អាមេរិកនឹងពិចារណាលទ្ធភាពផ្តល់ជូននូវប្រព័ន្ធអនុគ្រោះទូទៅ(GSP)មកឱ្យកម្ពុជាឡើងវិញ
ក្រសួងរតនាគារសហរដ្ឋអាមេរិកនាពេលថ្មីៗនេះ បានអះអាងតាមរយៈសេចក្តីប្រកាសព័ត៌មានថា ខ្លួននឹងពិចារណាឡើងវិញ ក្នុងការផ្តល់ជូននូវកម្មវិធីប្រព័ន្ធអនុគ្រោះពន្ធ(GSP)មកឱ្យកម្ពុជាសារជាថ្មី។ ការវាយតម្លៃលទ្ធភាពនេះនឹងពិនិត្យដោយតំណាងពាណិជ្ជកម្មសហរដ្ឋអាមេរិកដែលមានការយល់ពីសភាផ្ទាល់។ ជុំវិញការបញ្ជាក់របស់សហរដ្ឋអាមេរិកនេះ លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្មបានអះអាងប្រាប់វិទ្យុបារាំងអន្តរជាតិថា នេះជាសញ្ញាល្អសម្រាប់កម្ពុជា ដែលសរបញ្ជាក់អំពីកិច្ចខិតខំប្រឹងប្រែងរបស់កម្ពុជានាពេលកន្លង។
ចុះផ្សាយនៅថ្ងៃ៖
ស្តាប់ - ០២:២៩
ក្នុងសេចក្តីប្រកាសព័ត៌មានរបស់ក្រសួងរតនាគារសហរដ្ឋអាមេរិកដែលចេញផ្សាយកាលពីថ្ងៃទី១០ វិច្ឆិកា កន្លងទៅអះអាងថា សហរដ្ឋអាមេរិកតាមរយៈតំណាងពាណិជ្ជកម្មរបស់ខ្លួន នឹងធ្វើការវាយតម្លៃនូវសិទ្ធទទួលបានសារជាថ្មីនូវប្រព័ន្ធអនុគ្រោះពន្ធទូទៅមកឱ្យកម្ពុជា។ ជាក់ស្តែង បើតាមក្រសួងរតនាគារសហរដ្ឋអាមេរិក ការវាយតម្លៃពីសិទ្ធទទួលបានប្រព័ន្ធអនុគ្រោះទូទៅ(GSP) បានធ្វើឡើងបន្ទាប់ពីសភាអាមេរិក អនុញ្ញាតឱ្យមានការអនុវត្តនូវកម្មវិធីមួយឈ្មោះថាផលប្រយោជន៍ និងលក្ខណៈវិនិឆ្ឆ័យសិទ្ធទទួលបាននូវកម្មវិធីប្រព័ន្ធអនុគ្រោះពន្ធទូទៅ។
ជាការឆ្លើយតប អ្នកនាំពាក្យក្រសួងពាណិជ្ជកម្ម លោក ប៉ែន សុវិជាតិ បានបញ្ជាក់ប្រាប់វិទ្យុបារាំងអន្តរជាតិថា ការលើកឡើងរបស់សហរដ្ឋអាមេរិកនៅពេលនេះ អាចជាសញ្ញាល្អសម្រាប់កម្ពុជា ខណៈសហរដ្ឋអាមេរិក គឺជាទីផ្សារនាំចេញផលិតផលធំមួយរបស់កម្ពុជា។
បន្ថែមពីនេះ លោកប៉ែន សុវិជាតិបានចាត់ទុកថា ការពិនិត្យលទ្ធភាពផ្តល់ប្រព័ន្ធអនុគ្រោះពន្ធទូទៅGSPមកកម្ពុជា ក៏អាចសរបញ្ជាក់ពីប្រសិទ្ធភាពដែលភាគីកម្ពុជាប្រឹងប្រែងទាមទារឱ្យអាមេរិកពិចារណាក្នុងការផ្តល់ប្រព័ន្ធអនុគ្រោះពន្ធនេះមកវិញ។ ប្រសិទ្ធភាពដែលអ្នកនាំពាក្យរូបនេះបញ្ជាក់ខាងដើមនោះ គឺចង់សំដៅថា កម្ពុជាតែងតែធ្វើការយ៉ាងជិតស្និទ្ធ ជាមួយបណ្តាក្រុមហ៊ុនបញ្ជាទិញមួយចំនួន ដែលមានមូលដ្ឋាននៅសហរដ្ឋអាមេរិក និងបណ្តាប្រទេសដែលធ្លាប់ទទួលបាននូវកម្មវិធីប្រព័ន្ធអនុគ្រោះពន្ធទូទៅ ក្នុងគោលបំណងដាក់ពាក្យស្នើទៅកាន់សភាសហរដ្ឋអាមេរិក ឱ្យពិនិត្យជាថ្មីនូវសំណើរផ្តល់ជូនប្រព័ន្ធអនុគ្រោះពន្ធ(GSP)ដែលហួសសុពលភាពទៅហើយនោះ។
ជារួម បើតាមលោក ប៉ែន សុវិជាតិ កម្ពុជានឹងរំពឹងថា កម្មវិធីប្រព័ន្ធអនុគ្រោះពន្ធទូទៅ(SGP) នឹងអាចផ្តល់មកឱ្យកម្ពុជាឡើងវិញ។ ការរំពឹងនេះត្រូវបាន លោកប៉ែន សុវិជាតិ លើកហេតុផលថា ទំនាក់ទំនងភាពជាដៃគូពាណិជ្ជកម្មរវាងប្រទេសទាំងពីរមានភាពល្អប្រសើរបូករួមនឹងទំហំពាណិជ្ជកម្មមានកំណើនខ្ពស់ពីមួយឆ្នាំទៅមួយឆ្នាំ។ បន្ថែមពីនេះ លោកក៏សម្អាងថា កម្ពុជាបានអនុវត្តយ៉ាងត្រឹមត្រូវចំពោះការប្រើប្រាស់កម្លាំងពលកម្មរបស់នយោជិកដូចជា ការមិនកេងកម្លាំងពលកម្មហួសប្រមាណ ដែលផ្ទុយពីកតិកាសញ្ញារបស់កម្មវិធីប្រព័ន្ធអនុគ្រោះពន្ធទូទៅGSP។
សូមរំលឹកថា កម្មវិធីប្រព័ន្ធអនុគ្រោះពន្ធទូទៅ(GSP)របស់សហរដ្ឋអាមេរិកដែលផ្តល់មកកម្ពុជា ត្រូវបានហួសសុពលភាពកាលពីថ្ងៃទី៣១ ធ្នូ ឆ្នាំ២០២០កន្លងទៅ។ ការហួសសុពលភាពនេះបានប៉ះពាល់ទៅលើអ្នកបញ្ជាទិញដែលតម្រូវឱ្យបង់ពន្ធនាំចូលទៅកាន់សហរដ្ឋអាមេរិក។ ជាក់ស្តែង ក្រោមកម្មវិធីអនុគ្រោះពន្ធទូទៅ(GSP) កម្ពុជា មិនត្រូវបានគិតពន្ធការនាំចូលទំនិញទៅកាន់សហរដ្ឋអាមេរិកប្រមាណ១ពាន់លានដុល្លារផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ