លោកហ៊ុន សែន ប្រាប់មេដឹកនាំអាស៊ាន និងអាស៊ីបូព៌ាថា កម្ពុជាចង់ឃើញអាស៊ីអាគ្នេយ៍គ្មានអាវុធនុយក្លេអ៊ែរ
មេដឹកនាំកម្ពុជា និងមេដឹកនាំអាស៊ានផ្សេងទៀតកាលពីយប់ថ្ងៃទី២៧ ខែតុលា បានបើកកិច្ចប្រជុំកំពូលជាមួយមេដឹកនាំនៃប្រទេសអាស៊ីបូព៌ា។ កិច្ចប្រជុំកំពូលអាស៊ីបូព៌ាលើកទី១៦នេះ ក៏មានការចូលរួមពីប្រធានអង្គការសុខភាពពិភពលោក និងអង្គការពាណិជ្ជកម្មពិភពលោក។ នៅចំពោះមុខមេដឹកនាំទាំងអស់នេះ លោកនាយករដ្ឋមន្រ្តីកម្ពុជាហ៊ុន សែន បានលើកឡើងថា កម្ពុជាចង់ឃើញតំបន់អាស៊ីអាគ្នេយ៍ជាតំបន់មួយមានសន្តិភាព ដោយគ្មានអាវុធនុយក្លេអ៊ែរឡើយ។
ចុះផ្សាយនៅថ្ងៃ៖
ស្តាប់ - ០២:០៦
«កម្ពុជាប្រាថ្នាចង់ឃើញតំបន់អាស៊ីអាគ្នេយ៍ ជាតំបន់សន្តិភាព ស្ថេរភាព និងគ្មានអាវុធនុយក្លេអ៊ែរ» នេះ គឺជាការគូសបញ្ជាក់របស់ប្រមុខរដ្ឋាភិបាលកម្ពុជានៅចំពោះមុខមេដឹកនាំអាមេរិក ចិន រុស្ស៊ី ឥណ្ឌា ជប៉ុន អូស្រ្តាលី កូរ៉េខាងត្បូង ណូវែល សេឡង់ និងបណ្តាមេដឹកនាំអាស៊ាននៅក្នុងកិច្ចប្រជុំកំពូលអាស៊ីបូព៌ាលើកទី១៦។ កិច្ចប្រជុំនេះក៏ដូចកិច្ចប្រជុំកំពូលដទៃទៀតដែរ គឺបានធ្វើឡើងតាមប្រព័ន្ធអនឡាញដោយសារវិបត្តិកូវីដ១៩។ ជាមួយនឹងការគូសបញ្ជាក់បែបនេះ លោកនាយករដ្ឋមន្រ្តីហ៊ុន សែន ក៏បានអំពាវនាវឱ្យរាល់សេចក្តីផ្តួចផ្តើម និងសម្ព័ន្ធភាពយោធាដែលនឹងត្រូវដាក់ចេញដោយប្រទេសអាស៊ីបូព៌ាគោរពមិត្តភាព ឈរលើការគោរពគ្នា និងផ្តល់ប្រយោជន៍ទៅវិញទៅមក ដើម្បីរក្សាបាននូវសន្តិសុខ និងសន្តិភាពនៅក្នុងតំបន់។
ចំពោះបញ្ហាសន្តិសុខ និងសន្តិភាពនៅក្នុងអាស៊ីអាគ្នេយ៍នេះ មេដឹកនាំសំខាន់ៗនៃប្រទេសអាស៊ីបូព៌ាបានប្រកាសគាំទ្រនូវតួនាទីស្នូលរបស់អាស៊ាន ដើម្បីរក្សាសន្តិភាព ស្ថិរភាព និងសន្តិសុខក្នុងតំបន់នេះ និងគាំទ្រតួនាទីស្នូលរបស់អាស៊ាននៅក្នុងការជំរុញកិច្ចសហប្រតិបត្តិការរវាងគ្នា និងគ្នា។ មិនតែប៉ុណ្ណោះ មេដឹកនាំទាំងនេះក៏បានផ្ដល់នូវការគាំទ្រ និងជំនួយដល់អាស៊ាន ជាពិសេស នៅក្នុងការងារបន្តទៀតធ្វើយ៉ាងណាឲ្យទទួលបានជោគជ័យនឹងការប្រយុទ្ធប្រឆាំងនឹងកូវីដ១៩នេះ និងការស្ដារឡើងវិញនូវសេដ្ឋកិច្ចក្រោយវិបត្តិកូវីដ១៩។
ពាក់ព័ន្ធនឹងបញ្ហាកូវីដ១៩នេះ ប្រមុខដឹកនាំកម្ពុជា បានអះអាងថា ប្រទេសទាំងអស់ត្រូវរួបរួមគ្នាជាធ្លុងមួយ ដើម្បីប្រយុទ្ធប្រឆាំងនឹងជំងឺរាតត្បាតដ៏សាហាវនេះ។ ប៉ុន្តែ លោកហ៊ុន សែន ក៏បានគូសបញ្ជាក់ដែរថា ប្រទេសទាំងអស់មិនត្រូវប្រកាន់និន្នាការនយោបាយ និងមិនត្រូវយកការប្រយុទ្ធប្រឆាំងនឹងជំងឺកូវីដ១៩ធ្វើជារបៀបវារៈនយោបាយឡើយ។ ដោយឡែក ទាក់ទងនឹងថ្នាំព្យាបាល និងវ៉ាក់សាំងបង្ការជំងឺកូវីដ១៩វិញ លោកនាយករដ្ឋមន្រ្តីហ៊ុន សែន ក៏បានអំពាវនាវឱ្យមានបែងចែក និងចែកចាយប្រកបដោយសមធម៌ និងមានតម្លៃសមរម្យ និងទាន់ពេលវេលាសម្រាប់ប្រទេសនៅក្នុងតំបន់អាស៊ីអាគ្នេយ៍នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ