លោក អេង ហ៊ី៖ អាជ្ញាធរនៅមិនទាន់សិក្សាច្បាស់ពីការយកឈើពីព្រៃធ្វើជាថាមពលខុសច្បាប់តាមរោងចក្រ
ការស្រាវជ្រាវមួយពីសកលវិទ្យាល័យ London បានបង្ហាញថាព្រៃឈើនៅកម្ពុជាត្រូវបានដុតបំផ្លាញដើម្បីយកជាថាមពល សម្រាប់ផ្គង់ផ្គង់នៅក្នុងរោងចក្រផលិតផលម៉ាកល្បីៗរបស់អឺរ៉ុបជាច្រើន។ គណៈកម្មការជាតិដើម្បីទប់ស្កាត់និងបង្ក្រាបបទល្មើសធនធានធម្មជាតិ នៅថ្ងៃអាទិត្យនេះ តាមរយៈវិទ្យុបារាំងអន្តរជាតិបានឆ្លើយតបថា គណៈកម្មការនៅមិនទាន់បានសិក្សាច្បាស់អំពីបញ្ហានេះនៅឡើយ យ៉ាងណាមិញគឺមានបទល្មើសព្រៃឈើជាច្រើនដែលត្រូវបានបង្ក្រាបដោយសមត្ថកិច្ច។
ចុះផ្សាយនៅថ្ងៃ៖
ស្តាប់ - ០១:៣២
ការស្រាវជ្រាវមួយពីមហាវិទ្យាល័យស្រាវជ្រាវសាធារណៈនៃសកលវិទ្យាល័យ London នៅអង់គ្លេស បានបង្ហាញអំពីការបំផ្លិចបំផ្លាញបរិស្ថានដោយរោងចក្រផលិតផលម៉ាកល្បីៗរបស់អ៊ឺរ៉ុបនៅក្នុងប្រទេសកំពុងអភិវឌ្ឍន៍ ក្នុងនោះមានកម្ពុជាផងដែរ។ និងថាមានរោងចក្រ១ក្នុងចំណោមរោងចក្រ៣នៅកម្ពុជា កំពុងប្រើប្រាស់ដើមឈើចេញពីការកាប់ព្រៃធ្វើជាថាមពលផ្គត់ផ្គង់នៅតាមរោងចក្រ។
ក្នុងរបាយការណ៍នោះបង្ហាញទៀតថា ដើមឈើដែលកាប់ចេញពីព្រៃនៅកម្ពុជាត្រូវបានយកទៅប្រើប្រាស់ជាថាមពលខុសច្បាប់នៅតាមរោងចក្រកាត់ដេរផលិតផលម៉ាកល្បីៗរបស់លោកខាងលិច។ ក្រុមហ៊ុនម៉ាកល្បីៗរបស់អ៊ឺរ៉ុបទាំងនោះរួមមាន Lidl, Gap Inc, H&M, Levi- Strauss និង Ralph Lauren ជាដើម។
លោកឧត្តមសេនីយ៍ត្រី អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស និងគណៈកម្មាធិការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិនៅថ្ងៃទី២៤តុលាលើកឡើងថា គណៈកម្មការនៅមិនទាន់បានសិក្សាច្បាស់អំពីការយកឈើពីព្រៃធ្វើជាថាមពលខុសច្បាប់តាមរោងចក្រនៅឡើយ។
អ្នកនាំពាក្យរូបនេះ បន្តថា ករណីកាប់បំផ្លាញព្រៃឈើបានថយចុះជាលំដាប់ ដោយក្នុងនោះ បទល្មើសដែលបង្ក្រាបបានជាបទល្មើសតូចៗប៉ុណ្ណោះ។ តែយ៉ាងណាមិញលោកឧត្តមសេនីយ៍ត្រី អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេសនិងគណៈកម្មាធិការជាតិដើម្បីទប់ស្កាត់និងបង្ក្រាបបទល្មើសធនធានធម្មជាតិថា បទល្មើសព្រៃឈើជាច្រើនត្រូវបានបង្ក្រាបដោយអាជ្ញាធរជាបន្តបន្ទាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ