ក្រសួងបរិស្ថាន៖ ការធ្លាក់ចុះធនធានគម្របដីព្រៃឈើដោយសារកំណើនប្រជាជន និងតម្រូវការដីកសិកម្ម
ក្រសួងបរិស្ថាន នៅព្រឹកថ្ងៃព្រហស្បតិ៍ទី២៣កញ្ញា បានដាក់ឲ្យប្រើប្រាស់នូវរបាយការណ៍ស្ថានភាពបរិស្ថានលើកទី៤ និងសៀវភៅធនធានគម្របព្រៃឈើកម្ពុជាឆ្នាំ២០១៨។ លោកនេត្រ ភក្រ្តា រដ្ឋលេខាធិការនិងជាអ្នកនាំពាក្យក្រសួងបរិស្ថាន បានវាយតម្លៃពីស្ថានភាពធនធានគម្របព្រៃឈើកម្ពុជានៅឆ្នាំ២០១៨មានការធ្លាក់ចុះជាបន្តបន្ទាប់គិតចាប់ពីឆ្នាំ១៩៦៥មក។ បើតាមអ្នកនាំពាក្យរូបនេះ ការធ្លាក់ចុះនៃធនធានគម្របដីព្រៃឈើកម្ពុជា គឺដោយសារកំណើនប្រជាជន និងតម្រូវការដីកសិកម្ម។
ចុះផ្សាយនៅថ្ងៃ៖
ស្តាប់ - ០២:២៨
គឺនៅក្នុងពិធីដាក់ឲ្យប្រើប្រាស់ជាផ្លូវការនូវរបាយការណ៍ស្ថានភាពបរិស្ថានលើកទី៤ និងសៀវភៅធនធានគម្របព្រៃឈើកម្ពុជាឆ្នាំ២០១៨ លោកនេត្រ ភក្រ្តា អ្នកនាំពាក្យក្រសួងបរិស្ថានបានលើកឡើងថា កាលពីឆ្នាំ១៩៦៥ កម្ពុជាមានប្រជាជនត្រឹមជាង៥លាន៧សែននាក់ប៉ុណ្ណោះ នៅខណៈដែលបច្ចុប្បន្នប្រជាជនសរុបមានចំនួន១៦លាននាក់។ កំណើននៃប្រជាជននេះ បានធ្វើឲ្យបាត់បង់នូវធនធានគម្របដីព្រៃឈើកម្ពុជា ដោយសារតែការតាំងទីលំនៅរស់នៅ។ បើតាមរបាយការណ៍របស់ក្រសួងបរិស្ថាន កម្ពុជាមានផ្ទៃដីធនធានគម្របព្រៃឈើប្រមាណ៧៣.៤% កាលពីឆ្នាំ១៩៦៥ ហើយមកដល់ឆ្នាំ២០១៨ ផ្ទៃដីធនធានគម្របព្រៃឈើបានធ្លាក់ចុះមកត្រឹម ៤៦.៨៦% ឬស្មើនឹង ៨.៥១០.៨០៧ហិកតានៃផ្ទៃដីសរុប។
នៅទន្ទឹមនឹងកំណើនប្រជាជននេះ តម្រូវការដីធ្វើកសិកម្ម ក៏ជាមូលហេតុនៃការធ្លាក់ចុះធនធានគម្របដីព្រៃឈើជាបន្តបន្ទាប់នេះដែរ។ មន្ត្រីជាន់ខ្ពស់នៃក្រសួងបរិស្ថាន បានអះអាងថា ជាង២ទសវត្សរ៍មកនេះផ្ទៃដីគម្របព្រៃឈើជាច្រើន ត្រូវបានបំលែងទៅជាដីកសិកម្ម ព្រមទាំងទទួលការបំពុល។
ទោះយ៉ាងណាក្តី ក្រសួងបរិស្ថានអះអាងថាផ្ទៃដីគម្របព្រៃឈើដែលនៅសេសសល់ប្រមាណជាង៨លានហិកតានេះ ក្រសួងបរិស្ថានបាននិងកំពុងយកចិត្តទុកដាក់អភិរក្ស ហើយទន្ទឹមទៀតសោតក៏ក្រសួងបរិស្ថានបានទាញជាប្រយោជន៍នូវឥណទានកាបូន ចាប់តាំងពីឆ្នាំ២០១៦មក ហើយមកដល់ឆ្នាំ២០២០នេះ កម្ពុជាលក់ឥណទានកាបូនបានជាង១១លានដុល្លារអាមេរិក។ តាមរបាយការណ៍នេះ អ្នកនាំពាក្យរូបនេះ បានវាយតម្លៃថា នេះជាទិន្នន័យមួយដ៏សំខាន់សម្រាប់ការរៀបចំគោលនយោបាយក្នុងវិស័យបរិស្ថាន។ សម្រាប់លោកនេត្រ ភក្រ្តា នេះក៏ជាសក្ខីភាពក្នុងការច្រានចោលទៅលើការលើកឡើងពីសំណាក់ក្រុមអង្គការសង្គមស៊ីវិល ដែលថាកម្ពុជាបានបាត់បង់ព្រៃឈើស្ទើរតែទាំងស្រុង។
សូមបញ្ជាក់ថា នេះក៏មិនមែនជាលើកទី១ដែរ ដែលក្រសួងបរិស្ថានបានចេញផ្សាយនូវលទ្ធផលធនធានគម្របព្រៃឈើ។ ដោយមកដល់ពេលនេះកម្ពុជាបានធ្វើការវាយតម្លៃដីគម្របព្រៃឈើបានចំនួន៨ដងរួចមកហើយ គិតចាប់ពីឆ្នាំ១៩៧៣ ខណៈដែលបច្ចុប្បន្នក្រសួងបរិស្ថានកំពុងវាយតម្លៃធនធានគម្របដីព្រៃឈើនៅឆ្នាំ២០២០ជាបន្ត។
រីឯស្ថានភាពបរិស្ថានវិញ ក្រសួងបានលើកឡើងពីបញ្ហាប្រឈមមួយចំនួនមកពិនិត្យមានជាអាទិ៍គុណភាពខ្យល់ ការប្រែប្រួលអាកាសធាតុ ធនធានទឹកសាបលើដី ធនធានដីនិងគុណភាព បញ្ហាជីវៈចម្រុះ បញ្ហសំណល់ និងបរិស្ថានរួមទាំងសុវត្ថិភាពម្ហូបអាហារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ