មន្ត្រីក្រសួងមហាផ្ទៃអំពាវនាវដល់ពលរដ្ឋកុំឆ្លងដែនទៅរកការងារនៅថៃទាំងប្រថុយប្រថាន
ខណៈពលរដ្ឋខ្មែរជាក្រុមៗបាននាំគ្នាចេញទៅរកការងារធ្វើនៅប្រទេសថៃ រាប់ចាប់តាំងពីចុងខែតុលាមកដល់ឥលូវ រដ្ឋលេខាធិការក្រសួងមហាផ្ទៃ នៅថ្ងៃទី១៧វិច្ឆិកានេះបានអំពាវនាវឲ្យពួកគេរងចាំបន្តិចសិន កុំឆ្លងដែនទាំងប្រថុយប្រថានក្នុងដំណាក់កាលមិនច្បាស់លាស់នៃវិបត្តិកូវីដ១៩។ បើតាមមន្ត្រី ដដែលក្រសួងពាក់ព័ន្ធកំពុងរកដំណោះស្រាយលៃលកធ្វើយ៉ាងណាឲ្យពលករទទួលបានភាពសមធម៌ រវាងប្រទេសបញ្ជូននិងប្រទេសទទួលក្នុងដំណាក់កាលថ្មី។
ចុះផ្សាយនៅថ្ងៃ៖
ស្តាប់ - ០២:២១
ពលករខ្មែរដែលនាំគ្នាចេញទៅរកការងារធ្វើនៅប្រទេសថៃតាមច្រកព្រំដែន មិនក្រោម២០នាក់ឡើយនៅរៀងរាល់ថ្ងៃ ត្រូវបានអាជ្ញាធរខ្មែរប្រចាំការនៅព្រំដែនចាប់បញ្ជូនត្រឡប់មកវិញ ដែលគិតជាសរុបប្រមាណជា១ពាន់នាក់បានកត់ត្រាក្នុងបញ្ជីនៃការបញ្ជូនត្រឡប់មកវិញ រាប់ចាប់តាំងពីចុងខែតុលាមកដល់ឥលូវ។ តែក៏នៅមានអ្នកដែលរបូតទៅដល់ដីថៃបានសម្រេចដែរ ប៉ុន្តែមិនមានចំនួនច្រើនទេ។ ថ្លែងប្រាប់វិទ្យុបារាំងអន្តរជាតិនៅថ្ងៃពុធទី១៧វិច្ឆិកានេះ លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្រៃ្តយ៍នៃគណៈកម្មាធិការប្រយុទ្ធប្រឆាំងអំពើជួញដូរមនុស្សបានគូសបញ្ជាក់ថាទោះជាពលករខ្មែរមួយចំនួនទៅដល់ដីថៃ ក៏គង់តែអាជ្ញាធរថៃចាប់បញ្ជូនត្រឡបមកវិញដដែលទេ។
លោកស្រីបន្ថែមថា ដំណាក់កាលនេះមិនមែនជាពេលវេលា ដែលពលរដ្ឋត្រូវសម្រុកចេញទៅធ្វើការនៅថៃដោយខុសច្បាប់ និងប្រថុយប្រថានអ៊ីចឹងទេ! ព្រោះត្រូវចំណាយលុយក្រៅផ្លូវការកាន់ច្រើនពេលទៅដល់ប្រទេសថៃ។ នៅពេលដែលពលករខំប្រឹងជម្នះទៅធ្វើការនៅប្រទេសថៃដោយខុសច្បាប់ពួកគេនឹងជួបបទពិសោធន៍ចាស់ដដែលដោយបន្តធ្វើជាកម្មករថៃរហូតតដល់កូន ដើម្បីទូទាត់ថ្លៃបំណុលរបស់ឱពុក-ម្ដាយ ដែលបានជំពាក់តាមរយៈការចំណាយលុយក្រៅផ្លូវការជាថ្នូរនឹងការបានការងារនៅស្រុកគេ។ នេះជាកង្វល់របស់លោកស្រី ជូរ ប៊ុនអេង ។
ដូចគ្នាដែរ លោក លឹង សុផុន មន្ត្រីសិទ្ធិការងារទទួលបន្ទុកផ្នែកពលករចំណាកស្រុករបស់អង្គការសង់ត្រាល់ ប្រចាំប្រទេសថៃ បានថ្លែងថា ការបន្តវិលចូលប្រទេសថៃ នៅគ្រានេះ មិនមែនជារឿងងាយស្រួលឡើយ ពីព្រោះពលករខ្មែរត្រូវចំណាយលុយក្រៅផ្លូវការកាន់ច្រើន។ ម្យ៉ាងទៀតលោកថានៅប្រទេសថៃគ្រានេះ ការរស់នៅ និងធ្វើការមិនមានសេរីភាពដូចមុនឡើយ។
ដូច្នេះហើយទើបលោកស្រីស្នើឲ្យពលករខ្មែររងចាំបន្តិចសិន ដើម្បីទទួលបានសិទ្ធិជាពលករស្របច្បាប់ព្រោះបើតាមលោកស្រី ថៃនិងកម្ពុជាកំពុងធ្វើការរួមគ្នាលើបញ្ហានេះ ក្នុងដំណាក់កាលថ្មីលៃលកធ្វើយ៉ាងណាឲ្យពលករទទួលបានភាពសមធម៌ រវាងប្រទេសបញ្ជូននិងប្រទេសទទួល។ អំឡុងពេលរងចាំ រដ្ឋាភិបាលកម្ពុជាក៏មិនបានឱបដៃឈរមើលភាពខ្វះខាតរបស់ពលករខ្មែរដែរតាមរយៈជំនួយសង្គមក្រោយពួកគេទៅដល់ភូមិកំណើត។ បើតាមមន្ត្រីជាន់ខ្ពស់ក្រសួងមហាផ្ទៃរូបនេះរាប់ចាប់តាំងពីដើមឆ្នាំ២០២០មកដល់ជិតដំណាច់ឆ្នាំ២០២១នេះមានពលករខ្មែរប្រមាណ២៦ម៉ឺននាក់បានបញ្ជូនមកដល់ដីកម្ពុជា។ ចាប់តាំងពីពេលនោះមកដល់ពេលបច្ចុប្បន្នក៏ព្រំដែនកម្ពុជាថៃនៅតាមបណ្ដាខេត្តមួយចំនួនបើកទ្វារអនុញ្ញាត្តឲ្យពលរដ្ឋចេញចូលរកការធ្វើដូចគ្រាមុនដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ