លីកាដូ៖ ពីរឆ្នាំនៃការរីករាលដាលកូវីដ-១៩ ការរំលោភយកដីធ្លីនៅកម្ពុជា មិនមានសញ្ញាថមថយ
នៅថ្ងៃទី២០ ខែតុលាខាងមុខនេះ អង្គការក្រៅរដ្ឋាភិបាលមួយចំនួន នឹងរៀបចំទិវាសិទ្ធិលំនៅឋានពិភពលោកឆ្នាំ២០២១ តាមអនឡាញ។ ពីរថ្ងៃមុនការរៀបចំពិធី អង្គការលីកាដូ នៅថ្ងៃទី១៧តុលាម្សិលមិញ បានចេញផ្សាយវីដេអូខ្លីដោយបង្ហាញថា ពីរឆ្នាំចុងក្រោយ អំឡុងពេលរីករាលដាលនៃជំងឺកូវីដ-១៩ ការរំលោភយកដីធ្លីនៅក្នុងប្រទេសកម្ពុជា មិនមានសញ្ញាថមថយនោះទេ។ មិនត្រឹមតែមិនថមថយ ការចាប់ខ្លួន និងឃុំខ្លួនដាក់ពន្ធនាគារ នៃសមាជិកសហគមន៍ និងសកម្មជនដីធ្លី កាន់តែមានការកើនឡើង។ នេះបើតាមអង្គការលីកាដូដដែល។
ចុះផ្សាយនៅថ្ងៃ៖
ស្តាប់ - ០២:០៨
នៅក្នុងវីដេអូដែលចេញផ្សាយដោយអង្គការលីកាដូ ពលរដ្ឋរងគ្រោះមួយចំនួនលើកឡើងថា ពេលគ្មានដីធ្វើកសិកម្មស្មើនឹងការបាត់ឆ្នាំងបាយ។ ចំណែកបុរសម្នាក់ទៀត អះអាងថា ពេលតវ៉ារឿងដីធ្លីបង្ហាញថា អាជ្ញាធរគ្មានការគោរពសិទ្ធិពលរដ្ឋសិទ្ធិមនុស្សសោះឡើយ ដោយរំលោភយកដីប្រជាពលរដ្ឋហើយ ចាប់ម្ចាស់ដីដាក់ពន្ធនាគារទៀត។ បន្ទាប់មកទៅគំរាមដល់ផ្ទះព្រមានឲ្យបញ្ឈប់ធ្វើតាមទាមទារតវ៉ាក្នុងរឿងរ៉ាវដីធ្លីនេះទៀត។
បន្ថែមលើនេះ លីកាដូបានលើកបង្ហាញទៀតថា ប្រជាពលរដ្ឋប្រមាណជាង ៥.០០០ គ្រួសារទទួលរងផលប៉ះពាល់ពីការរំលោភយកដីធ្លី នៅក្នុងប្រទេសកម្ពុជា អំឡុងពេលរីករាលដាលនៃជំងឺកូវីដ-១៩ ក្នុងរយៈពេលពីរឆ្នាំចុងក្រោយនេះ ហើយគិតត្រឹមខែតុលា សមាជិកសហគមន៍ និងសកម្មជនដីធ្លី យ៉ាងតិចណាស់ចំនួន២១នាក់ ត្រូវបានឃាត់ខ្លួន ដោយក្នុងនោះ១០នាក់ កំពុងជាប់ឃុំក្នុងពន្ធនាគារនៅឡើយ។
ថ្លែងប្រាប់វិទ្យុបារាំងអន្តរជាតិនៅថ្ងៃទី១៨ ខែតុលានេះ លោក អំ សំអាត នាយករងទទួលបន្ទុកកម្មវិធីឃ្លាំមើលនៃអង្គការលីកាដូលើកឡើងថា ការកើនឡើងនៃការចាប់ខ្លួន និងឃុំខ្លួនពលរដ្ឋតវ៉ារឿងរ៉ាវដីធ្លីដោយសារអាជ្ញាធរប្រើប្រាស់លេសអនុវត្តវិធានការសុខាភិបាល ដើម្បីទប់ស្កាត់ការរីករាលដាលការចម្លងវីរុសកូវីដ-១៩។
បើតាមលោក អំ សំអាត ២ឆ្នាំអំឡុងពេលរីករាលដាលនៃជំងឺកូវីដ-១៩ ដែលលីកាដូអះអាងថា ការរំលោភយកដីធ្លីនៅក្នុងប្រទេសកម្ពុជា មិនមានសញ្ញាថមថយនោះ ព្រោះយោងទៅលើហេតុការណ៍ជាក់ស្ដែងមួយចំនួនកើតឡើងរយៈពេលចុងក្រោយដូចជាៈ វិវាទរវាងពលរដ្ឋ និងគម្រោងអភិវឌ្ឍព្រលានយន្តហោះថ្មី ដែលស្ថិតនៅស្រុកកណ្ដាលស្ទឹង ខេត្តកណ្ដាល។
ពីស្រុកស្អាង ខេត្តកណ្ដាលដែរ មានការបាញ់បោះលើពលរដ្ឋម្នាក់ឲ្យរបួស នៅគ្រាដែលពលរដ្ឋលើកគ្នាទៅហាមឃាត់គ្រឿងចក្រឈូសឆាយលើដីធ្លីពួកគាត់ នៅស្រុកអង្គស្នួល ខេត្តកណ្ដាល ថ្ងៃទី០៣ ខែមិថុនា ឆ្នាំ២០២១។ នៅមានរឿងរ៉ាវវិវាទដីធ្លីឈានដល់ការចាប់ខ្លួនមួយចំនួនទៀត ដែលបានកើតឡើងនៅតាមបណ្ដាខេត្តស្វាយរៀង កោះកុង ជាដើម។
តែយ៉ាងណាក៏ដោយជុំវិញការលើកឡើងរបស់អង្គការលីកាដូទាំងប៉ុន្មាន នៅមិនទាន់មានការឆ្លើយតបពីភាគីពាក់ព័ន្ធរបស់រដ្ឋាភិបាលនៅឡើយទេ។ តែកន្លងមករដ្ឋមន្ត្រីក្រសួងមហាផ្ទៃ ទទួលស្គាល់ថា បញ្ហាជម្លោះដីធ្លី នឹងជះឥទ្ធិពលដល់ការបាត់បង់សន្លឹកឆ្នោតរបស់បក្សកាន់អំណាច បើមិនព្យាយាមដោះស្រាយដោយស្មើភាពទេនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ