CYN រកឃើញការសាងសង់លំនៅដ្ឋានលើដីព្រៃដោយខុសច្បាប់ជាង១០០ករណីនៅខេត្តក្រចេះ
សមាគមបណ្តាញយុវជនកម្ពុជា (CYN) បានរកឃើញការសាងសង់លំនៅដ្ឋានដោយខុសច្បាប់ ចំនួន១៤៣ករណី និងការបន្តទន្ទ្រានដីព្រៃសហគមន៍ នៅក្នុងសហគមន៍ព្រៃឈើភ្នំមួយកន្លែងក្នុងខេត្តក្រចេះ។ សម្រាប់សមាគមបណ្តាញយុវជនកម្ពុជា នេះគឺជាការគំរាមកំហែងយ៉ាងធ្ងន់ធ្ងរដល់អនាគតព្រៃសហគមន៍ ខណៈដែលអាជ្ញាធរថាមិនទាន់បានទទួលរបាយការណ៍។
ចុះផ្សាយនៅថ្ងៃ៖
ស្តាប់ - ០២:១៧
បើតាមសេចក្តីប្រកាសព័ត៌មានរបស់ខ្លួន កាលពីថ្ងៃទី០១វិច្ឆិកា សមាគមបណ្តាញយុវជនកម្ពុជាបានអះអាងថា គិតពីខែកញ្ញាឆ្នាំ២០២០រហូតមកដល់ខែកញ្ញាឆ្នាំ២០២១ សហគមន៍ព្រៃឈើភ្នំសេះ ដែលមានទីតាំងស្ថិតនៅក្នុងភូមិអូរព្រះ ឃុំអូគ្រៀង ស្រុកសំបូរ ខេត្តក្រចេះ កំពុងរងការទន្ទ្រាន ដោយសាងសង់ទៅជាលំនៅដ្ឋាន ខុសច្បាប់ចំនួន ៥៨ករណី ខណៈកាលពីខែកញ្ញា ឆ្នាំ២០២០ ចំនួនលំនៅដ្ឋានខុសច្បាប់ដែលបានសាងសង់នៅក្នុងដីសហគមន៍ព្រៃឈើភ្នំសេះ មានចំនួនតែ៨៥ករណីតែប៉ុណ្ណោះ។ លើសពីនេះ សមាគមអះអាងទៀតថា សកម្មភាពកាប់ទន្រ្ទានយកដីព្រៃសហគមន៍ដើម្បីធ្វើជាចំការចន្ទី និងការលបលួចកាប់បំផ្លាញដើមឈើក៏នៅតែកើតមានឡើងជាបន្តបន្ទាប់ស្ទើររៀងរាល់ថ្ងៃ។
គួរបញ្ជាក់បន្តិចថា កាលពីថ្ងៃទី១២មេសាកន្លងទៅ សមាគមបណ្តាញយុវជនកម្ពុជាធ្លាប់បានចេញផ្សាយនូវរបាយការណ៍នៃការរកឃើញ គម្របព្រៃឈើប្រមាណ១.៣០៣ហិកតាបានបាត់បង់ ព្រមទាំងគម្របព្រៃទំហំ៤៦០.៨ហិកតារងការគំរាមកំហែងធ្ងន់ធ្ងរ។
លោកហេង គឹមហុង ប្រធានកម្មវិធីផ្នែកស្រាវជ្រាវនិងតស៊ូមតិ នៃសមាគមបណ្តាញយុវជនកម្ពុជា បានប្រាប់វិទ្យុបារាំងអន្តរជាតិនៅថ្ងៃនេះថា ក្រោយការចេញផ្សាយរបាយការណ៍របស់សមាគម ភាគីអាជ្ញាធរបានចុះទៅអង្កេតដោយផ្ទាល់ម្តងរួចមកហើយ ក៏ប៉ុន្តែមកដល់ពេលនេះសមាគមបណ្តាញយុវជនកម្ពុជា មិនទាន់ទទួលបានព័ត៌មាននិងជាលទ្ធផលនៃការអន្តរាគមន៍ពីភាគីអាជ្ញាធរណាមួយឡើយ។
ជាការឆ្លើយតប លោកប៉ែន លីណាត អភិបាលរងខេត្តក្រចេះ បានបញ្ជាក់ថា ដីសហគមន៍ព្រៃឈើភ្នំសេះ ជាការកាន់កាប់និងទទួលសិទ្ធិថែទាំដោយសហគមន៍ផ្ទាល់ ហើយសម្រាប់របាយការណ៍ពីការសាងសង់លំនៅដ្ឋានខុសច្បាប់ និងការទន្ទ្រានដីព្រៃនោះ គឺអាជ្ញាធរខេត្តមិនបានទទួលរបាយការណ៍នោះទេ។
តែយ៉ាងណា លោកហេង គឹមហុង អះអាងថាការលើកឡើងរបស់អាជ្ញាធរបែបនេះ ជាការមិនទទួលខុសត្រូវ ព្រោះសមាគមបណ្តាញយុវជនកម្ពុជា បានចេញផ្សាយនូវរបាយការណ៍ស្ថានភាពសហគមន៍ព្រៃឈើភ្នំសេះម្តងរួចទៅហើយ។ សម្រាប់សមាគមបណ្តាញយុវជនកម្ពុជា ការចាត់វិធានការទាន់ពេលវេលាពីអាជ្ញាធរពាក់ព័ន្ធ ជាការសង្រ្គោះសហគមន៍ព្រៃឈើភ្នំសេះនិងសហគមន៍ព្រៃឈើដទៃទៀត កុំឲ្យឈានទៅរកវិនាសកម្មព្រៃសហគមន៍ទាំងមូលនាពេលខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ