លោក ស សុខា៖ វត្តមាន លោក ស ខេង ទៅបារាំងដើម្បីពិនិត្យសុខភាពសុទ្ធសាធ ពុំមានជួបអ្នកនយោបាយណាម្នាក់ឡើយ!
កូនប្រុស លោក ស ខេង ចេញមុខមកបញ្ជាក់ថា វត្តមានឳពុករបស់ខ្លួនទៅប្រទេសបារាំង រយៈពេល ២សប្តាហ៍ ចាប់ពីថ្ងៃទី២២ សីហា ដល់ថ្ងៃទី៥ កញ្ញា គឺជាការអញ្ជើញទៅពិនិត្យសុខភាពសុទ្ធសាធ ពុំមានការជួបជាមួយអ្នកនយោបាយណាម្នាក់ ដូចការលើកឡើងរបស់អ្នកវិភាគ ក៏ដូចជាអ្នកនយោបាយមួយចំនួនតូច នៃអតីតគណបក្សសង្គ្រោះជាតិនោះឡើយ។ ការបញ្ជាក់យ៉ាងដូច្នេះរបស់ លោក ស សុខា គឺបន្ទាប់ពីលោក សម រង្ស៊ី បានប្រកាសថា ការបង្កើតរដ្ឋាភិបាលបង្រួបបង្រួមជាតិ ដែលមានលោក ស ខេង ចូលរួមផងដែរគឺជាគំនិតមួយដ៍ត្រឹមត្រូវ។
ចុះផ្សាយនៅថ្ងៃ៖
ស្តាប់ - ០១:៥៨
«ចំពោះការលើកឡើងទាំងមិនពិត របស់អ្នកនយោបាយទាំងនោះ វាគ្រាន់តែជាការប្រឌិតឡើងដើម្បីបំភាន់មតិជាតិ និងអន្តរជាតិ សំដៅកេងចំណេញផលប្រយោជន៍នយោបាយរបស់ខ្លួន និងបក្ខពួកប៉ុណ្ណោះ ពិសេសអាចគ្រាន់តែជាសារដង្ហើយរកផ្លូវចរចានយោបាយជាមួយគណបក្សប្រជាជនកម្ពុជា ពោលគឺផ្ទុយពីអ្វីដែលថ្នាក់ដឹកនាំ ក៏ដូចជា សាធារណជន បានធ្វើ និងមើលឃើញជាក់ស្តែង»។
នេះគឺជាប្រតិកម្មរបស់លោក ស សុខា កូណប្រុស ស ខេង បន្ទាប់ពីលោក សម រង្ស៊ី បានប្រកាសថា ការបង្កើតរដ្ឋាភិបាលបង្រួបបង្រួមជាតិ ដែលមានលោក ស ខេង ចូលរួមផងដែរគឺជាគំនិតមួយដ៍ត្រឹមត្រូវ។ ការប្រកាសបែបនេះរបស់លោក សម រង្ស៊ី ត្រូវបានជួយបន្ទរតាមពីក្រោយជាបន្តបន្ទាប់ដោយក្រុមអ្នកគាំទ្រអតីតប្រធានបក្សប្រឆាំងរូបនេះ។
ក៏ប៉ុន្តែសម្រាប់ លោក ស សុខា ការលើកឡើងរបស់អ្នកនយោបាយមួយចំនួនតូចនៃអតីតគណបក្សសង្គ្រោះជាតិ គឺសំដៅមុតស្រួចក្នុងន័យបំបែកបំបាក់ផ្ទៃក្នុងគណបក្សប្រជាជនកម្ពុជា ដែលលោកអះអាងថាកំពុងប្រកាន់ខ្ជាប់ខ្ជួននូវសាមគ្គីផ្ទៃក្នុងយ៉ាងរឹងមាំ។
ដោយឡែក សម្រាប់លោក សួន សូរីដា អតីតតំណាងរាស្ត្រគណបក្សសង្គ្រោះជាតិកូតា លោក កឹម សុខា បានហៅយុទ្ធសាស្ត្របែបនេះរបស់លោក សម រង្ស៊ី ថាមិនអាចទៅរួចនោះឡើយ។ មិនអាចទៅរួចពីព្រោះតែលោកស ខេង ទៅប្រទេសបារាំង រីឯលោកសម រង្ស៊ីទៅសហរដ្ឋអាមេរិក។
បើតាម លោក សួន សូរីដា ដើម្បីឱ្យយុទ្ធសាស្ត្រនេះល្អមើលជាងនេះ នៅពេលលោកស ខេង ទៅស្រុកបារាំង នោះលោកសម រង្ស៊ី លោក អេង ឆៃអ៊ាង និងលោកស្រី មួរ សុខហួរ ត្រូវប្រញាប់ប្រញាល់ទៅស្រុកបារាំងវិញក្នុងពេលជាមួយគ្នា។
សូមបញ្ជាក់ថា វត្តមានលោក ស ខេង នៅប្រទេសបារាំងចាប់ពីថ្ងៃទី២២ សីហា ដល់ថ្ងៃទី៥ កញ្ញា ត្រូវបានកូនប្រុសរបស់លោកចេញមកបញ្ជាក់ចំៗថាទៅពិនិត្យសុខភាពសុទ្ធសាធ ពុំមានការជួបជាមួយអ្នកនយោបាយណាម្នាក់នោះឡើយ ដែលពីដើមឡើយខុទ្ទកាល័យរបស់ លោក ស ខេង គ្រាន់តែបង្ហើបថាការទៅបារាំងរបស់រដ្ឋមន្ត្រីមហាផ្ទៃរូបនេះគឺមានធុរៈផ្ទាល់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ