ទិវាសិទ្ធិលំនៅឋាន៖ សហគមន៍ក្រីក្រក្នុងទីក្រុងអំពាវនាវឲ្យពន្លឿនការផ្តល់ដំណោះស្រាយ
ប្រជាពលរដ្ឋរស់នៅក្នុងសហគមន៍ក្រីក្រ ក្នុងទីក្រុងបានចេញថ្លែងការណ៍នៅថ្ងៃទី៣តុលាម្សិលមិញ ដោយទទួចឲ្យរដ្ឋាភិបាល និងសាលារាជធានីភ្នំពេញ ពន្លឿនការអភិវឌ្ឍន៍ និងផ្តល់ដំណោះស្រាយដល់ពួកគេ។ ការអំពាវនាវយ៉ាងដូច្នេះ ធ្វើឡើងចំពេលដែលទិវាសិទ្ធិលំនៅឋានពិភពលោកតែងតែត្រូវបានធ្វើឡើងនៅអំឡុងខែតុលានេះ។ សម្រាប់ទីក្រុងភ្នំពេញ សហគមន៍ក្រីក្រនៅតែប្រឈមមុខនឹងការបណ្តេញចេញ ខណៈទីតាំងដែលពួកគេកំពុងរស់នៅមិនទាន់មានប័ណ្ណកម្មសិទ្ធិស្របច្បាប់។
ចុះផ្សាយនៅថ្ងៃ៖
ស្តាប់ - ០២:០៩
គ្រួសារក្រីក្រខ្លះដែលបានអនុញ្ញាតឲ្យរដ្ឋាភិបាលធ្វើការអភិវឌ្ឍនៅតំបន់រស់នៅរបស់ខ្លួន តែនៅមិនទាន់បានប័ណ្ណកម្មសិទ្ធិនៅឡើយ នៅគ្រាដែលប្រជាសហគមន៍ក្រីក្រក្នុងក្រុងដែលរងផលប៉ះពាល់មួយចំនួនទៀត នៅមិនទាន់ទទួលបានការដោះស្រាយសមស្របពីរដ្ឋាភិបាលនៅឡើយដែរ។ នេះបើតាមសេចក្តីថ្លែងការណ៍ចំនួន៣ទំព័ររៀបរាប់ពីផលវិបាករបស់សហគមន៍ក្រីក្រនៅទីក្រុងភ្នំពេញ ដែលចេញក្នុងឱកាសទិវាសិទ្ធិលំនៅឋានពិភពលោកឆ្នាំ២០២១នេះ។
សហគមន៍ចំនួន៣ ដែលអះអាងថា មិនទាន់ទទួលបានការដោះស្រាយសមស្រប គឺ សហគមន៍ព្រែកតាគង់១ មានពលរដ្ឋ១៥គ្រួសាររងផលប៉ះពាល់ពីការអភិវឌ្ឍផ្លូវ៣០ម៉ែត្រ ដែលបានដាក់សំណើសុំដំណោះស្រាយតាំងពីឆ្នាំ២០២០។ សហគមន៍អភិវឌ្ឍថ្មី និងសហគមន៍ភូមិ១៧ ដែលមានពលរដ្ឋប៉ះពាល់៣០គ្រួសារ រស់នៅតាមបណ្តោយផ្លូវរថភ្លើងក្នុងខណ្ឌទួលគោកដែលបានដាក់សំណើសុំដោះស្រាយតាំងពីឆ្នាំ២០១៩។ រីឯសហគមន៍តាតុកនៅសង្កាត់ជើងឯក ដែលបានស្នើដល់អាជ្ញាធរតាំងពី២០១៩ ក្នុងការឃ្វៀលដីចេញពីប្រឡាយ០៣និងសុំធ្វើការអភិវឌ្ឍទៅតាមជម្រើសរបស់ពលរដ្ឋ ក៏នៅមិនទាន់មានដំណោះស្រាយដែរ។
ជុំវិញនឹងកង្វល់នេះ សហគមន៍ក្រីក្រក្នុងទីក្រុងរួមមាន បណ្តាញផ្លូវរថភ្លើង បណ្តាញប្រឡាយ និងបណ្តាញបឹង ទទួចដល់រដ្ឋាភិបាល និងសាលារាជធានីភ្នំពេញពន្លឿនការអភិវឌ្ឍន៍ និងផ្តល់ដំណោះស្រាយសមស្របដល់ពួកគេ។
យ៉ាងណាក៏ដោយនៅក្នុងសេចក្តីថ្លែងការណ៍ដែលមានភ្ជាប់ស្នាមមេដៃប្រជាសហគមន៍រាប់សិបនាក់ផងនោះ បានទទួលស្គាល់ថា ទីក្រុងភ្នំពេញពិតជាមានការអភិវឌ្ឍន៍ និងផ្លាស់ប្តូរគួរឲ្យកត់សំគាល់។ តួយ៉ាង ហេដ្ឋារចនាសម្ព័ន្ធ សំណង់អាគារខ្ពស់ៗ វិស័យសាធារណៈ វិស័យអប់រំ ទាំងរដ្ឋ និងឯកជន រួមទាំងវិស័យសេដ្ឋកិច្ច និងអចលនទ្រព្យជាដើម។ ការអភិវឌ្ឍន៍បែបនេះ សហគមន៍ក្រីក្រអះអាងថា គឺបានផ្តល់ភាពងាយស្រួលតែទៅលើប្រជាជនដែលមានចំណូលខ្ពស់ និងមធ្យមប៉ុណ្ណោះ ប៉ុន្តែសម្រាប់អ្នកមានប្រាក់ចំណូលទាបនៅតែជួបផលលំបាកដដែល ខណៈទីតាំងដែលពួកគេរស់នៅមិនមានប័ណ្ណកម្មសិទ្ធិនៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ