រដ្ឋមន្ត្រីការពារជាតិឡាវស្នើកម្ពុជាបង្កើតក្រុមការងារទំនាក់ទំនងតាមព្រំដែនកម្ពុជា-ឡាវ ដូចកម្ពុជា-ថៃដែរ
ក្រោយពីជំនួបជាមួយរដ្ឋមន្ត្រីក្រសួងការពារជាតិឡាវ នាព្រឹកថ្ងៃអង្គារនេះ នៅទីស្តីការគណៈរដ្ឋមន្ត្រី លោកឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិកម្ពុជា បានថ្លែងប្រាប់អ្នកសារព័ត៌មានថា ភាគីឡាវបានស្នើរឲ្យកម្ពុជាបង្កើតក្រុមការងារទំនាក់ទំនងតាមព្រំដែន ដើម្បីផ្លាស់ប្តូរព័ត៌មានរវាងសមត្ថកិច្ចតាមព្រំដែននៃប្រទេសទាំងពីរ ដូចអ្វីដែលកម្ពុជាបានធ្វើជាមួយថៃដូច្នោះដែរ។ លោក ទៀ បាញ់ បញ្ជាក់ថាទំនាក់ទំនងដែលមានស្រាប់រវាងកងទ័ពកម្ពុជា និងឡាវ កន្លងមកត្រូវបានអាក់ខាន ដោយសារតែវិបត្តិនៃជំងឺកូវីដ-១៩។ ហេតុដូច្នេះហើយ លោក ទៀ បាញ់ បានបញ្ជាក់បន្ថែមថាកម្ពុជា-ឡាវ ក៏បានជំរុញឲ្យបង្កើននូវទំនាក់ទំនងរវាងមន្ដ្រីមូលដ្ឋាន ដោយត្រូវជួបគ្នាជាអចិន្ដ្រៃយ៍ យ៉ាងហោចណាស់ក៏២ដក្នុងមួយឆ្នាំដែរ ដើម្បីផ្លាស់ប្ដូរទំនាក់ទំនងគ្នា នៅពេលស្ថានភាពជំងឺកូវីដ-១៩ ធូរស្រាលទៅវិញ។
ចុះផ្សាយនៅថ្ងៃ៖
សូមស្តាប់ប្រសាសន៍លោក ទៀ បាញ់៖
សូមបញ្ជាក់ថាកងទ័ពកម្ពុជា-ឡាវ ធ្លាប់បានប្រឈមមុខដាក់គ្នា ជាច្រើនលើកមកហើយ ចាប់តាំងពីឆ្នាំ ២០១៧មក។ យោធាឡាវបានចូលមកឈរជើងនៅតំបន់អូរអាឡៃ និងអូរតាង៉ាវ ស្ថិតក្នុងស្រុក សៀមប៉ាង ខេត្តស្ទឹងត្រែង។ ហេតុការណ៍នេះ បានជំរុញឲ្យប្រមុខរដ្ឋាភិបាលកម្ពុជាលោក ហ៊ុន សែន និងមេដឹកនាំឡាវបានចល័តទៅមករកគ្នា ដើម្បីពិភាក្សាកំរិតខ្ពស់ជុំវិញបញ្ហាព្រំដែននេះ។ នៅក្នុងជំនួបដែលធ្វើឡើងនៅក្នុងទីក្រុងភ្នំពេញ មេដឹកនាំកម្ពុជា-ឡាវ បានឯកភាពគ្នាថា សរសេរលិខិតផ្ញើទៅកាន់ប្រធានាធិបតីបារាំង ដើម្បីស្នើសុំបញ្ជូនអ្នកជំនាញការព្រំដែនបារាំង ឲ្យមកជួយវាស់វែង និងដោះស្រាយបញ្ហាជម្លោះនៅតាមបន្ទាត់ព្រំដែនរវាងប្រទេសទាំងពីរ ដែលនៅសេសសល់ប្រមាណជា១៦%ទៀត។ ការប្រឈមមុខដាក់គ្នាខាងយោធាផ្សេងទៀត គឺបានកើតឡើងនៅក្នុងខែសីហា ឆ្នាំ២០១៩ ដែលកាលណោះ កងទ័ពឡាវបានលើកគ្នាចូលមកកាន់កាប់ទឹកដីខ្មែរក្នុងចំនុចទន្លេរពៅ ដោយសំអាងថា ជាទឹកដីរបស់គេ។ ក៏ប៉ុន្តែភាគីកម្ពុជា-ឡាវ បានចរចាគ្នាឲ្យដកទៅឈរជើងនៅស្ថានភាពដើមរៀងៗខ្លួន ខណៈដែលអាវុធយុទ្ធភ័ណ្ឌនិងកងទ័ពបានត្រៀមលក្ខណៈរួចជាស្រេច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ