ថៃលើកលែងការធ្វើចត្តាឡីស័ក តែកម្ពុជាមិនទាន់ទទួលគោលការណ៍ថាអាចបញ្ជូនពលករត្រលប់ទៅវិញ
កាលពីថ្មីៗនេះប្រទេសថៃបានសម្រេចលើកលែងការធ្វើចត្តាឡីស័ករដល់ប្រជាពលរដ្ឋខ្មែរពេលធ្វើដំណើរចូលទៅកាន់ប្រទេសរបស់ខ្លួន។ តែពីជ្រុងនៃការចំណាកស្រុករបស់ពលករខ្មែរចូលទៅកាន់ប្រទេសថៃវិញ អាជ្ញាធរខេត្តតាមតំបន់ព្រំដែនអះអាងប្រាប់វិទ្យុបារាំងអន្តរជាតិថា កម្ពុជាមិនទាន់ទទួលបានគោលការណ៍អនុញ្ញាតឲ្យពលករខ្មែរត្រលប់ទៅប្រទេសថៃវិញនៅឡើយទេ។
ចុះផ្សាយនៅថ្ងៃ៖
ស្តាប់ - ០១:៣៧
ដោយសារតែកម្ពុជាសម្រេចបានការចាក់វ៉ាក់សាំងកូវីដ១៩ដល់ប្រជាពលរដ្ឋស្ទើរតែស្មើនឹងចំនួនគោលដៅទៅហើយ ទើបធ្វើឲ្យភាគីថៃបានដាក់កម្ពុជារួមនិង៤៤ប្រទេសផ្សេងទៀត ដោយចាំបាច់ត្រូវធ្វើចត្តាឡីស័ក ពេលចូលទៅកាន់ទឹកដីថៃ។
ក៏ប៉ុន្តែការលើកលែងការធ្វើចត្តាឡីស័កនៅមានភាពស្រពិចស្រពិលជុំវិញបញ្ហាចំណាកស្រុករបស់ពលករខ្មែរទៅធ្វើការនៅឯប្រទេសថៃវិញ។ លោកង៉ោ ម៉េងជ្រួន អភិបាលរងខេត្តបន្ទាយមានជ័យបានអះអាងប្រាប់វិទ្យុបារាំងអន្តរជាតិនៅថ្ងៃអាទិត្យនេះថា ភាគីកម្ពុជាពុំធ្លាប់បិទច្រកព្រំដែនណាមួយក្នុងខេត្តបន្ទាយមានជ័យនោះទេ តែភាគីថៃប៉ុណ្ណោះដែលបានអនុវត្តការបិទច្រកព្រំដែននេះ ដើម្បីទប់ស្កាត់ការឆ្លងរាលដាលជំងឺកូវីដ១៩។ ហើយមកដល់ពេលនេះកម្ពុជា ក៏មិនទាន់ទទួលបានគោលការណ៍នៅឡើយទេថា ភាគីថៃអាចបើកទទួលពលករខ្មែរស្របច្បាប់នៅពេលណានោះ ខណៈដែលថៃបានលើកលែងការធ្វើចត្តាឡីស័កទៅហើយនោះ។
រីឯលោកឌី រ៉ាដូ អភិបាលរងខេត្តឧត្តរមានជ័យវិញ បានបញ្ជាក់ឲ្យដឹងដែរថា ច្រកព្រំដែនអន្តរជាតិអូរស្មាច់ក៏នៅមិនទាន់ទទួលបានការណែនាំណាមួយក្នុងការអនុញ្ញាតឲ្យពលករចំណាកស្រុកទៅប្រទេសថៃវិញដើម្បីបំពេញការងារនោះទេ។ ក៏ប៉ុន្តែពេលបច្ចុប្បន្នច្រកអូរស្មាច់នៅបន្តទទួលពលករខ្មែរត្រលប់ចូលមកកម្ពុជាវិញ ចន្លោះពី៣០ទៅ៨០នាក់ក្នុងមួយថ្ងៃ។ នេះបើតាមលោកឌី រ៉ាដូ។
យ៉ាងណាក៏ដោយ ជុំវិញការចំណាកស្រុករបស់ពលករខ្មែរដោយខុសច្បាប់នៅមានសញ្ញាណមួយគួរឲ្យកត់សម្គាល់ក្នុងរយៈពេលប៉ុន្មានខែចុងក្រោយនេះ។ លោកង៉ោ ម៉េងជ្រួន អភិបាលរងខេត្តបន្ទាយមានជ័យ បានបញ្ជាក់បន្ថែមថា មួយរយៈនេះអាជ្ញាធរបង្រ្កាបបានបទល្មើសជួញដូរមនុស្សដោយខុសច្បាប់មួយចំនួន និងកំពុងកសាងសំណុំរឿងដើម្បីបញ្ជូនមេខ្យល់ទៅដាក់ទោសតាមផ្លូវច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ