ការគ្មានទីបញ្ចប់នៃកូវីដ-១៩ បង្ខំចិត្តឲ្យរដ្ឋាភិបាលលុបចោលពិធីបុណ្យអុំទូកឆ្នាំនេះ
ពិធីបុណ្យអុំទូកនៅឆ្នាំនេះនឹងត្រូវបានលុបចោលជាថ្មីទៀត ដោយសារភាពមិនប្រាកដប្រជានៃទីបញ្ចប់របស់កូវីដ-១៩។ នេះបើតាម លោក ស ខេង រដ្ឋមន្ត្រីក្រសួងមហាផ្ទៃដែលបានថ្លែងនៅព្រឹកថ្ងៃចន្ទនេះ នៅក្នុងពិធីប្រកាសចូលកាន់តំណែងជាផ្លូវការរបស់លោក សុខ លូ ជាអភិបាលខេត្តបាត់ដំបង។
ចុះផ្សាយនៅថ្ងៃ៖
ស្តាប់ - ០១:៥៨
នេះមិនមែនជាលើកទី១ ដែលព្រះរាជពិធីបុណ្យអុំទូក អកអំបុក និងសំពះព្រះខែ ត្រូវបានលុបចោលទេ។ កាលពីឆ្នាំទៅមិញពិធីបុណ្យជាតិដ៍ធំមួយនេះ ក៏ត្រូវបានលុបចោលដែរ សម្រាប់ការប្រណាំងទូក នៅទីក្រុងភ្នំពេញ នៅក្រោមក្តីបារម្ភពីឆ្លងរាលដាលកូវីដ-១៩។ ហេតុផលកូវីដ-១៩ បានបង្ខំចិត្តឲ្យរដ្ឋាភិបាលសម្រេចលុបចោលពិធីបុណ្យអុំទូកជាថ្មីទៀតនៅឆ្នាំនេះ ។
បើតាម លោក ស ខេង រដ្ឋមន្ត្រីក្រសួងមហាផ្ទៃ បញ្ហាជំងឺកូវីដ-១៩ មិនទាន់ដឹងថានឹងត្រូវបិទបញ្ចប់នៅពេលណានោះទេ ដែលការនេះតម្រូវឱ្យពលរដ្ឋគ្រប់រូបត្រូវចេះសម្របខ្លួនរស់នៅជាមួយស្ថានភាពនេះ តាមវិធានសុខាភិបាល និងការណែនាំរបស់រដ្ឋាភិបាល ដើម្បីទប់ស្កាត់ការចម្លង។
គួរកត់សំគាល់ថា ព្រះរាជពិធីបុណ្យអុំទូក ត្រូវបានលុបចោលរយៈពេល៣ឆ្នាំជាប់ៗគ្នាកាលពីឆ្នាំ២០១១ ក្រោយពីមានហេតុការណ៍រត់ជាន់គ្នានៅកោះពេជ្រ ដែលបណ្ដាលឱ្យមនុស្សជាង៣៥០នាក់ស្លាប់។ ចំណែក នៅឆ្នាំ២០១២ ការលុបចោលពិធីបុណ្យជាតិមួយនេះគឺដោយសារតែការកាន់ទុក្ខនៃការសោយទិវង្គតរបស់ព្រះបរមរតនកោដ្ឋព្រះបាទ នរោត្ដម សីហនុ ខណៈដែលការលុបចោលបុណ្យអុំទូកនៅឆ្នាំ២០១៣ ក្រោមហេតុផលទឹកជំនន់ និងជួនពេលដែលមានបាតុកម្មរ៉ៃរាំរបស់បក្សប្រឆាំងក្រោយបោះឆ្នោត។
មួយឆ្នាំក្រោយមកពោលក្នុងឆ្នាំ២០១៤ ពិធីបុណ្យអុំទូកត្រូវបានរៀបចំធ្វើឡើងវិញ តែនៅឆ្នាំ២០១៥ ពិធីបុណ្យអុំទូកក៏ត្រូវបានខកខានម្ដងទៀត ដោយសារកម្ពស់ទឹកទន្លេរាក់ពេក មិនអាចអុំទូកបាន។
ទោះបីជាពិធីបុណ្យអុំទូកឆ្នាំនេះ ត្រូវបានលុបចោលក៏ពិតមែន តែបើគ្មានការប្រែប្រួលទេ ប្រតិទិននៃការឈប់សម្រាករយៈពេល៣ថ្ងៃ សម្រាប់ពីធីនេះដែលត្រូវបានកំណត់ពីថ្ងៃទី១៨ដល់២០ ខែវិច្ឆិកាខាងមុខ នឹងនៅតែអនុវត្តន៍ដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ