កំណើនសេដ្ឋកិច្ចកម្ពុជាឆ្នាំ២០២១ លើសពី ២,៤% នៃការរំពឹងទុក
កំណើនសេដ្ឋកិច្ចកម្ពុជានៅឆ្នាំ២០២១នេះ មានលក្ខណៈល្អប្រសើរជាងការរំពឹងទុក ខណៈរដ្ឋាភិបាលបានព្យាករកន្លងទៅក្នុងកំរិត ២,៤% ហើយកំណើនសេដ្ឋកិច្ចកម្ពុជានឹងវិលទៅរក៧% ដូចដើមវិញនៅឆ្នាំ២០២៤។ ការបញ្ជាក់ដូច្នេះ បានធ្វើឡើងដោយមន្ត្រីជាន់ខ្ពស់ក្រសួងសេដ្ឋកិច្ច នៅក្នុងសន្និសីទកាសែតមួយនាព្រឹកថ្ងៃអង្គារនេះស្តីពី«យុទ្ធសាស្ត្រស្តារ និងជំរុញកំណើនសេដ្ឋកិច្ចកម្ពុជា ក្នុងការរស់នៅជាមួយជំងឺកូវីដ-១៩ តាមគន្លងប្រក្រតីភាពថ្មី» ដែលរៀបចំឡើងដោយអង្គភាពអ្នកនាំពាក្យរដ្ឋាភិបាល។
ចុះផ្សាយនៅថ្ងៃ៖
ស្តាប់ - ០២:២៦
លោក ផាន់ ផល្លា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានថ្លែងនៅក្នុងសន្និសីទកាសែតថា ការព្យាករណ៍របស់រដ្ឋាភិបាលកាលពីពេលកន្លងទៅនេះ ដែលថាកំណើនសេដ្ឋកិច្ចកម្ពុជាក្នុងឆ្នាំ២០២១នេះ នឹងកើនពីអវិជ្ជមានទៅ ២,៤% លែងត្រូវហើយ។ លែងត្រូវគឺដោយសារភាពជាក់ស្តែងមកដល់ពេលនេះ លោកអាចនិយាយបានថាកំណើនសេដ្ឋកិច្ចកម្ពុជាឆ្នាំ២០២១ លើសពី ២,៤%។
តាមលោក ផាន់ ផល្លា សេដ្ឋកិច្ចកម្ពុជា ដែលមានកំណើនល្អប្រសើរចាប់ពីពេលនេះទៅ គឺដោយសំអាងទៅលើកត្តាមួយចំនួន ដូចជាកត្តាទីផ្សារក្រៅប្រទេស ការនាំចេញទៅកាន់ទីផ្សារអាមេរិក និងអឺរ៉ុប ដែលជាទីផ្សារធំរបស់កម្ពុជា មិនមានភាពថមថយ។ ក្រៅពីនេះ ក៏មានកត្តាសំខាន់ៗផ្សេងៗទៀតដែរ ដូចជាកត្តាកំណែទម្រង់ហិរញ្ញវត្ថុសាធារណៈ រួមផ្សំជាមួយវិធានការនានា ដែលរដ្ឋាភិបាលដាក់ចេញកន្លងមក។
តួលេខរយៈពេល១១ខែឆ្នាំ២០២១នេះ បង្ហាញថាវិស័យកាត់ដេរ ស្បែកជើង និងផលិតផលធ្វើដំណើរមានកំណើន ១៣,៦% ធៀបនឹងរយៈពេលដូចគ្នាកាលពីឆ្នាំទៅ ដែលមានត្រឹម១០%ប៉ុណ្ណោះ។ រីឯការនាំចេញទំនិញមិនមែនកាត់ដេររយៈពេល១១ខែដែរ គឺមានការកើនឡើងប្រមាណ៥៣%។
ជាមួយគ្នានេះ ការនាំចេញវិស័យកសិកម្ម ក៏មានការកើនឡើងច្រើនដែរ ដែលវិស័យកាត់ដេរ និងវិស័យកសិកម្ម បានដើរតួនាទីសំខាន់ក្នុងការជម្រុញកំណើនសេដ្ឋកិច្ចកម្ពុជាឡើងវិញ ខណៈវិស័យអចលនទ្រព្យត្រូវបានវាយតម្លៃថាមិនមានឧបសគ្គធ្ងន់ធ្ងរ ដោយសារនៅតែមានសកម្មភាពទិញ លក់ ជាធម្មតា។
ជារួម លោក ផាន់ ផល្លា បានវាយតម្លៃថាក្រោយបើកប្រទេសឡើងវិញអស់ពេលជាង១ខែមកនេះ គឺសកម្មភាពសេដ្ឋកិច្ចមានការកើនឡើង និងល្អប្រសើរជាងមុន ខណៈកម្ពុជាបានស្រោចវ៉ាក់សាំងការពារកូវីដ-១៩ ពាសពេញផ្ទៃប្រទេស។ លោកថាសេដ្ឋកិច្ចកម្ពុជាឆ្នាំ ២០២៤ នឹងត្រលប់មករកស្ថានភាពដើមវិញ គឺក្នុងរង្វង់៧%។
សូមរំលឹកថា កាលពីសប្តាហ៍មុន ធនាគារពិភពលោក(World Bank) បានព្យាករសេដ្ឋកិច្ចកម្ពុជាឆ្នាំ២០២១ ថាមានកំណើន ២,២% ហើយរំពឹងថានឹងកើនដល់ ៤,៥% នៅឆ្នាំ២០២២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ