កម្ពុជាផ្អាកទទួលអ្នកដំណើរពីបណ្តាប្រទេសចំនួនដប់នៃទ្វីបអាហ្វ្រិក ក្នុងរបត់វីរុសកូវីដ-១៩បំប្លែងថ្មីកំពុងសាយភាយ
កម្ពុជាសម្រេចផ្អាកទទួលអ្នកដំណើរ ឬអ្នកដំណើរដែលបានឆ្លងកាត់ប្រទេសចំនួន១០ក្នុងទ្វីបអាហ្វ្រិកជាបណ្តោះអាសន្ន ក្រោមមូលហេតុនៃការសាយភាយវីរុសកូវីដ-១៩ ប្រភេទបំប្លែងថ្មី «អូមីក្រុង»។ ប្រឈមនឹងបញ្ហានេះ អ្នកនាំពាក្យក្រសួងសុខាភិបាលបានបញ្ជាក់ថា ក្រសួងបានត្រួតពិនិត្យលើច្រកចេញចូលយ៉ាងតឹងរឹង ដើម្បីបញ្ចៀសហានិភ័យណាមួយកើតមានឡើង។
ចុះផ្សាយនៅថ្ងៃ៖
ស្តាប់ - ០៣:០១
នៅចំពោះមុខបញ្ហាស្រួចស្រាល់ជាថ្មី នៃការសាយភាយជំងឺកូវីដ-១៩ ប្រភេទបំប្លែងថ្មី «អូមីក្រុង» ក្រសួងសុខាភិបាលកម្ពុជា បានសម្រេចបិទមិនទទួលអ្នកដំណើរ ឬអ្នកដែលធ្លាប់ឆ្លងកាត់ប្រទេសចំនួនដប់ ក្នុងទ្វីបអាហ្រិ្វក ក្នុងអំឡុងពេលបីសប្តាហ៍មុនមកដល់កម្ពុជា រួមមាន ប្រទេសបូតស្វាណា អេសវ៉ាទីនី ឡេសូតូ ម៉ូសំប៊ិក ណាមីប៊ី អាហ្វ្រិកខាងត្បូង ហ្ស៊ីមបាវ៉េ ម៉ាឡាវី អេនហ្គោឡា និងប្រទេសហ្សំប៊ី។ នេះបើតាមសេចក្តីប្រកាសព័ត៌មានរបស់ក្រសួងសុខាភិបាល ចុះនៅថ្ងៃទី២៩វិច្ឆិកា។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាល បានបញ្ជាក់ប្រាប់វិទ្យុបារាំងអន្តរជាតិនៅព្រឹកថ្ងៃអង្គារនេះថា លើសពីការបិទមិនទទួលអ្នកដំណើរពីបណ្តាប្រទេសចំនួនដប់នៃទ្វីបអាហ្វ្រិកជាបណ្តោះអាសន្ននេះ ក្រសួងបានរៀបចំឲ្យមានការត្រួតពិនិត្យនិងឃ្លាំមើលយ៉ាងម៉ត់ចត់នៅតាមច្រកចេញចូលនីមួយៗ ព្រោះថាការធ្វើបែបនេះ ដើម្បីធានាមិនឲ្យមានអ្នកដំណើរពីបណ្តាប្រទេសទាំងនោះបានចូលមកកម្ពុជា។
ជុំវិញបញ្ហានេះ លោកស៊ីន ចាន់សិរីវត្ថា អ្នកនាំពាក្យរដ្ឋលេខាធិការអាកាសចរស៊ីវិល បានប្រាប់ឲ្យដឹងដែរថា ជាទូទៅកម្ពុជាពុំសូវមានអ្នកដំណើរមកពីបណ្តាប្រទេសនៃទ្វីបអាហ្វ្រិកនោះទេ បើទោះជាមាន ក៏ជាអ្នកការទូត ឬអ្នកធ្វើការនៃអង្គការសហប្រជាជាតិផងដែរ។ ម្យ៉ាងវិញទៀត កម្ពុជាក៏មិនមានជើងហោះហើរត្រង់ជាមួយបណ្តាប្រទេសទាំងនោះ ខណៈដែលអ្នកដំណើរគឺត្រូវផ្ទេរជើងហោះហើរនៅសិង្ហបុរី ឬកូរ៉េខាងត្បូង។
បើតាមអ្នកនាំពាក្យរូបនេះ សម្រាប់សិង្ហបុរីក៏មានវិធានការក្នុងការហាមឃាត់ដូចកម្ពុជាដែរ។ ក៏ប៉ុន្តែសម្រាប់កូរ៉េខាងត្បូង នៅមិនទាន់ទទួលបានដំណឹងថាយ៉ាងណានោះទេ។ តែលោកស៊ីន ចាន់សិរីវុត្ថា គូសបញ្ជាក់ថា កូរ៉េខាងត្បូងក៏មានការតាមដានលើបញ្ហាយ៉ាងម៉ត់ចត់ដែរ។ ដូច្នេះកម្ពុជាពុំសូវព្រួយបារម្ភពីបញ្ហានៃការមកដល់របស់អ្នកដំណើរនៃបណ្តាប្រទេសទាំងដប់នោះទេ។
ទោះជាយ៉ាងណា ក្នុងរបត់នៃការសាយភាយកូវីដ-១៩ «អូមីក្រុង» អ្នកនាំពាក្យក្រសួងសុខាភិបាល លោកស្រីឱ វណ្ណឌីន នៅតែបន្តទទូចឲ្យមានការចូលរួមសហការពីប្រជាពលរដ្ឋក្នុងការអនុវត្តវិធានការ «បីកុំ បីការពារ» ឲ្យបានខ្ជាប់ខ្ជួន។ លើសពីនេះ ប្រជាពលរដ្ឋទាំងអស់ត្រូវតែមកទទួលយកវ៉ាក់សាំងកូវីដ-១៩ ទាំងដូសទី១និងទី២ រួមនឹងដូសជំរុញ ដើម្បីកាត់បន្ថយអត្រាឆ្លងនិងមរណៈ។
បើតាមការពន្យល់របស់លោកស្រី ឱ វណ្ណឌីន ទោះបីជាវីរុសកូវីដ-១៩បំប្លែងខ្លួនថ្មីយ៉ាងណាក្តី ក៏ប៉ុន្តែវ៉ាក់សាំងនៅតែសក្តានុពលមួយ ក្នុងការការពារសុខភាពសាធារណៈ ដ្បិតវីរុសដែលបំប្លែងទាំងនោះ ស្ថិតក្នុងអម្បូរ កូវីដ-១៩តែមួយ។
សូមបញ្ជាក់ជូនថា មេរោគបំប្លែងខ្លួនថ្មី ឈ្មោះ «អូមីក្រុង» ត្រូវគេរកឃើញនៅអាហ្វ្រិកខាងត្បូង និងដែលបានចម្លងទៅដល់ប្រទេសមួយចំនួននៅអឺរ៉ុប និងប្រទេសខ្លះ ក្នុងតំបន់ដើមបូព៌ា។ ហើយនៅតំបន់អាស៊ី គេរកឃើញមានករណីឆ្លងមេរោគកូវីដបំប្លែងខ្លួន «អូមីក្រុង» នេះ នៅហុងកុង។ ទាំងអង្គការសុខភាពពិភពលោក ទាំងក្រសួងសុខាភិបាល សុទ្ធតែបង្ហាញការព្រួយបារម្ភ ដ្បិតការឆ្លងរបស់ «អូមីក្រុង» មានសភាពរហ័ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ