សហគមន៍ជនជាតិដើមភាគតិចកួយរកឃើញបទល្មើសព្រៃឈើជាង១០០ ករណីក្នុងដែនជម្រកសត្វព្រៃព្រះរការ
ក្នុងរយៈពេល៣ថ្ងៃ ចាប់ពីថ្ងៃទី១៧ ដល់១៩សីហា បទល្មើសព្រៃឈើជាង ១០០ករណី ដែលភាគច្រើនជាប្រភេទឈើប្រណិតនិងកម្រនៅក្នុងខេត្តព្រះវិហារ ត្រូវបានរកឃើញដោយសហគមន៍ជនជាតិដើមភាពតិច ។ បើតាមសេចក្តីប្រកាសព័ត៌មានរបស់សហគមន៍ជនជាតិដើមភាគតិច នៅថ្ងៃទី២កញ្ញា ចំនុចដែលមានការកាប់បំផ្លាញច្រើនខ្លាំងគឺត្រង់ចំនុចវាលខ្លុងដែលជាតំបន់ព្រៃស្រោង និងពាក់កណ្តាលស្រោង។ តែក្រសួងបរិស្ថានបញ្ជាក់ថា ជាបទល្មើសតូចៗដែលក្រសួងកំពុងបន្តអនុវត្តច្បាប់។
ចុះផ្សាយនៅថ្ងៃ៖
ស្តាប់ - ០២:៣២
បទល្មើសចំនួន១០១ករណីដែលបានរកឃើញនេះ មាននូវប្រភេទឈើដូចជា ឈើទាល ពពេល ស្ទៀង ផ្ដៀក គគី កកោះ ត្រសេក ដួងចែម និងផ្ចឹកឧត្តម ដែលសុទ្ធសឹងតែជាប្រភេទឈើមានតម្លៃ។ ឈើដែលបានរកឃើញ មានមុខកាត់ចាប់ពី ៤០សង់ទីម៉ែត្រ ដល់២៩៥សង់ទីម៉ែត្រ ពោលគឺជិត៣ម៉ែត្រ។ តាមរយៈការចុះអង្កេតឃើញថា មានគោយន្ដដឹកឈើចេញចំនួន១៥គ្រឿង មានទីតាំងសិប្បកម្មកែច្នៃឈើនៅក្នុងភូមិសាស្ត្រឃុំប្រមេរុ១២ទីតាំង និងកន្លែងដែលគេដឹកឈើចេញចូលចំនួនពីរទីតាំង។
បើតាមការចុះអង្កេតរបស់ក្រុមសហគមន៍ជនជាតិដើមភាគតិចកួយឃុំប្រមេរុ ស្រុកត្បែងមានជ័យ ខេត្តព្រះវិហាររយៈពេល២យប់៣ថ្ងៃបានឲ្យដឹងថា ក្រុមជនល្មើសបានធ្វើការដឹកជញ្ជូនឈើយ៉ាងសកម្មទាំងកណ្ដាលថ្ងៃ ដោយពុំខ្លាចញញើតអ្វីឡើយ លើសពីនេះពួកគេក៏បានប្រទះឃើញបន្ទះក្ដារជាច្រើនសន្លឹកដែលគរទុកក្នុងព្រៃផងដែរ។
ក្រោយការរកឃើញបទល្មើសទាំងនេះ សហគមន៍បានបង្ហាញនូវការងឿងឆ្ងល់ចំពោះមុខការបន្តកើនឡើងនៃការកាប់បំផ្លាញព្រៃឈើ ខណៈព្រៃនៅតំបន់នេះបានដាក់បញ្ចូលជាដែនជម្រកសត្វព្រៃ និងស្ថិតក្រោមការថែរក្សាដោយមន្ត្រីឧទ្យានុរក្សតាំងតែពីឆ្នាំ២០១៦មកហើយនោះ។
ពួកគេបានបន្តបង្ហាញការសោកស្ដាយ និងអស់សង្ឃឹមជាខ្លាំងចំពោះការរកឃើញបទល្មើសជាថ្មីនេះ និងទទូចឲ្យមានការស៊ើបអង្កេតជាបន្ទាន់ដើម្បីស្វែងរកអ្នកនៅពីក្រោយខ្នងរឿងនេះយកទៅផ្ដន្ទាទោសតាមច្បាប់។ លើសពីនេះ ក៏មានការស្នើរដល់ក្រសួងបរិស្ថានឲ្យពិចារណាបើកចំហរឲ្យគ្រប់ភាគីពាក់ព័ន្ធអាចចូលរួមការពារព្រៃឈើឡើងវិញផងដែរ។
ជាការឆ្លើយតប លោក នេត្រ ភក្រ្តាអ្នកនាំពាក្យក្រសួងបរិស្ថានបានលើកឡើងថា បទល្មើសធនធានធម្មជាតិទ្រង់ទ្រាយធំនៅតំបន់ការពារធម្មជាតិផ្សេងទៀតលែងកើតមានទៀតហើយ តែនៅមានបទល្មើសទ្រង់ទ្រាយតូចៗកើតឡើងដែលក្រសួងបរិស្ថាន និងសមត្ថកិច្ចពាក់ព័ន្ធបាននិងកំពុងបន្តអនុវត្តច្បាប់ដោយការទទួលខុសត្រូវ។
គួរបញ្ជាក់ថា រយៈពេល ៦ ខែឆ្នាំ២០២១ ពីខែមករាដល់ខែមិថុនា ឆ្នាំ២០២១ មន្ត្រីឧទ្យានុរក្សបានចុះល្បាតនៅក្នុងតំបន់ការពារធម្មជាតិនិងរបៀងអភិរក្សជីវៈចម្រុះសរុបបានចំនួន ១៤.៤២២ លើក ក្នុងនោះបានបង្ក្រាបបទល្មើសធនធានធម្មជាតិបានចំនួន ៤.២៣៨ ករណី។ ក្នុងចំណោមបទល្មើសទាំងនោះ មានការពិន័យអន្តរការណ៍ចំនួន ៥១១ ករណី និងបានចងក្រងសំណុំរឿងបញ្ជូនទៅតុលាការបានចំនួន ៥១៥ ករណី ដែលករណីភាគច្រើនទាក់ទងនឹងការទន្ទ្រានកាន់កាប់ដីព្រៃរដ្ឋក្នុងតំបន់អភិរក្សដោយខុសច្បាប់ ការកាប់បំផ្លាញឈើ ការបរបាញ់សត្វជាដើម។ ទិន្នន័យនេះមានចំនួនប្រហាក់ប្រហែលគ្នាក្នុងរយៈពេលដូចគ្នានៅឆ្នាំ២០២០។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ