លោក សម រង្ស៊ី ចេញមុខបដិសេធការចោទប្រកាន់ថាលោកជាអ្នកនៅពីក្រោយគណបក្សបេះដូងជាតិ
នៅទីបំផុត លោក សម រង្ស៊ី បានចេញមុខមកបដិសេធ លើការចោទប្រកាន់ថា លោកនៅពីក្រោយការចង់បង្កើតគណបក្ស«បេះដូងជាតិ»ដែលមានលោក សៀម ភ្លុក ជាអ្នកចេញមុខ។ ការបដិសេធរបស់លោក សម រង្ស៊ី គឺនៅក្រោយពេលដែលក្រសួងមហាផ្ទៃ មិនចុះបញ្ជីឲ្យគណបក្សថ្មីនេះ និងព្រមានប្តឹងទៅតុលាការដោយចោទថា មានការលួចបន្លំស្នាមមេដៃដើម្បីបំពេញលក្ខខណ្ឌចុះឈ្មោះគណបក្សនេះ។
ចុះផ្សាយនៅថ្ងៃ៖
ស្តាប់ - ០២:១៤
តាមរយៈហ្វេសប៊ុកនៅថ្ងៃទី១៤វិច្ឆិកា លោក សម រង្ស៊ី ដែលកំពុងមានវត្តមាននៅលើទឹកដីអាមេរិកបានហៅការចោទប្រកាន់ទាំងនេះថា«មិនទំនងទាល់តែសោះ ពីព្រោះវាមិនស៊ីគ្នាទាល់តែសោះ»។ គឺជាការចោទប្រកាន់អ្នកដែលបានដាក់ពាក្យ ចង់បង្កើតគណបក្សបេះដូងជាតិ ថា«ធ្វើការឲ្យគណបក្សសង្គ្រោះជាតិ ព្រមទាំងបានក្លែងបន្លំស្នាមមេដៃ ដែលបានប្រមូល ដើម្បីបំពេញបែបបទ»។
សូមបញ្ជាក់ថា រដ្ឋមន្ត្រីក្រសួងមហាផ្ទៃកាលពីថ្ងៃទី៨វិច្ឆិកាបានរាយការណ៍ជូនប្រមុខរដ្ឋាភិបាលថា អគ្គស្នងការនគរបាលជាតិបានធ្វើការពិនិត្យ និងកោសល្យវិច័យលើស្នាមមេដៃរបស់សមាជិកគណបក្សបេះដូងជាតិចំនួន៤.៧៨១ស្នាមមេដៃ ប្រុសមាន២.៤៥២ស្នាមមេដៃ និងស្រីចំនួន២.៣២៩ស្នាមមេដៃ។ ប៉ុន្តែ អគ្គស្នងការនគរបាលជាតិ បានរកឃើញថា ស្នាមមេដៃ២០នាក់ខុសពីស្នាមមេដៃក្នុងអត្តសញ្ញាណបណ្ណ ខណៈស្នាមមេដៃចំនួន២០នាក់ផ្តិតលើឈ្មោះបុគ្គល៥៤នាក់ និងស្នាមមេដៃ៧៤នាក់ជាការក្លែងស្នាមមេដៃ។ បន្ថែមលើនេះ ស្នាមមេដៃ២៨៧នាក់ ខូចគុណភាពមិនអាចធ្វើកោសល្យវិច័យបាន និងស្នាមមេដៃមានភាពមិនប្រក្រតីធ្ងន់ធ្ងររបស់បុគ្គល៥នាក់ផ្តិតលើឈ្មោះបុគ្គល២១នាក់។
ប៉ុន្តែសម្រាប់លោក សម រង្ស៊ី បើគណបក្សបេះដូងជាតិ ចេញមកពីគណបក្សសង្គ្រោះជាតិមែន នោះគណបក្សបេះដូងជាតិ មិនពិបាកអ្វីប្រមូលស្នាមមេដៃ ពីអ្នកគាំទ្រចំនួន ៥០០០ នាក់នោះទេ ពីព្រោះគណបក្សសង្គ្រោះជាតិ មានអ្នកគាំទ្រយ៉ាងតិច ៣ លាននាក់ ដូចបានឃើញ ក្នុងការបោះឆ្នោតឆ្នាំ ២០១៣ និង ២០១៧។
យ៉ាងណាក៏ដោយ រដ្ឋមន្រ្តីក្រសួងមហាផ្ទៃបានអះអាងថា ក្រសួងមហាផ្ទៃនឹងចាត់ឱ្យអាជ្ញាធរស្រាវជ្រាវលើការក្លែងបន្លំស្នាមមេដៃនេះ រីឯតំណាងស្ថាបនិកនឹងត្រូវប្តឹងទៅតុលាការដើម្បីចាត់វិធានការទៅតាមផ្លូវច្បាប់។
ប៉ុន្តែលោក សៀម ភ្លុក ដែលចេញមុខជាតំណាងគណបក្សបេះដូងជាតិ បានអះអាងថា លោកនឹងមិនរត់ទៅណាទេគឺនៅឈរតតាំងតាមផ្លូវច្បាប់ ដោយសំអាងថា ច្បាប់ស្តីពីគណបក្សនយោបាយ មិនមានទោសព្រហ្មទណ្ឌក្នុងការសុំបង្កើតបក្សនយោបាយនោះឡើយ។ ប៉ុន្តែប្រសិនបើក្រសួងមហាផ្ទៃ បង្វែរការសុំបង្កើតគណបក្សនយោបាយទៅជារឿងព្រហ្មទណ្ឌវិញលោកក៏មិនមានយោបល់ដែរ។
បើតាម លោក សៀម ភ្លុក លោកនៅមិនទាន់ទទួលបានលិខិតផ្លូវការពីក្រសួងមហាផ្ទៃដែលបដិសេធចុះបញ្ជីគណបក្សបេះដូងជាតិនៅឡើយ ហើយថាអ្វីដែលបានលេចឭកន្លងមក គឺគ្រាន់តែជាលិខិតបែកធ្លាយប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ