លោកហ៊ុន សែន អំពាវនាវឱ្យអាមេរិក និងអាស៊ានពង្រឹងទំនាក់ទំនងដោយឈរលើការគោរពអធិបតេយ្យភាព
ជាលើកទី១កាលពីថ្ងៃអង្គារម្សិលមិញនេះ មេដឹកនាំអាស៊ាន រួមទាំងមេដឹកនាំកម្ពុជាផងបានប្រជុំទល់មុខគ្នាតាមអនឡាញជាមួយនឹងប្រធានាធិបតីអាមេរិក លោកចូ បាយដិន។ កិច្ចប្រជុំកំពូលអាស៊ាន-អាមេរិកលើកទី៩នេះ ប្រមុខថ្នាក់ដឹកនាំអាស៊ាន និងអាមេរិក បានលើកបង្ហាញពីការរីកចម្រើននៃភាពជាដៃគូយុទ្ធសាស្ត្ររវាងអាស៊ាន និងអាមេរិក។ ប៉ុន្តែ លោកនាយករដ្ឋមន្រ្តីកម្ពុជាហ៊ុន សែន បានឆ្លៀតអំពាវនាវឱ្យមេដឹកនាំអាស៊ាន-អាមេរិក ពង្រឹងទំនាក់ទំនងបន្ថែម តែត្រូវឈរលើគោលការណ៍គោរពអធិបតេយ្យភាពរវាងគ្នា។
ចុះផ្សាយនៅថ្ងៃ៖
ស្តាប់ - ០២:០៥
គឺនៅចំពោះមុខមេដឹកនាំអាស៊ាន និងប្រធានាធិបតីអាមេរិក លោកនាយករដ្ឋមន្រ្តីកម្ពុជាហ៊ុន សែន បានអំពាវនាវឱ្យមានការពង្រឹង និងពង្រីកទំនាក់ទំនងភាពជាដៃគូ និងកិច្ចសហប្រតិបត្តិការរវាងអាស៊ាន-អាមេរិកលើគ្រប់វិស័យ ជាពិសេស វិស័យសុខាភិបាល ឌីជីថល ដឹកជញ្ជូន និងថាមពលជាដើម។ ប៉ុន្តែ ការពង្រឹង និងពង្រីកទាំងអស់នេះ គឺប្រមុខរដ្ឋាភិបាលកម្ពុជាសុំថា ត្រូវតែឈរលើមូលដ្ឋានគោរពអធិបតេយ្យភាព និងការជួយគ្នាទៅវិញ ដើម្បីឆ្ពោះទៅរកការរីចចម្រើនជាមួយគ្នា។
ចំណែក លោកចូ បាយដិន ប្រធានាធិបតីអាមេរិកវិញ គឺនៅចំពោះមុខមេដឹកនាំអាស៊ាន លោកបានប្រកាសផ្ដល់កញ្ចប់ថវិកាបន្ថែមចំនួន១០២លានដុល្លា ដើម្បីគាំទ្រក្នុងកិច្ចសហប្រតិបត្តិការជាមួយអាស៊ានបន្តទៀត ក្នុងនោះ អាមេរិកនឹងបន្តតួនាទីស្នូលរបស់អាស៊ាននៅក្នុងកិច្ចសហការក្នុងតំបន់ ជាពិសេសក្នុងក្របខណ្ឌអាស៊ីប៉ាស៊ីហ្វិក។ នេះបើតាមលើកឡើងនៅលើទំព័រហ្វេសប៊ុករបស់នាយករដ្ឋមន្រ្តីកម្ពុជា។ លោកចូ បាយដិន ក៏បានអះអាងថា អាមេរិក និងអាស៊ានបានជំរុញនូវកិច្ចសហប្រតិបត្តិការទៅលើវិស័យឌីជីថល និងធ្វើយ៉ាងណាឱ្យអាស៊ានមានសន្តិសុខ និងសន្តិភាព។ នៅឆ្នាំក្រោយ អាស៊ាន និងសហរដ្ឋអាមេរិកនឹងប្រារព្ធខួប ៤៥ឆ្នាំ នៃទំនាក់ទំនងរវាងអាស៊ាន និងអាមេរិក។
ក្រៅពីកិច្ចប្រជុំជាមួយនឹងភាគីអាមេរិកនេះ គឺកាលពីថ្ងៃពុធម្សិលមិញ មេដឹកនាំអាស៊ានមានទាំងមេដឹកនាំកម្ពុជាផងក៏បានប្រជុំដោយឡែកជាមួយភាគីចិនផងដែរ។ នៅចំពោះមុខមេដឹកនាំចិន និងអាស៊ាន លោកនាយករដ្ឋមន្រ្តីហ៊ុន សែន បានរំលេចឡើងពីការជួយរបស់ចិនក្នុងការទប់ស្កាត់ការឆ្លងរាលដាលជំងឺកូវីដ១៩ នៅក្នុងប្រទេសកំពុងអភិវឌ្ឍ រួមទាំងកម្ពុជា។ ជាមួយគ្នានេះ លោកប្រមុខដឹកនាំកម្ពុជាក៏បានប្រកាសគាំទ្រការលើកកម្ពស់ទំនាក់ទំនងអាស៊ាន-ចិន ឱ្យទៅជាដៃគូយុទ្ធសាស្រ្តគ្រប់ជ្រុងជ្រោយ។
សូមបញ្ជាក់ថា កិច្ចកំពូលអាស៊ាននៅ២០២១នេះ គឺធ្វើឡើងតាមប្រព័ន្ធអនឡាញ ដោយសារតែវិបត្តិកូវីដ១៩។ កិច្ចប្រជុំកំពូលនេះ រៀបចំឡើងដោយប្រទេសព្រុយណេ ដោយមានរយៈពេល៣ថ្ងៃជាប់គ្នា គឺចាប់ពីថ្ងៃទី២៦ ខែតុលា រហូតដល់ថ្ងៃទី២៨ ខែតុលា ឆ្នាំ២០២១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ