អាកាសចរណ៍ស៊ីវិលកម្ពុជា៖ ភ្ញៀវបរទេសកើនឡើង១៥២% ក្រោយក្រុមហ៊ុនអាកាសចរណ៍ត្រឡប់មកធ្វើប្រតិបត្តិការឡើងវិញ
រដ្ឋលេខាធិការអាកាសចរណ៍ស៊ីវិលនៅថ្ងៃទី០៥ ធ្នូបានអះអាងថា ក្រុមហ៊ុនអាកាសចរណ៍ធំៗចំនួន៧បានត្រឡប់មកធ្វើប្រតិបត្តិការហោះហើរមកកាន់កម្ពុជាឡើងវិញ ជាហេតុធ្វើឲ្យកំណើនអ្នកដំណើរបរទេសបានកើនឡើងរហូតដល់៦០០នាក់ក្នុងមួយថ្ងៃ។ លោក ស៊ិន ចាន់សេរីវត្ថា អ្នកនាំពាក្យរដ្ឋលេខាធិកាអាកាសចរណ៍ស៊ីវិលកម្ពុជាបានបញ្ជាក់ថា ដើម្បីបន្តជំរុញលំហូរភ្ញៀវទេសចរ និងបរិមាណជើងហោះហើរមកកម្ពុជាបន្ថែមទៀត អាកាសចរណ៍ស៊ីវិលកម្ពុជាកំពុងពិភាក្សាជាមួយក្រុមហ៊ុនអាកាសចរណ៍ធំៗចំនួន៣ ឱ្យរៀបចំជើងហោះហើរឡើងវិញ។
ចុះផ្សាយនៅថ្ងៃ៖
ស្តាប់ - ០២:១៥
លោកស៊ិន ចាន់សេរីវត្ថា អ្នកនាំពាក្យរដ្ឋលេខាធិកាអាកាសចរណ៍ស៊ីវិលកម្ពុជា បានបញ្ជាក់ប្រាប់វិទ្យុបារាំងអន្តរជាតិ RFI ថា ក្រោយរដ្ឋាភិបាលប្រកាសបើកប្រទេសឡើងវិញនៅថ្ងៃ១៥ វិច្ឆិកា ឆ្នាំ២០២១ វត្តមានក្រុមហ៊ុនអាកាសចរណ៍ធំៗចំនួន៦ និងក្រុមហ៊ុនក្នុងស្រុកចំនួន១ បានចាប់ផ្ដើមធ្វើប្រតិបត្តិការហោះហើរឡើងវិញជាមួយកម្ពុជា។ ក្រុមហ៊ុនទាំង៨នេះ រួមមាន៖ ក្រុមហ៊ុនអាកាសចរណ៍ Singapore Airlines, Bangkok Airways, Thai Air Asia, Thai Smile Airways, Philippines Airlines, Cathay Pacific Airways និងក្រុមហ៊ុនអាកាសចរណ៍ក្នុងស្រុក Lanmei Airlines។
បើតាមការបញ្ជាក់ពីអ្នកនាំពាក្យអាកាសចរណ៍រូបនេះ ជើងហោះហើរសរុបដែលកំពុងធ្វើប្រតិបត្តិការជាមួយកម្ពុជា គិតត្រឹមដើមខែធ្នូនេះ បានបន្តហក់ឡើងក្នុងចន្លោះ១៦ភាគរយក្នុងមួយសប្តាហ៍ ពោលគឺកើនឡើងពីចំនួន៣៧ជើងក្នុងមួយសប្តាហ៍ ដល់ចំនួន៤៣ជើងក្នុងមួយសប្តាហ៍។
ដោយឡែក ចំពោះវត្តមានអ្នកដំណើរបរទេសចូលមកកម្ពុជាតាមរយៈផ្លូវអាកាសវិញ លោកស៊ិន ចាន់សេរីវត្ថា ឲ្យដឹងថា អ្នកដំណើរបរទេសនៅតែបន្តមានកំណើនល្អប្រសើរច្រើន។ សិ្ថតិដឹកជញ្ចូនពីរដ្ឋលេខាធិការអាកាសចរណ៍ស៊ីវិល បង្ហាញថា ចំនួនអ្នកដំណើរបរទេសចូលមកកម្ពុជា បន្តហក់ឡើងពីចន្លោះ៦០០ ដល់៧០០នាក់ក្នុងមួយថ្ងៃ ដោយបូករួមទាំងទេសចរណ៍វ៉ាក់សាំងផងដែរ។ ក្នុងនោះ គិតត្រឹមខែវិច្ឆិកាតែមួយ របាយការណ៍បានបង្ហាញថា ភ្ញៀវបរទេសបរទេសមានចំនួន១២,៨១២នាក់ ដោយកើនឡើង១៥២%។
សម្រាប់ទិសដៅបន្ទាប់ រដ្ឋលេខាធិកាដ្ឋានអាកាសចរស៊ីវិលក៏កំពុងបន្តជម្រុញ និងពិភាក្សាជាមួយបណ្តាក្រុមហ៊ុនអាកាសចរណ៍ខ្នាតធំមកពីមជ្ឈឹមបូព៌ាមួយចំនួនថែមទៀតឲ្យត្រឡប់មកធ្វើប្រតិបត្តិការមកកម្ពុជាវិញ ដូចជា ក្រុមហ៊ុនអាកាសចរណ៍ Emirates, Qatar Airways, Etihad Airway និងក្រុមហ៊ុនអាកាសចរណ៍ All Nippon Airways មកពីទីក្រុងតូក្យូនៃប្រទេសជប៉ុនជាដើម។
បើតាមលោក ស៊ិន ចាន់សេរីវត្ថា កម្ពុជារំពឹងថាលំហូរភ្ញៀវទេសចរបរទេស និងការភ្ជាប់ជើងហោះហើរឡើងវិញ នឹងបន្តកើនឡើងនៅក្នុងខែធ្នូ និងខែមករាខាងមុខ ប្រសិនបើមេរោគបំប្លែងខ្លួនថ្មីប្រភេទ «អូមីក្រុង» មិនបង្កបញ្ហាដល់ពិភពលោក និងប្រទេសកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ