📣ខួប៣០ឆ្នាំកិច្ចព្រមព្រៀងសនិ្តភាព៖នៅកម្ពុជាមានទាំងការរៀបចំអបអរ និងធ្វើវេទិកាជជែកពិភាក្សាផ្សេងៗគ្នា

ថ្ងៃសៅរ៍​ ទី២៣​ ខែតុលា​ ចុងសប្តាហ៍នេះ ​គឺជាគម្រប់​ខួប៣០ឆ្នាំ​នៃកិច្ចព្រមព្រៀង​សន្តិភាព​ទីក្រុងប៉ារីស​ ២៣ តុលា ​ឆ្នាំ១៩៩១។​ មុនខួប​កិច្ចព្រមព្រៀងនេះចូ​លមកដល់​ គណបក្ស​នយោបាយ​ក៏ដូចជា​អង្គការ​សង្គមស៊ីវិល ​និងស្ថាប័ន​រដ្ឋខ្លះបាន​ និងគ្រោងរៀប​ចំកម្មវិ​ធីប្រារព្ធខួបឆ្នាំ៣០​នៃកិច្ចព្រមព្រៀង​សន្តិភាព​ទីក្រុងប៉ារីស​ ហើយខ្លះទៀត​ក៏គ្រោងរៀបចំ​វេទិកាជជែក​ពិភាក្សាពី​ការអនុវត្ត​តាមកិច្ច​ព្រមព្រៀង​នេះផងដែរ​។

វាយគ្មិនដែលនឹងចូលរួមកិច្ចពិភាក្សាតុលមូលស្ដីអំពី ខួប៣០ឆ្នាំនៃកិច្ចព្រមព្រៀងសន្តិភាពទីក្រុងប៉ារីស © FB/RAC

ដើម្បីជាការអបអរសាទរគម្រប់ខួប៣០ឆ្នាំនៃកិច្ចព្រមព្រៀងសន្តិភាពទីក្រុងប៉ារីស ២៣ តុលា ឆ្នាំ១៩៩១ គណបក្សប្រជាធិបតេយ្យមូលដ្ឋាននៅព្រឹកថ្ងៃព្រហស្បតិ៍នេះ បានរៀបចំវេទិកាជជែកពិភាក្សាមួយតាមអនឡាញជំនួសឱ្យការជួបជុំជជែកពិភាក្សាគ្នាដោយផ្ទាល់។ គណបក្សប្រជាធិបតេយ្យមូលដ្ឋាន បានលើកជជែកពីការឆ្លុះបញ្ចាំងអំពីប្រវត្តិ និងការអនុវត្ត កិច្ចព្រមព្រៀងសន្តិភាពទីក្រុងប៉ារីស ២៣ តុលា ១៩៩១។

បើក្រឡេកទៅមើលក្រុមអតីតបក្សប្រឆាំងនៅខាងក្រៅប្រទេសវិញ គឺពួកគេតែងតែរៀបចំជាព្រឹត្តិការណ៍ និងវេទិកាជជែកពិភាក្សាជាបន្តបន្ទាប់ ជាពិសេស ស្តីពីអនុវត្តកិច្ចព្រមព្រៀងសន្តិភាពប៉ារីសនៅក្នុងរយៈពេល៣០ឆ្នាំកន្លងទៅនេះ។ មិនតែប៉ុណ្ណោះ នៅថ្ងៃទី២៣ ខែតុលា ឆ្នាំ២០២១តែម្តង ពួកគេគ្រោងនឹងរៀបចំបាតុ កម្មមួយនៅក្នុងប្រទេសបារាំង ដើម្បីជាការរំលឹកខួបនៃកិច្ចព្រមព្រៀងសន្តិភាពទីក្រុងបារីសនេះ។

ចំណែក រដ្ឋាភិបាល ក៏ដូចជាគណបក្សប្រជាជនកម្ពុជាវិញ បានបោះពុម្ភក្រដាសប្រាក់៣ម៉ឺនរៀលថ្មី ដើម្បីជាការអបអរសាទរខួប៣០ឆ្នាំនៃកិច្ចព្រមព្រៀងសន្តិភាពទីក្រុងប៉ារីស។ ក្រដាសប្រាក់ថ្មីនេះ គឺមានរំលេចនូវរូបភាពសម្តេច ព្រះនរោត្តម សីហនុ ព្រះបរមរតនកោដ្ឋ និងលោកនាយករដ្ឋមន្រ្តីហ៊ុន សែន ជាស្ថាបនិកសំខាន់នៃកិច្ចព្រមព្រៀងសន្តិភាពទៅក្រុងប៉ារីស ២៣ តុលា ឆ្នាំ១៩៩១។  

ក្រៅពីគណបក្សនយោបាយទាំងនេះ រាជបណ្ឌិត្យសភាកម្ពុជាវិញ ក៏គ្រោងនឹងរៀបចំកិច្ចពិភាក្សាតុមូលស្តីពីខួប៣០ឆ្នាំនៃកិច្ចព្រមព្រៀងសន្តិភាពទីក្រុងប៉ារីសនេះផងដែរ។ វេទិកានេះ នឹងធ្វើឡើងនៅព្រឹកថ្ងៃសុក្រដោ​យរាជបណ្ឌិត្យសភាកម្ពុជាបានហៅអ្នកនយោ​បាយ អ្នកជំនាញវិទ្យាសាស្រ្តនយោបាយ អ្នកវិភាគនយោ​បាយ និងអង្គការស៊ីវិលសង្គម ដើម្បីធ្វើជាវាគ្មិនបើកការជជែកពិភាក្សាបញ្ហាកិច្ចព្រមព្រៀងសន្តិភាពទីក្រុងប៉ារីស។

ដោយឡែក ក្រុមអង្គការសង្គមស៊ីវិលនៅកម្ពុជាក៏មានកម្មវិធីរបស់សម្រាប់រំលឹកខួប៣០ឆ្នាំនៃកិច្ចព្រមព្រៀងសន្តិភាពទីក្រុងប៉ារីសនេះដែរ។ អង្គការសង្គមស៊ីវិលចំនួន២៩ស្ថាប័ននឹងរៀបចំកម្មវិធីជជែកពិភាក្សាពីភាពចាំបាច់នៃការអនុវត្តកិច្ចព្រមព្រៀងសន្តិភាពទីក្រុងប៉ារីសសម្រាប់កម្ពុជាឱ្យបានពេញលេញ។ កម្មវិធីនេះ នឹងធ្វើឡើងនៅព្រឹកថ្ងៃសៅរ៍ ទី២៣ ខែតុលា និងធ្វើឡើងតាមកម្មវិធីZoom និងមានការផ្សាយផ្ទាល់នៅលើហ្វេសប៊ុករបស់អង្គការ CamboJa៕