របាយការណ៍៖ ការអនុវត្តច្បាប់ប្រឆាំងអំពើពុករលួយនៅកម្ពុជា នៅមានលក្ខណៈទន់ខ្សោយ
អង្គការតម្លាភាពកម្ពុជានៅព្រឹកថ្ងៃ២៥វិច្ឆិកានេះ បានបង្ហាញរបាយការណ៍សិក្សាថ្មីមួយ ដែលពិនិត្យឃើញថា យន្តការអនុវត្តច្បាប់ប្រឆាំងអំពើពុករលួយរបស់កម្ពុជា នៅមិនទាន់មានភាពរឹងប៉ឹងនៅឡើយ ខណៈអ្នកសង្កេតការណ៍មួយចំនួនបានសម្តែងក្តីព្រួយបារម្ភថា ច្បាប់ប្រឆាំងអំពើពុករលួយរបស់កម្ពុជា ត្រូវបានអនុវត្តដោយស្ថិតក្រោមការរើសអើង។ ជុំវិញរបាយការណ៍នេះ លោក ប៉ិច ពិសី នាយកប្រតិបត្តិនៃអង្គការតម្លាភាពកម្ពុជាបានអះអាងបញ្ជាក់ប្រាប់វិទ្យុបារាំងអន្តរជាតិថា ដើម្បីជាដំណោះស្រាយដល់ការអនុវត្តច្បាប់របស់កម្ពុជាឱ្យកាន់មានភាពល្អប្រសើរ របាយការណ៍បានផ្តល់អនុសាសន៍និងធាតុចូលសំខាន់ៗមួយដើម្បីឱ្យកម្ពុជាពង្រឹងខ្លួនបន្ថែមទៀត។
ចុះផ្សាយនៅថ្ងៃ៖
ស្តាប់ - ០២:២២
របាយការណ៍កម្រាស៧៤ទំព័រ ដែលជាការសិក្សារួមគ្នារវាងអង្គការសម្ព័ន្ធ UNCAC និងអង្គការតម្លភាពកម្ពុជា ពិនិត្យឃើញថា ទិសដៅ និងផែនការអនុវត្តច្បាប់ប្រឆាំងអំពើពុករលួយរបស់កម្ពុជានាពេលបច្ចុប្បន្ន នៅមិនទាន់មានភាពល្អប្រសើរនៅឡើយ ទោះបីកម្ពុជាបានអនុម័តច្បាប់ប្រឆាំងអំពើពុករលួយឱ្យប្រើប្រាស់ហើយយ៉ាងណាក្តី។
របាយការណ៍ស្តីពីការអនុវត្តបទប្បញ្ញត្តិបង្ការ និងស្ដារទ្រព្យសម្បត្តិនៃអនុសញ្ញាអង្គការសហប្រជាជាតិប្រឆាំងអំពើពុករលួយនេះ បន្តទៀតថា ការអនុវត្តច្បាប់អំពើពុករលួយរបស់អង្គភាពប្រឆាំងអំពើពុករលួយ និងស្ថាប័នរដ្ឋ នៅតែបន្តកើតមានបញ្ហារើសអើងដដែល។ បញ្ហាអើសរើសនេះ បើតាមការបញ្ជាក់នៅក្នុងរបាយការណ៍ គឺអង្គភាពប្រឆាំងអំពើពុករលួយ (ACU) ដែលមានភារកិច្ចអនុវត្តវិធានការច្បាប់ និងក្រុមប្រឹក្សាជាតិប្រឆាំងអំពើពុករលួយ (NCAC) ដែលជាស្ថាប័នប្រឹក្សា ហាក់កម្របើកការស៊ើបអង្កេតទៅលើសមាជិកនិងមន្ត្រីជាន់ខ្ពស់នៃគណបក្សកាន់អំណាច ព្រមទាំងមន្ត្រីក្នុងជួររដ្ឋាភិបាល ទោះបីមានការចោទប្រកាន់អំពីអំពើពុករលួយរបស់ពួកគេក៏ដោយ។
ដើម្បីដោះស្រាយបញ្ហាពុករលួយនៅកម្ពុជា អង្គការតម្លាភាពកម្ពុជា បានផ្ដល់អនុសាសន៍ជាសកម្មភាពអាទិភាពមួយចំនួន ដើម្បីឱ្យកម្ពុជាឈានទៅទទួលជោគជ័យក្នុងការការអនុវត្តច្បាប់ប្រឆាំងអំពើពុករលួយ និងឱ្យស្របតាមក្របខណ្ឌរបស់អង្គការសហប្រជាជាតិ និងសម្ព័ន្ធ UNCAC នៅកម្ពុជា ។ សកម្មភាពអាទិភាពទាំងអស់នោះរួមមាន៖ ការពង្រឹងឯករាជ្យភាព តម្លាភាពរបស់អង្គភាពប្រឆាំងអំពើពុករលួយ សម្របសម្រួលកិច្ចខិតខំប្រឹងប្រែងប្រឆាំងអំពើពុករលួយ ដូចជា ការផ្តល់ព័ត៌មានដល់សាធារណជននូវបញ្ហាអំពើពុករលួយ ពង្រឹងភាពស្មោះត្រង់ចំពោះសាធារណជន ធ្វើឱ្យប្រសើរឡើងនូវតម្លាភាព និងការត្រួតពិនិត្យប្រកបដោយប្រសិទ្ធភាពនៃហិរញ្ញប្បទាននយោបាយ កែលម្អការប្រកាសទ្រព្យសម្បត្តិរបស់មន្ត្រីជាន់ខ្ពស់ទៅកាន់សាធារណជន សុចរិតភាពក្នុងប្រព័ន្ធតុលាការ និងពង្រឹងកិច្ចខិតខំប្រឹងប្រែងប្រឆាំងការលាងលុយកខ្វក់។
ជុំវិញរបាយការណ៍ខាងដើម លោក ប៉ិច ពិសី នាយកប្រតិបត្តិនៃអង្គការតម្លាភាពកម្ពុជាបានថ្លែងបញ្ជាក់ប្រាប់វិទ្យុបារាំងអន្តរជាតិ RFI ថា កម្ពុជានឹងអាចអនុវត្តយុទ្ធសាស្ត្រប្រឆាំងអំពើពុករលួយបានកាន់តែល្អប្រសើរជាងមុន នៅពេលដែលរដ្ឋាភិបាល និងអង្គភាពប្រឆាំងអំពើពុករលួយ យល់ព្រមពិនិត្យ និងទទួលយកអនុសាសន៍ដែលស្នើឡើងដោយអង្គការសង្គមស៊ីវិល និងអ្នកឃ្លាំមើល ។
សូមជម្រាបថា នៅក្នុងឆ្នាំ២០២០ សន្ទស្សន៍វាយតម្លៃអំពីអំពើពុករលួយរបស់អង្គការតម្លាភាពអន្តរជាតិ បានដាក់ឲ្យកម្ពុជាឈរនៅលើលេខរៀង១៦០ ក្នុងចំណោមប្រទេសចំនួន១៨០នៅលើពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ