ជនជាតិដើមភាគតិច៨គ្រួសារ ក្នុងស្រុកអូររាំង កំពុងដាក់ញ្ញាតិស្វែងរកកិច្ចអន្តរាគមន៍ ក្រោយអះអាងថា អាជ្ញាធររំលោភយកដីធ្លី
ក្រុមជនជាតិដើមភាគតិចចំនួន៨គ្រួសារកំពុងដាក់ញ្ញាតិមកក្រសួងដែនដី ក្រសួងមហាផ្ទៃ និងទីស្តីការគណៈរដ្ឋមន្ត្រីនៅព្រឹកថ្ងៃទី២៣ វិច្ឆិកានេះ ដើម្បីស្វែងរកកិច្ចអន្តរាគមន៍លើបញ្ហាដីធ្លី ក្រោយពួកគេអះអាងថា អភិបាលស្រុកអូររាំងនិងជនខិលខូចបានរំលោភយកដីធ្លីរបស់ពួកគេ។ ជុំវិញបញ្ហានេះ លោក ម្លូស តេន ជាពលរដ្ឋរងគ្រោះបានបញ្ជាក់ប្រាប់វិទ្យុបារាំងអន្តរជាតិRFIថា ការសម្រេចដាក់ញ្ញាតិនៅពេលនេះ ក្រោយអាជ្ញាធរនិងមន្ត្រីពាក់ព័ន្ធក្នុងខេត្តមិនបានជួយស្វែងរកដំណោះស្រាយតាមច្បាប់ និងយុត្តិធម៌ជូនពួកគេនោះទេ។
ចុះផ្សាយនៅថ្ងៃ៖
«ខ្ញុំចង់ឱ្យសម្តេច និងមន្ត្រីពាក់ព័ន្ធមានដំណោះស្រាយជូនពួកខ្ញុំដែលជាជនជាតិដើមភាគតិចរងគ្រោះលើបញ្ហាដីធ្លី» នេះជាការលើកឡើងរបស់លោក ម្លូស តេននៅព្រឹកថ្ងៃទី២៣ វិច្ឆិកានេះ។ លោក ម្លូស តេន ជាពលរដ្ឋរងផលប៉ះពាល់មួយរូបក្នុងចំណោមពលរដ្ឋជនជាតិដើមភាគតិចចំនួន៧គ្រួសារផ្សេងទៀត ដែលត្រូវកំពុងឡើងមកដាក់ញ្ញាតិ្តនៅឯក្រសួងមហាផ្ទៃ ក្រសួងដែនដីនគរូបនីយកម្មនិងសំណង់ និងទីស្តីការគណៈរដ្ឋមន្ត្រី។
គិតត្រឹមព្រឹកថ្ងៃទី២៣នេះ ពលរដ្ឋរងគ្រោះបានដាក់ញ្ញាតិចំនួនពីរកន្លែងហើយ ដោយទី១ គឺក្រសួងដែនដី នគរូបនីយកម្មនិងសំណង់ និងទីស្តីការគណៈរដ្ឋមន្ត្រី។ ការសម្រេចឡើងមកដាក់ញ្ញាតិនេះ ក្រោយពលរដ្ឋទាំង៨គ្រួសារចោទថា អភិបាលស្រុកអូររាំងលោក សៀក មុន្នី និងជនខិលខូចមួយចំនួនបានឃុបឃិតគ្នារំលោភយកដីធ្លី និងបានលួចធ្វើប្លង់លើដីចំនួន៤.២ហិកតា ស្ថិតក្នុងភូមិពូវ៉ាង ឃុំសែនមនោរម្យ ស្រុកអូររាំង ខេត្តមណ្ឌលគិរី
បើតាម តំណាងពលរដ្ឋខាងដើម ពលរដ្ឋរងផលប៉ះពាល់ចំនួន៨គ្រួសារ បានកាន់កាប់និងអាស្រ័យផលជាក់ស្តែងលើដីនេះចាប់តាំងពីឆ្នាំ១៩៩៧ ពោលគឺមានរយៈពេល២៣ឆ្នាំមកហើយ និងបានដាំដំណាំកសិផលជាច្រើនមុខលើដីនោះផងដែរ។ ប៉ុន្តែក្នុងឆ្នាំ២០២០ អភិបាលស្រុកអូរាំង និងបុគ្គលផ្សេងទៀតបានធ្វើប្លង់ដោយសម្ងាត់ និងបានចុះបញ្ជីដីនោះទៅជាប្រព័ន្ធក្នុងស្រុកអូររាំង។ នេះបើតាមលោក តេន។ ក្នុងនោះ លោក ម្លូស តេនបន្តថា ក្រោយពិនិត្យឃើញថា ដីធ្លីរបស់ពួកគេត្រូវបានចុះបញ្ជីរួចរាល់ ពលរដ្ឋទាំង៨គ្រួសារបានស្នើឱ្យមន្ត្រីសូរិយោដីពិនិត្យផ្ទៀងផ្ទាត់អត្តសញ្ញាណដែលមានឈ្មោះជាន់លើក្បាលដីរបស់ពួកគេ ក្រោយមកក៏រកឃើញថា លោកឧកញ្ញ៉ា ស្រី ចន្ទូជាម្ចាស់ក្បាលដីទាំងនោះ។
បន្ថែមពីនេះ លោក ម្លូស តេន បានប្រាប់ថា ក្រោយពិនិត្យឃើញបែបនេះ អភិបាលស្រុកអូរាំងបានសន្យាថា នឹងធ្វើការកាត់ដីដែលមានបញ្ហាមកឱ្យពលរដ្ឋទាំង៨គ្រួសារវិញ។ ប៉ុន្តែមុននឹងឈានដល់ការសន្យាបែបនេះ អភិបាលស្រុកអូររាំងបានបញ្ជាក់ថា នឹងស្វែងរកដីថ្មីដើម្បីដោះដូរជូន២គ្រួសារ និង៦គ្រួសារផ្សេងផ្តល់ជាសំណង។ តែយ៉ាងណា ទិដ្ឋភាពជាក់ស្តែង អភិបាលស្រុករូបនេះមិនបានឆ្លើយតបតាមការសន្យារបស់ខ្លួនពីមួយខែទៅមួយខែ និងបានគំរាមកំហែងចាត់វិធានការច្បាប់ ក៏ដូចជាបានរារាំងពួកគេមិនឱ្យមានការតវ៉ាថែមទៀត។ ដូច្នេះ ពលរដ្ឋទាំង៨គ្រួសារសម្រាប់ឡើងមកដាក់ញ្ញាតិដើម្បីស្វែងរកកិច្ចអន្តរាគមន៍ពីក្រសួងពាក់ព័ន្ធ។
ពាក់ព័ន្ធនឹងបញ្ហាដីធ្លីនេះ លោកនាយករដ្ឋមន្ត្រីហ៊ុនសែនកាលពីថ្ងៃ០៨ វិច្ឆិកា ក្នុងពិធីដាក់ឱ្យប្រើប្រាស់អគារទីស្តីការក្រសួងដែនដី ក្រសួងរៀបចំដែនដី នគរូបនីយកម្ម និងសំណង់ លោកបានណែនាំឱ្យមន្រ្តី ត្រូវបន្តដោះស្រាយជម្លោះដីធ្លីដែលនៅសេសសល់ និងការចេញបណ្ណកម្មសិទ្ធិដីធ្លីជូនប្រជាពលរដ្ឋ ព្រមទាំងដោះស្រាយបញ្ហាដីសង្គមកិច្ច ហើយរាល់ការដោះស្រាយត្រូវមាន សុចរិតភាព និងអាចប្រើយន្តការសម្របសម្រួលដោះស្រាយក្រៅប្រព័ន្ធតុលាការ។
ក្នុងនោះ ក្រសួងមហាផ្ទៃនាពេលថ្មីៗនេះ ក៏បានស្នើឱ្យអាជ្ញាធរពាក់ព័ន្ធ ត្រូវដោះស្រាយបញ្ហាដីធ្លីគ្រប់រូបភាព ដោយមានតម្លាភាព និងស្អាតស្អំ ពិសសេលំនៅឋាន និងសិទ្ធិរបស់ជនជាតិដើមភាគតិច ទិសដៅដើម្បីជំរុញការអភិវឌ្ឍប្រកបដោយនិរន្តរភាពនៅកម្ពុជាផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ