប្រហាក់ប្រហែលនឹង១០ម៉ឺនដុល្លារថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ