អ្នកសម្ដែងខ្មែរទទួលបានពានរង្វាន់ «អ្នកសម្ដែងប្រុសឆ្នើម» ពីមហោស្រពភាពយន្តនៅក្រុង Venice
តារាសម្តែងវ័យក្មេងរបស់កម្ពុជាមួយរូប គឺលោក ឈួន ពិសិដ្ឋ បានក្លាយទៅជាម្ចាស់ពានរង្វាន់តារាឆ្នើម Orizzonti ដែលបានសម្តែងក្នុងខ្សែភាពយន្តមួយឈ្មោះថា ប៊ូឌីង ស។ ខ្សែភាពយន្ត ប៊ូឌីងសនេះ ត្រូវបានជ្រើសរើសយកទៅប្រកួតដង្តើមពានរង្វាន់នៅក្នុងរោងមហោស្រព Venice លើកទី៧៨ ក្នុងប្រទេសអ៊ីតាលី។ លោក ឈួន ពិសិដ្ឋ ម្ចាស់ពានរង្វាន់តារាឆ្នើម Orizzonti បានប្រាប់វិទ្យុបារាំងអន្តរជាតិ RFI នាថ្ងៃអាទិត្យនេះថា ពានរង្វាន់នេះ គឺជាសមិទ្ធផលដ៏ធំសម្រាប់ឆាកជីវិតរបស់លោក ខណៈការសម្តែងខ្សែភាពយន្តមួយនេះ លោកបានជួបប្រទះឧបសគ្គច្រើន រួមទាំងបញ្ហាសុខភាពផងដែរ។
ចុះផ្សាយនៅថ្ងៃ៖
ស្តាប់ - ០១:៤៩
តាមរយៈកិច្ចសម្ភាសន៍តាមទូរស័ព្ទជាមួយវិទ្យុបារាំងអន្តរជាតិ RFI លោក ឈួន ពិសិដ្ឋបានប្រាប់ឱ្យដឹងថា លោកមានក្តីរំភើបខ្លាំងចំពោះពានរង្វាន់មួយនេះ ហើយនេះក៏ជាសមិទ្ធផលមួយដ៏ធំធេងសម្រាប់ដំណើរជីវិតរបស់លោកផងដែរ ខណៈនេះជាពានទី២ហើយដែលប្រទេសកម្ពុជាទទួលបានពីការប្រកួតខ្សែភាពយន្តក្នុងព្រឹត្តិការណ៍អន្តរជាតិ។
បើតាម លោក ឈួន ពិសិដ្ឋ សម្រាប់ពានរង្វាន់ដែលលោកទទួលបានកាលពីយប់ថ្ងៃទី១១ ខែកញ្ញាឆ្នាំ២០២១នេះ មិនមែនជាការលះបង់របស់លោកតែម្នាក់ឯងនោះទេ ពោលគឺមានការចូលរួម និងលះបង់ពីសមាជិកក្រុមការងារទាំងអស់។ ហើយសម្រាប់លោកផ្ទាល់ ទម្រាំទទួលបានជោគជ័យនៅពេលនេះ លោកក៏បានទទួលបានការបណ្តុះបណ្តាលយ៉ាងដិតដល់ពីគ្រូបង្ហាត់ផងដែរ។
សូមជម្រាបថា លោក ឈួន ពិសិដ្ឋ ទទួលបានពានរង្វាន់ «អ្នកសម្ដែងប្រុសឆ្នើម» ពីមហោស្រពភាពយន្តនៅក្រុង Venice តាមរយៈខ្សែភាពយន្តមួយឈ្មោះថា ប៊ូឌីង ស។ ជាខ្សែភាពយន្តរៀបរាប់ជីវិតរបស់តួអង្គសំណាង សម្ដែងដោយ លោក ឈួន ពិសិដ្ឋ។ សំណាងគឺជាក្មេងម្នាក់ទទួលរងសម្ពាធពីគ្រួសារ សង្គម និងការបាត់បង់មិត្តភក្តិជិតស្និទ្ធក្នុងលក្ខខណ្ឌមួយជាក់លាក់។ លោក ឈួន ពិសិដ្ឋបានឱ្យដឹងថា ដើម្បីសម្តែងបានល្អ និងស៊ីចង្វាក់ជាមួយតួសំណាង លោកត្រូវយល់ពីអារម្មណ៍របស់តួ ហើយនៅពេលខ្លះត្រូវហាត់រាំជាដើម។ បន្ថែមពីនេះ ក្នុងអំឡុងពេលថត លោក ឈួន ពិសិដ្ឋប្រាប់ថា លោកក៏មានបញ្ហារបួសជង្គង់ផងដែរ ដែលធ្វើឱ្យការសម្តែងមានភាពរអ៊ាក់រអ៊ួល។ ក៏ប៉ុន្តែទោះមានបញ្ហាយ៉ាងណា លោកត្រូវស៊ូជាមួយបញ្ហាទាំងអស់នេះ ដើម្បីសម្រេចបាននូវលទ្ធផលដល់ក្រុមការងារទាំងអស់គ្នា។
សូមជម្រាបថា ខ្សែភាពយន្តប៊ូឌីង ស នេះត្រូវបានចាក់បញ្ចាំងកាលពីថ្ងៃទី០៧ ខែកញ្ញាកន្លងទៅ នៅក្នុងមហោស្រពភាពយន្តទីក្រុង Venice ។ ខ្សែភាពយន្តដែលផលិតឡើងដោយផលិតកម្ម Anti Archive នៅទីក្រុងភ្នំពេញ និងត្រូវទទួលចែកចាយអន្តរជាតិ ដោយក្រុមហ៊ុន Les Films du Losange International នឹងត្រូវចាក់បញ្ចាំង នៅប្រទេសបារាំង នៅថ្ងៃទី ២១ ធ្នូ ឆ្នាំ ២០២១ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ