អ្នកជំនាញ៖ កម្ពុជានឹងគ្មានលទ្ធភាពប្រជែងទីផ្សារនាំចេញទំនិញអន្តរជាតិ ប្រសិនបើតម្លៃដឹកជញ្ចូននៅតែឡើងថ្លៃ
សមាគមភស្តុភារកម្មកម្ពុជានាព្រឹកថ្ងៃទី១៣ ធ្នូបានអះអាងថា កម្ពុជាអាចនឹងប្រឈមលទ្ធភាពនៃកង្វះការប្រកួតប្រជែងទីផ្សារនាំចេញទំនិញទៅកាន់ទីផ្សារអន្តរជាតិ ប្រសិនបើតម្លៃដឹកជញ្ចូនតាមកប៉ាល់នៅតែរក្សាតម្លៃថ្លៃដដែល។ បើតាម លោកឧកញ៉ា ស៊ិន ចន្ធី ប្រធានសមាគមភស្តុភារកម្មកម្ពុជា បញ្ហាដែលធ្វើឱ្យការដឹកជញ្ចូននៅតែមានតម្លៃខ្ពស់ដដែលនេះ គឺដោយសារតែ កង្វះហេដ្ឋារចនាសម្ព័ន្ធបម្រើឲ្យវិស័យដឹកជញ្ជូន និងបញ្ហាធនធានមួយចំនួនទៀត។
ចុះផ្សាយនៅថ្ងៃ៖
ស្តាប់ - ០២:៣៣
ប្រធានសមាគមភស្តុភារកម្មកម្ពុជាលោកឧកញ៉ាស៊ិន ចន្ធី បានបញ្ជាក់ប្រាប់វិទ្យុបារាំងអន្តរជាតិថា កម្ពុជានឹងអាចបាត់បង់សមត្ថភាពប្រកួតប្រជែងទីផ្សារដឹកជញ្ចូនទំនិញពីអ្នកផលិតក្នុងស្រុកទៅផ្គត់ផ្គង់ទីផ្សារក្រៅប្រទេសនាពេលខាងមុខបាន ប្រសិនបើតម្លៃដឹកជញ្ចូនរបស់កម្ពុជានៅតែជាបញ្ហាចោទដដែល ពោលគឺតម្លៃឡើងថ្លៃជាងបណ្តាប្រទេសជិតខាង។
បើតាមលោកឧកញ្ញ៉ា ស៊ិន ចន្ធី បញ្ហាដែលបង្កឱ្យតម្លៃដឹកជញ្ចូនឡើងថ្លៃជាងបណ្តាប្រទេសដ៏ទៃទៀតនាពេលនេះ ពីព្រោះថាកម្ពុជានៅមិនទាន់មានកំពង់ផែទឹកជ្រៅដែលអាចផ្តល់សមត្ថភាព និងវិសាលភាពធំចំពោះការចូលចតកប៉ាល់ដឹកទំនិញខ្នាតធំបាននៅឡើយទេ។ ផ្ទុយទៅវិញ រាល់ទំនិញដែលដឹកចេញពីប្រទេសកម្ពុជា គឺត្រូវធ្វើការផ្ទេរបញ្ចូនទៅតាមប្រទេសក្នុងតំបន់មួយចំនួន ដើម្បីបន្តដឹកជញ្ចូនទៅកាន់ប្រទេសទិសដៅចុងក្រោយ។ បន្ថែមពីនេះ បញ្ហាកង្វះទូកុងតឺន័រ និងការប្រើប្រាស់រថយន្តចាស់ៗ បញ្ហាកង្វះធនធានមនុស្ស បច្ចេកវិទ្យា និងការគ្រប់គ្រងមិនបានល្អក្នុងការដឹកទំនិញជញ្ជូនក្នុងស្រុក ក៏ជាធាតុផ្សំដែលធ្វើឡើងការដឹកជញ្ចូនទំនិញចេញពីកម្ពុជានៅមានតម្លៃថ្លៃផងដែរ។
សម្រាប់ លោកឧកញ្ញ៉ា ស៊ិន ចន្ធី បញ្ហាចោទទាំងអស់នេះ បានធ្វើឱ្យអ្នកផលិតក្នុងស្រុកជាច្រើន ត្រូវបង្វែរទិសដៅនាំចេញទំនិញរបស់ខ្លួនពីទីផ្សារធំៗមកត្រឹមទីផ្សារក្នុងតំបន់វិញដែលមានតម្លៃដឹកជញ្ចូនថោក។ ហើយបន្ថែមពីការផ្លាស់ប្តូរទិសដៅផ្គត់ផ្គង់ទំនិញនេះទៀតសោធ កម្ពុជាក៏នឹងអាចបាត់បង់ការស្រូបទាញលំហូរនៃអ្នកវិនិយោគិនបរទេសដែលមានបំណងមកបណ្តាក់ទុនវិនិយោគក្នុងប្រទេសកម្ពុជាមួយផ្នែកផងដែរ។
តែយ៉ាងណា ប្រធានសមាគមភស្តុភារកម្ពុជារូបបានលើកឡើងថា ដើម្បីឱ្យបញ្ហាឡើងថ្លៃនៃការដឹកជញ្ចូនទំនិញរបស់កម្ពុជាមានភាពប្រដំប្រសងជាមួយប្រទេសជិតខាងបាន កម្ពុជាត្រូវតែអភិវឌ្ឍន៍ហេដ្ឋារចនាសម្ព័ន្ធដូចជា កំពង់ផែទឹកជ្រៅ ពង្រឹងសមត្ថភាពតម្លៃដឹកជញ្ចូនក្នុងស្រុកឱ្យបានល្អប្រសើរឡើងវិញ ជាពិសេសដើម្បីឱ្យកម្ពុជាអាចប្រកួតប្រជែងជាមួយបណ្តាប្រទេសក្នុងតំបន់បាន ប្រធានសមាគមរូបនេះបានពន្យល់ថា កម្ពុជាគួរអនុវត្តនូវប្រព័ន្ធអេកូឡូស៊ីលើវិស័យដឹកជញ្ជូន និងរៀបចំមជ្ឈមណ្ឌលទទួល និងបែងចែកទំនិញនៅតាមតំបន់សក្តានុពលមួយចំនួនជាដើម។
ទោះបីជាយ៉ាងនេះក្តី បើតាមលោកឧកញ្ញ៉ា លឹម ហេង អនុប្រធានសភាពាណិជ្ជកម្មកម្ពុជាបានបញ្ជាក់ប្រាប់វិទ្យុបារាំអន្តរជាតិដែរថា បរិមាណនៃការនាំចេញទំនិញរបស់កម្ពុជាទៅកាន់ទីផ្សារអន្តរជាតិក្នុងរយៈប៉ុន្មានឆ្នាំចុងក្រោយនេះ ជាពិសេសស្ថិតក្នុងវិបត្តិជំងឺកូវីដ១៩ គឺមានសញ្ញាល្អប្រសើរដដែល។ ក្នុងនោះ បើតាមលោកឧកញ៉ាលឹម ហេង ទំនិញដែលកម្ពុជានៅមានតែកំណើននៃការនាំចេញនោះគឺ ទំនិញផ្នែក វាយនភណ្ឌកាត់ដេរ និងផលិផលកសិកម្មជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ