ករណីទន្រ្ទានដីព្រៃលិចទឹក៖ អាជ្ញាធរខេត្តពិបាកវាស់វែងឱ្យបានសុក្រឹត ដោយសារទឹកមិនទាន់ស្រក
ចំណាត់ការស្រាវជ្រាវនិងបង្រ្កាបបទល្មើសទន្រ្ទានដីព្រៃលិចទឹកនៅតំបន់បឹងទន្លេសាប នៅតែបន្តធ្វើឡើង គិតចាប់តាំងពីមានបទបញ្ជាដ៏ម៉ឺងម៉ាត់របស់លោកនាយករដ្ឋមន្ត្រី ហ៊ុន សែន កាលពីថ្ងៃទី២៨វិច្ឆិកាមក។ ទោះយ៉ាងណា អាជ្ញាធរតាមបណ្តាខេត្តមួយចំនួន បញ្ជាក់ប្រាប់វិទ្យុបារាំងអន្តរជាតិថា ទិន្នន័យដែលបានរកឃើញមកហើយនោះ នៅជាតួលេខបឋមនៅឡើយ ព្រោះថានៅពេលនេះទឹកនៅមិនទាន់ស្រក ដែលធ្វើឲ្យអាជ្ញាធរពិបាកវាស់វែង។
ចុះផ្សាយនៅថ្ងៃ៖
ថ្លែងប្រាប់វិទ្យុបារាំងអន្តរជាតិ RFI នៅព្រឹកថ្ងៃអាទិត្យនេះ លោកទៀ សីហា អភិបាលខេត្តសៀមរាប បានបញ្ជាក់ថា អាជ្ញាធរខេត្តត្រូវរង់ចាំរហូតដល់ទឹកស្រកសិន ទើបអាចកំណត់បាននូវទំហំផ្ទៃដីលិចទឹកដែលត្រូវបានទន្រ្ទាននោះ។ តាមលោកទៀ សីហា របាយការណ៍បឋមដែលថា ក្នុងខេត្តសៀមរាប មានការទន្រ្ទានដីព្រៃលិចទឹកប្រមាណ ១៩៧០ហិកតានោះ នៅមិនច្បាស់នៅឡើយទេ ថាអាចមានលើសនេះ ឬតិចជាងនេះ។ លោកបញ្ជាក់ទៀតថា អាជ្ញាធរនឹងចុះត្រួតពិនិត្យម្តងទៀត នៅខែក្រោយ បន្ទាប់ពីទឹកចាប់ផ្តើមស្រកទៅវិញ។
នៅទន្ទឹមនេះ សម្រាប់ចំណាត់ការទៅលើអ្នកដែលទន្ទ្រានយកដីព្រៃលិចទឹកនោះ លោកទៀ សីហា បានអះអាងថា មានប្រជាពលរដ្ឋមួយចំនួនបានចេញមកសារភាព ហើយករណីខ្លះទៀតក៏បានបញ្ជូនទៅតុលាការរួចហើយដែរ។ ក៏ប៉ុន្តែសម្រាប់អ្នកដែលមិនទាន់បានចេញមកសារភាព លោកអះអាងថា អាជ្ញាធរនឹងបញ្ជូនសំណុំរឿងទៅដៃតុលាការតែម្តង ពេលស្រាវជ្រាវរកឃើញ។
ពីខេត្តពោធ៍សាត់ឯណោះវិញ លោកជាវ តាយ ជាអភិបាលខេត្ត បានបញ្ជាក់ថា ជាតួលេខខេត្តពោធិ៍សាត់ មានករណីទន្រ្ទានដីព្រៃលិចទឹកប្រមាណ ៤៤៣៤ហិកតា ដែលក្នុងនោះប្រមាណជាង២៦០០ហិកតា កើតមានមុនឆ្នាំ២០១២ និងប្រមាណ១៧០០ហិកតាទៀត កើតមានក្រោយឆ្នាំ២០១២មក។ ទោះយ៉ាងណាផ្ទៃដីប្រមាណ ៤៤៣៤ហិកតា នៅជាតួលេខបឋមនៅឡើយនោះទេ ខណៈដែលអភិបាលខេត្តរូបនេះ គូសបញ្ជាក់ថា អាជ្ញាធរនឹងប្រជុំបូកសរុបតួលេខនៅសប្តាហ៍ក្រោយ។
យ៉ាងណាក៏ដោយ ទាំងអភិបាលខេត្តសៀមរាប ទាំងអភិបាលខេត្តពោធ៍សាត់ សុទ្ធតែបានអះអាងថា អាជ្ញាធរនៅបន្តទុកពេលឲ្យប្រជាពលរដ្ឋណាដែលបានអាស្រ័យផល លើផ្ទៃដីព្រៃលិចទឹកនោះជាមុនសិន។ បើតាមការបញ្ជាក់ អាជ្ញាធរនឹងទុកពេលឲ្យប្រជាពលរដ្ឋអាចប្រមូលផលរួច ទើបធ្វើការដកហូតដីទាំងនោះត្រលប់មកវិញ។
គួរបញ្ជាក់ថា ដីព្រៃលិចទឹកបឹងទន្លេសាប ត្រូវបានរកឃើញថា មានការទន្រ្ទានយ៉ាងធ្ងន់ធ្ងរ ក្រោយតែប្រធានរាជបណ្ឌិតសភាកម្ពុជា លោកសុខ ទូច បានចុះធ្វើការស្រាវជ្រាវ។ បន្ទាប់មកប្រមុខរដ្ឋាភិបាលកម្ពុជា ក៏បានដាក់បញ្ជាយ៉ាងម៉ឺងម៉ាត់ ឲ្យមន្ត្រីក្រោមឱវាទចុះស្រាវជ្រាវ វែកមុខជនល្មើស និងយកមកផ្តន្ទាទោសតាមច្បាប់។ ភ្លាមៗក៏មានមន្ត្រីខ្លះ និងប្រជាពលរដ្ឋខ្លះ បានចេញមកសារភាព និងប្រគល់ផ្ទៃដីទាំងនោះឲ្យមកអាជ្ញាធរគ្រប់គ្រង និងការពារឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ