លោក ថេង សាវឿន៖ កសិករស្លូតត្រង់កំពុងរងគ្រោះពីការបង្ក្រាបការទន្ទ្រានដីព្រៃលិចទឹកបឹងទន្លេសាប
លោក ថេង សាវឿន ប្រធានសមាគមសម្ព័ន្ធសហគមន៍កសិករកម្ពុជា (CCFC) តាមរយៈវិទ្យុបារាំងអន្តរជាតិនារសៀលថ្ងៃទី៣ធ្នូនេះ បានអោយដឹងថា កសិករជាច្រើនគ្រួសារដែលបានជួលដីធ្វើស្រែពីជនទន្ទ្រានដីលិចទឹកខុសច្បាប់នៅបឹងទន្លេសាប កំពុងទទួលរងផលប៉ះពាល់ជីវភាពរស់នៅធ្ងន់ធ្ងរពីការបង្ក្រាបរបស់ សមត្ថកិច្ច។ បើតាមលោក ថេង សាវឿង នៅមុនពេលចុះបង្ក្រាប រដ្ឋាភិបាលគួរទុកពេលអោយកសិករដែលប៉ះពាល់ ប្រមែប្រមូលស្រូវសិន ខណៈពួកគេកំពុងជួបវិបត្តិជំពាក់បំណុលធនាគារ។
ចុះផ្សាយនៅថ្ងៃ៖
ស្តាប់ - ០២:៤៣
ជុំវិញការបង្ក្រាបការទន្ទ្រានដីព្រៃលិចទឹកបឹងទន្លេសាបរបស់រដ្ឋាភិបាល កសិករជាច្រើនគ្រួសារកំពុងប៉ះពាល់ធ្ងន់ធ្ងរ ដោយសារពួកគេបានខ្ចីប្រាក់ពីធនាគារឬគ្រឹះស្ថានមីក្រូហិរញ្ញវត្ថុ ដើម្បីយកមកទិញជី សម្ភារៈកសិកម្ម យកមកធ្វើស្រែនៅលើដីដែលជួលពីអ្នកទន្ទ្រានជាមន្ត្រីមានអំណាច។ នេះ បើតាមលោក ថេង សាវឿន ប្រធានសមាគមសម្ព័ន្ធសហគមន៍កសិករកម្ពុជានៅថ្ងៃទី៣ធ្នូនេះ។ និងថា កសិករទាំងនោះ ភាគច្រើនគឺជាជនរងគ្រោះស្លូតត្រង់ មិនបានដឹងព័ត៌មានឬប្រវត្តិដីខុសច្បាប់នោះទេ។
ជាយោបល់របស់ប្រធានសមាគមសម្ព័ន្ធសហគមន៍កសិករកម្ពុជារូបនេះ ចំណាត់ការដកហូតដីធ្លីខុសច្បាប់គឺនៅតែបន្តធ្វើដដែល ក៏ប៉ុន្តែរដ្ឋាភិបាលគប្បីទុកពេលអោយកសិករដែលប៉ះពាល់ ប្រមូលផលស្រូវរួចរាល់សិន ។ និងថា អាជ្ញាធរគួរអោយជនល្មើសពិតប្រាកដ សងប្រាក់ខាត់បង់ត្រឡប់ទៅកសិករក្រីក្រវិញផងដែរ។
លោក ច័ន្ទ សុផល អ្នកស្រាវជ្រាវ និងនាយកនៃមជ្ឈមណ្ឌលសិក្សាគោលនយោបាយនៅថ្ងៃទី៣ធ្នូនេះ បានអោយដឹងដែរថា ប្រជាកសិករជាច្រើនគ្រួសារកំពុងរងគ្រោះ ដោយការបង្ក្រាបការទន្ទ្រានដីព្រៃលិចទឹកបឹងទន្លេសាបនៅតាមបណ្តាខេត្តពាក់ព័ន្ធទាំង៦។ បើតាមប្រភពព័ត៌មានមិនបញ្ចេញឈ្មោះរបស់លោក ច័ន្ទ សុផល នៅក្នុងខេត្តកំពង់ធំ មានកសិករ១ពាន់គ្រួសារកំពុងរងគ្រោះពីការជួលដីធ្វើស្រែពីជនទន្ទ្រានដី លើផ្ទៃដីប្រមាណ១ម៉ឺនហិកតា ដែលជាសរុបគឺបាត់បង់ចំណូលដល់ទៅ ១០លានដុល្លារឯណោះ។ និងថា ពួកគេភាគច្រើន កំពុងផុងខ្លួនចូលក្នុងបំណុលវ័ណ្ឌកថែមទៀត។
ជុំវិញនឹងបញ្ហានេះ នាយកនៃមជ្ឈមណ្ឌលសិក្សាគោលនយោបាយរូបនេះ បានអះអាងថា លោកនឹងធ្វើការសិក្សាលម្អិតបន្ថែមទៀត។ លោកក៏អំពាវនាវអោយរដ្ឋាភិបាលមានការសិក្សាវាយតម្លៃបរិស្ថាន និងសង្គមសេដ្ឋកិច្ចច្បាស់លាស់បន្ថែម ជុំវិញការកំណត់តំបន់ ៣នៅជុំវិញបឹងទន្លេសាប។
គួរអោយដឹងដែរថា លោក សេង ឡូត អ្នកនាំពាក្យរបស់ក្រសួងដែនដី នគរូបនីយកម្ម និងសំណង់ដែលចូលរួមក្នុងប្រតិបត្តិការស្រាវជ្រាវលើការទន្រ្ទានដីព្រៃបឹងទន្លេសាបនេះ បានប្រាប់វិទ្យុបារាំងអន្តរជាតិនៅរសៀលថ្ងៃទី៣ធ្នូថា ក្រុមការងារកំពុងចុះពិនិត្យ និងធ្វើជាផែនទីបង្ហាញពីទីតាំងនិងទំហំដីព្រៃលិចទឹកដែលបានទន្ទ្រៀនច្បាស់លាស់ក្នុងពេលខាងមុខ។ បើតាមលោក សេង ឡូត គិតត្រឹមពេលនេះ តួលេខផ្លូវការជំហានដំបូងនៃការស្រាវជ្រាវកំណត់អត្តសញ្ញាណដី និងអ្នកកាន់កាប់ដីព្រៃលិចទឹកក្នុងស្រុកកំពង់លែង ខេត្តកំពង់ឆ្នាំង សរុបបាន ២១០០ហិកតា។ លោកថា គណៈកម្មការអន្តរក្រសួងកំពុងស្នើកាត់និងប្រគល់ដីនោះមកជាសម្បត្តិរដ្ឋវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ