តេស្តPCR៖ អ្នកឆ្លងកូវីដ-១៩ទាប អ្នកស្លាប់នៅតែច្រើន តែមន្ត្រីថានៅតែទាបជាងប្រទេសដទៃ
ចំនួនអ្នកស្លាប់ប្រចាំថ្ងៃដោយសារជំងឺកូវីដ-១៩នៅកម្ពុជា នៅតែត្រូវគេមើលឃើញថា ជាចំនួនមួយដ៏ច្រើន ធៀបទៅនឹងករណីឆ្លងថ្មីនៃជំងឺនេះ ដែលត្រូវបានរកឃើញដោយការធ្វើតេស្តបច្ចេកវិទ្យាម៉ាស៊ីន PCR។ក៏ប៉ុន្តែ មន្ត្រីជាន់ខ្ពស់ក្រសួងសុខាភិបាល បានបញ្ជាក់ថា បើពិនិត្យមើលជាភាគរយ និងធៀបទៅនឹងបណ្តាប្រទេសផ្សេងទៀត អត្រាមរណភាពដោយសារកូវីដ-១៩ នៅកម្ពុជា នៅទាបនៅឡើយ។
ចុះផ្សាយនៅថ្ងៃ៖
ស្តាប់ - ០២:០៦
អស់រយៈពេលកន្លះខែកន្លងទៅនេះ ការរកឃើញអ្នកឆ្លងថ្មីនៃជំងឺកូវីដ-១៩ ប្រចាំថ្ងៃនៅក្នុងប្រទេសកម្ពុជា ត្រូវបានបង្ហាញតាមរយៈការធ្វើតេស្ត PCRថា នៅក្នុងរង្វង់ជាង២០០នាក់ប៉ុណ្ណោះ ក្នុងនោះការឆ្លងសហគមន៍នៅតែមានតួលេខខ្ពស់ជាងករណីនាំចូល។ ជាក់ស្តែងនៅថ្ងៃទី១៤ ខែតុលានេះ អ្នកឆ្លងកូវីដ-១៩ មានចំនួន ២៦៨នាក់ (តេស្ត PCR) ជាសះស្បើយ ៣៥៩នាក់ ក៏ប៉ុន្តែអ្នកស្លាប់មានរហូតដល់ ២៥នាក់ឯណោះ។
ការស្លាប់ដោយសារកូវីដ-១៩ ប្រចាំថ្ងៃក្នុងអត្រាមួយពីជាង ១០នាក់ ទៅជាង២០នាក់ ក្នុងមួយថ្ងៃ ត្រូវបានគេមើលឃើញថាជាមរណភាពមួយគួរឲ្យព្រួយបារម្ភនៅឡើយ ខណៈកម្ពុជាកំពុងធ្វើតេស្តរៀបចំដំណើរការបើកប្រទេសឡើងវិញ លើគ្រប់វិស័យ។
ក៏ប៉ុន្តែការស្លាប់ដោយសារជំងឺកូវីដ-១៩ប្រចាំថ្ងៃរបស់ប្រទេសកម្ពុជានៅពេលនេះ ត្រូវបានលោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាលបញ្ជាក់ថា អត្រានៃការស្លាប់ដោយកូវីដ-១៩ របស់កម្ពុជា នៅក្នុងកំរិតមួយទាបនៅឡើយ ដោយលោកស្រីពន្យល់ថា គេត្រូវមើលទៅលើអត្រាជាភាគរយ ជាងមើលទៅលើតែបរិមាណ ខណៈដែលអំឡុងពេលនេះ មានអ្នកស្លាប់ដោយសារជំងឺដទៃទៀត ក៏ច្រើនដែរ ក៏ប៉ុន្តែមិនមានបញ្ចេញតួលេខ។
សូមបញ្ជាក់ថាគិតមកត្រឹមព្រឹក ថ្ងៃទី១៤ ខែតុលា ឆ្នាំ២០២១ អ្នកឆ្លងជំងឺកូវីដ-១៩ សរុបនៅកម្ពុជាមានចំនួន ១១៥ ៨៧៥នាក់ ជាសះស្បើយ ១០៩ ៦៥៥នាក់ និងស្លាប់សរុប ២ ៥៨៤នាក់។ ធៀបទៅនឹងប្រទេសជិតខាង កម្ពុជាក៏មានអត្រានៃការឆ្លង និងការស្លាប់នៅក្នុងកំរិតមួយទាបជាងគេដែរ ដោយគិតមកត្រឹមថ្ងៃទី១៣ខែតុលា ប្រទេសវៀតណាម មានអ្នកឆ្លងសរុបជាង៨៤ម៉ឺននាក់ ស្លាប់ជាង២ម៉ឺននាក់ ហើយប្រទេសថៃមានអ្នកឆ្លងសរុបជាង១,៧លាននាក់ ស្លាប់ជិត ១ ៨០០នាក់ និងប្រទេសឡាវមានអ្នកឆ្លងជិត៣ពាន់នាក់ និងស្លាប់តែ ៣៥នាក់ប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ