កម្ពុជាចាត់ទុកការដាក់ទណ្ឌកម្មដោយអាមេរិកមកលើមន្ត្រីយោធាថាជាការជ្រៀតជ្រែកកិច្ចការផ្ទៃក្នុង
រដ្ឋាភិបាលកម្ពុជាតាមរយៈក្រសួងការបរទេស និងក្រសួងការពារជាតិ បានចេញសេចក្តីថ្លែងការណ៍ ដោយធ្វើការបដិសេធដាច់អហង្ការចំពោះការប្រកាសដាក់ទណ្ឌកម្មរបស់អាមេរិកមកលើនាយឧត្តមសេនីយ៍កម្ពុជា២រូប។ គឺជាការដាក់ទណ្ឌកម្មក្រោមការចោទប្រកាន់ពាក់ព័ន្ធនឹងអំពើពុករលួយក្នុងការកសាងមូលដ្ឋានកងទ័ពសមុទ្ររាម ។ បើតាមជំហររបស់រដ្ឋាភិបាលកម្ពុជាគឺគ្មានភាពចាំបាច់ក្នុងការស៊ើបអង្កេតលើការចោទប្រកាន់នេះឡើយ។ ផ្ទុយទៅវិញ រដ្ឋាភិបាលកម្ពុជាបានហៅការដាក់ទណ្ឌកម្មជាឯកតោភាគីនេះថា ជាការជ្រៀតជ្រែកកិច្ចការផ្ទៃក្នុងកម្ពុជាទៅវិញទេ។
ចុះផ្សាយនៅថ្ងៃ៖
ស្តាប់ - ០១:៤៩
នៅក្នុងសេចក្តីថ្លែងការណ៍ដោយឡែកពីគ្នានៅថ្ងៃទី១២វិច្ឆិកា ទាំងអ្នកនាំពាក្យក្រសួងការបរទេសកម្ពុជា និងអ្នកនាំពាក្យក្រសួងការពារជាតិកម្ពុជា បានបដិសេធយ៉ាងដាច់អហង្ការ ចំពោះក្រសួងរតនាគារជាតិអាមេរិក ដែលដាក់ទណ្ឌកម្មជាឯកតោភាគី មកលើមន្ត្រីយោធាជាន់ខ្ពស់កម្ពុជា២រូប។
សម្រាប់អ្នកនាំពាក្យក្រសួងការបរទេសកម្ពុជា ការចោទប្រកាន់នេះគឺ «ជាការលាបពណ៌ ហើយមិនត្រឹមតែបំពានលើច្បាប់អន្តរជាតិ និងបទដ្ឋានមូលដ្ឋាននៃទំនាក់ទំនងអន្តរជាតិទេ តែក៏បានបង្ហាញពីការមាក់ងាយទាំងស្រុងដល់ឯករាជ្យភាព និងជាការជ្រៀតជ្រែកកិច្ចការផ្ទៃក្នុងរបស់ប្រទេសផ្សេងទៀតដែរ»។
រីឯអ្នកនាំពាក្យក្រសួងការពារជាតិវិញ បានចាត់ទុកការដាក់ទណ្ឌកម្មនេះថា «ជាកាយវិការខ្វះវិចារណញាណ និងមានលក្ខណៈជាការបង្ករឿងឥតឈប់ឈរ»។
សូមបញ្ជាក់ថា ប្រតិកម្មទាំងនេះ គឺជាការឆ្លើយតបទៅនឹងក្រសួងរតនាគារជាតិអាមេរិក កាលពីថ្ងៃទី ១០ ខែវិច្ឆិកា ដែលបានសម្រេចដាក់ទណ្ឌកម្មលើមន្រ្តីយោធាជាន់ខ្ពស់កម្ពុជា២រូបបន្ថែមទៀត គឺលោកចៅ ភិរុណ អគ្គនាយកនៃអគ្គនាយកដ្ឋានសម្ភារបច្ចេកទេសនៃក្រសួងការពារជាតិ និងលោក ទៀ វិញ មេបញ្ជាការកងទ័ពជើងទឹកកម្ពុជា។ ទម្ងន់នៃទណ្ឌកម្មនេះគឺមិនឲ្យឧត្តមសេនីយ៍ទាំង២រូបនេះចូលទឹកដីអាមេរិក និងបង្កកទ្រព្យសម្បត្តិរបស់ពួកគេ បើមានរក្សាទុកនៅអាមេរិក។ ការដាក់ទណ្ឌកម្មនេះគឺអាមេរិកចោទមន្ត្រីយោធា២រូបនេះថា បានប្រើប្រាស់ឥទ្ធិពលនយោបាយ ប្រព្រឹត្តអំពើពុករលួយក្នុងការកសាងមូលដ្ឋានកងទ័ពជើងទឹករាមរបស់កម្ពុជា។ ជាទីដែលសហរដ្ឋអាមេរិកចោទថា កម្ពុជាបានអនុញ្ញាតឲ្យយោធាចិនប្រើប្រាស់ទីតាំងនោះជាមូលដ្ឋានកងទ័ព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ