ច្រកព្រំដែនអន្តរជាតិកម្ពុជា-ថៃ នឹងបើកដំណើរការឡើងវិញនៅចុងខែធ្នូ ឆ្នាំ២០២១នេះ
រដ្ឋបាលខេត្តបន្ទាយមានជ័យនៅព្រឹកថ្ងៃទី០១ ធ្នូនេះបានអះអាងថា ច្រកព្រំដែនអន្តរជាតិប៉ោយប៉ែត និងច្រកព្រំដែនខេត្តបាត់ដំបងជាប់ជាមួយខេត្តស្រះកែវ នឹងគ្រោងបើកដំណើរការឡើងវិញនាចុងខែធ្នូ ឆ្នាំ២០២១ខាងមុខនេះ។ ការបញ្ជាក់បែបនេះ ក្រោយភាគីទាំងពីរ កម្ពុជា-ថៃបានពិនិត្យឃើញថា អត្រាការឆ្លងមេរោគកូវីដ១៩នៅក្នុងខេត្តនៅតាមច្រកព្រំដែនមានសភាពធូរស្រាលជាងមុន។ លោក ងោ ម៉េង ជ្រួន អភិបាលរងខេត្តបន្ទាយមានជ័យបានលើកឡើងថា ក្នុងអំឡុងពេលបើកច្រកព្រំដែន ភាគីទាំងពីរនឹងពង្រឹងនូវវិធានការសុខាភិបាលឱ្យបានតឹងរឹងបន្ថែមទៀត។
ចុះផ្សាយនៅថ្ងៃ៖
ស្តាប់ - ០២:២៥
លោក ងោ ម៉េងជ្រួន អភិបាលខេត្តបន្ទាយមានជ័យនាព្រឹកថ្ងៃទី០១ ធ្នូនេះបានបញ្ជាក់ថា ច្រកព្រំដែនអន្តរជាតិប៉ោយប៉ែតជាប់និងច្រកព្រំដែនខេត្តស្រះកែវ ប្រទេសថៃ ដែលជាច្រកព្រំដែនធំ និងសំខាន់សម្រាប់ដោះដូរទំនិញនោះ នឹងត្រៀមបើកដំណើរការឡើងវិញនៅចុងខែធ្នូឆ្នាំ២០២១នេះ។ ការបើកនេះ ក្រោយពិនិត្យឃើញថា ស្ថានភាពជំងឺកូវីដ១៩នៅតាមតំបន់ច្រកព្រំដែនមានសភាពធូរស្រាល។ ក្នុងនោះ លោក ងោ ម៉េងជ្រួនបន្តថា ក្រៅតែពីច្រកអន្តរជាតិប៉ោយប៉ែត ច្រកព្រំដែនខេត្តបាត់ដំបងដែលជាប់នឹងខេត្តស្រះកែវ ក៏នឹងគ្រោងបើកឡើងវិញនៅពេលតែមួយផងដែរ។
ការបញ្ជាក់បែបនេះពីអភិបាលរងខេត្តខេត្តបន្ទាយជ័យធ្វើឡើងក្រោយ អាជ្ញាធរខេត្តបន្ទាយមានជ័យ និងខេត្តបាត់ដំបង បានពិភាក្សាគ្នាជាមួយអាជ្ញាធរខេត្តស្រះកែវ កាលពីថ្ងៃទី២៥ វិច្ឆិកាកន្លងទៅដើម្បីពិនិត្យ ស្វែងរកវិធីសាស្រ្តក្នុងការបើកច្រកព្រំដែនឡើងវិញ។ ក្នុងនោះ ភាគីកម្ពុជាក៏បានដាក់លិខិតផ្លូវការឱ្យភាគីថៃដើម្បីពិនិត្យ ជំរុញលទ្ធភាពឱ្យអាជ្ញាធរខេត្តស្រះកែវបើកច្រកព្រំដែនរបស់ខ្លួនឡើងវិញ ខណៈច្រកព្រំដែនរបស់កម្ពុជាមិនមានការបិទអ្វីនោះទេ ពោលគឺបើកជាធម្មតា។
បើតាម លោក ងោ ម៉េងជ្រួន នៅពេលច្រកព្រំដែនបើកដំណើរការឡើងវិញ នោះការដោះដូរទំនិញ ការធ្វើពាណិជ្ជកម្ម ការចេញចូលរបស់ពលរដ្ឋរវាងប្រទេសទាំងពីរនឹងមានភាពងាយស្រួល ជាពិសេសមិនប្រឈមការឆ្លងដែនខុសច្បាប់ថែមទៀត។ ស្របពេលដែលវិធានការសុខាភិបាលនឹងត្រូវរឹតបន្តឹង ដើម្បីទប់ស្កាត់ការចម្លងមេរោគកូវីដ១៩។
ជុំវិញផែនការបើកច្រកព្រំដែននេះ លោក នុតតាឆៃ ណាំផុនសុខសាន្ត អភិបាលរងខេត្តស្រះកែវបានបញ្ជាក់ប្រាប់វិទ្យុបារាំងអន្តរជាតិRFIថា អាជ្ញាធរខេត្តស្រះកែវកំពុងសុំគោលការណ៍ពីខាងរដ្ឋាភិបាលថៃ និងរងចាំការសម្រេចនូវសំណើរដែលកម្ពុជាបានស្នើ។ លោកនុតតាឆៃ ណាំផុនសុខសាន្ត បន្តថា ភាគីថៃ នឹងព្យាយាមពន្លឿន ការបើកច្រកព្រំដែនឡើងវិញ ដោយមិនឱ្យហួសពីអំឡុងខែធ្នូនោះទេ។ ពីព្រោះថា ការពិភាក្សាគ្នាកាលពីថ្ងៃទី២៥ វិច្ឆិកាកន្លងទៅ ភាគីទាំងពីរបានយល់ព្រមសំណើរបើកច្រកព្រំដែនអន្តរជាតិ និងច្រកព្រំដែនដែលជាប់ជាមួយខេត្តស្រះកែវរួចរាល់ហើយ។ បើតាម អភិបាលរងខេត្តស្រះកែវរូបនេះ ក្រោយសេចក្តីសម្រេចពីរដ្ឋាភិបាលថៃ អាជ្ញាធរខេត្តស្រះកែវនឹងផ្តល់ដំណឹងនេះទៅកាន់អាជ្ញាធរកម្ពុជាជាក់ជាមិនខាន។
សូមជម្រាបថា ព្រំដែនកម្ពុជា-ថៃ បានបើកឲ្យមានការដោះដូរទំនិញជាធម្មតា។ ប៉ុន្តែការធ្វើដំណើរធម្មតាឡើងវិញសម្រាប់ប្រជាពលរដ្ឋ នៅមិនទាន់អនុញ្ញាតនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ