លោក ហ៊ុន សែន បង្ហាញជំហរដាច់ណាត់ជាថ្មីមិនចរចានយោបាយជាមួយភាគីជម្លោះណាឡើយ
ពីវេទិកាបើកយុទ្ធនាការ ចាក់វ៉ាក់សាំងបង្ការជំងឺកូវីដ១៩ ជូនកុមារអាយុ៦ឆ្នាំ ដល់១២ឆ្នាំ នៅថ្ងៃទី១៧កញ្ញានេះ លោក ហ៊ុន សែន ប្រមុខបក្សកាន់អំណាច បានបង្ហាញជំហរជាថ្មីយ៉ាងដាច់ណាត់ដោយមិនធ្វើការចរចានយោបាយជាមួយភាគីជម្លោះណាមួយឡើយ។ បើតាមលោក ហ៊ុន សែន កម្ពុជាពេលនេះគ្មានបញ្ហានយោបាយដែលត្រូវដោះស្រាយដោយការចរចាទេ ហើយកម្ពុជាក៏មិនអាចមានកិច្ចព្រមព្រៀងសន្តិភាពក្រុងប៉ារីសជាលើកទី២ដែរ។
ចុះផ្សាយនៅថ្ងៃ៖
ស្តាប់ - ០១:៥១
ការអះអាងម្ដងហើយម្ដងទៀតរបស់លោក ហ៊ុន សែន យ៉ាងដូច្នេះគឺជាការឆ្លើយតបទៅនឹងការលើកឡើងដែលថា វត្តមានរបស់លោកក្នុងវិដេអូZOOMជាមួយមន្ត្រីអតីតបក្សប្រឆាំងជាសញ្ញានៃការចរចា។ បើតាម លោក ហ៊ុន សែន មិនតិចជាង២០ដងឡើយ ដែលលោកបានស្ដាប់កិច្ចសន្ទនានៅក្នុងZOOM រៀបចំឡើងដោយក្រុមមន្ត្រីអតីតបក្សប្រឆាំង។ ដូច្នេះតាមរយៈវត្តមានរបស់លោកក្នុងZOOMថ្មីៗនេះ មិនមែនជារឿងចម្លែក ហើយក៏មិនមែនជាសញ្ញានៃការចរចានយោបាយដែរ។
នៅចំពោះការលេចមុខ ក្នុងកិច្ចសន្ទនាតាមប្រព័ន្ធZOOM ជាមួយក្រុមមន្ត្រីអតីតបក្សប្រឆាំងនេះ លោក ហ៊ុន សែន ក៏បានការពារសកម្មភាពរបស់ខ្លួនថា មិនបានលួចចូលទៅស្ដាប់ការសម្ងាត់ឯកជនរបស់បុគ្គលទេ ប៉ុន្តែកិច្ចពិភាក្សារបស់មន្ត្រីអតីតបក្សប្រឆាំងទៅវិញទេ មានជាប់ព័ន្ធនឹងការពង្រឹងកម្លាំងនៅភ្នំពេញដើម្បីបំផ្លាញជាតិ។
ទោះយ៉ាងណា លោក មាជ សុវណ្ណរ៉ា មន្ត្រីជាន់ខ្ពស់អតីតគណបក្សសង្គ្រោះជាតិ នៅមានសង្ឃឹមថា ការចរចារវាងខ្មែរ និងខ្មែរនៅតែអាចកើតឡើង គ្រាន់តែថាការចរចា ការសន្ទនា ធ្វើឡើងក្នុងរូបភាពណាមួយ ព្រោះបញ្ហានយោបាយគួរតែដោះតាមផ្លូវនយោបាយ។
បើតាម លោក មាជ សុវណ្ណរ៉ា ការបោះដៃចរចា រកភាគីណាមុនមិនថា ភាគីបក្សកាន់អំណាចបោះដៃទៅភាគីប្រឆាំងមុន ឬភាគីប្រឆាំងបោះដៃមករកភាគីបក្សកាន់អំណាចមុន សុទ្ធតែមិនមែនជារឿងអាប់ឱនកិត្តិយស សំខាន់គឺការចរចាត្រូវជឿជាក់ និងឲ្យតម្លៃកុំបំបាក់មុខគ្នា។ លោក មាជ សុវណ្ណរ៉ា មើលឃើញថា លោក ហ៊ុន សែន ចង់បានកាយវិការភាសាទន់ភ្លន់នៅក្នុងកិច្ចចរចានយោបាយ។
នៅក្នុងដំណើរការចរចានយោបាយនៅកម្ពុជាទៀតសោត លោក មាជ សុវណ្ណ ប៉ាន់ស្មានថា ជំហរលោកនាយកដ្ឋមន្ត្រីក៏ទំនងជារើសមធ្យោបាយចរចាមើលទៅលើទម្ងន់របស់តួអង្គអ្នកនយោបាយដែរ។ ជាក់ស្ដែងតួអង្គ លោក កឹម សុខា ដែលសហគមន៍អន្តរជាតិតែងតែទទូចឲ្យមានការដោះលែង ដើម្បីប្ដូរលក្ខខណ្ឌអនុគ្រោះមួយចំនួនដូចជាប្រព័ន្ធអនុគ្រោះពន្ធEBA ឬGSPជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ