កម្ពុជាបានបន្តរកឃើញករណីវីរុសបំប្លែងខ្លួនថ្មី«អូមីក្រុង»២ករណីបន្ថែមទៀត
ក្រសួងសុខាភិបាលកម្ពុជានៅថ្ងៃទី១៨ ធ្នូបានបន្តប្រកាសពីការរកឃើញករណីនាំចូលមេរោគបំប្លែងខ្លួនថ្មី«អូមីក្រុង»ចំនួន២ករណីបន្ថែម ទៅលើស្ត្រីជនជាតិចំនួន២នាក់ដែលបានវិលត្រឡប់មកពីប្រទេសបារាំង និងសហរដ្ឋអាមេរិក។ ការប្រកាសរកឃើញ២ករណីនេះ បានធ្វើឱ្យចំនួនករណីមេរោគបំប្លែងខ្លួនថ្មី«អូមីក្រុង»សរុបនៅកម្ពុជាកើនឡើងដល់៤ករណីគិតត្រឹមរយៈពេលមួយសប្តាហ៍។
ចុះផ្សាយនៅថ្ងៃ៖
ស្តាប់ - ០២:៥៣
មេរោគបំប្លែងខ្លួនថ្មី«អូមីក្រុង»ចំនួន២ករណីបន្ថែមទៀត ត្រូវបានក្រសួងសុខាភិបាលខ្មែរបញ្ជាក់ឱ្យដឹងតាមរយៈសេចក្តីប្រកាសព័ត៌មានមួយនៅយប់ថ្ងៃទី១៨ ធ្នូ ឆ្នាំ២០២១។ បើតាមសេចក្តីប្រកាសព័ត៌មានខាងដើមនេះ ករណីនាំចូលចំនួន២នាពេលនេះ ត្រូវបានក្រសួងសុខាភិបាល ប្រកាសរកឃើញទៅលើអ្នកដំណើរជាស្រ្តីជនជាតិខ្មែរចំនួន២នាក់ បន្ទាប់ពីបានបញ្ចូលវត្ថុសំណាករបស់ពួកគេទៅកាន់វិទ្យាស្ថានប៉ាស្ទ័រកម្ពុជា ដើម្បីវិភាគបញ្ជាក់រកវីរុសកូវីដ១៩ បំប្លែងថ្មីអូមីក្រុងនេះ ដោយម៉ាស៊ីនPCR។
ក្នុងនោះ សេចក្តីប្រកាសព័ត៌មានដដែលបានបន្តថា ករណីវិជ្ជមានមេរោគបំប្លែងខ្លួនថ្មី«អូមីក្រុង»ទាំង២ករណីនេះ គឺបានរកឃើញទៅលើស្ត្រីជនជាតិខ្មែរអាយុ៤៧ឆ្នាំ ស្នាក់នៅក្នុងបូរីប៉េងហួតបឹងស្នោរ ដែលជាអ្នកដំណើរមកពីសហរដ្ឋអាមេរិក ឆ្លងកាត់ប្រទេសកូរ៉េខាងត្បូង និងបានបន្តដំណើរមកដល់ប្រទេសកម្ពុជានៅថ្ងៃទី១៦ធ្នូ។ ចំណែកមួយករណីទៀត កើតទៅលើស្ត្រីជនជាតិខ្មែរ អាយុ៣៣ឆ្នាំ ស្នាក់នៅក្នុងសង្កាត់ទួលសង្កែ ខណ្ឌឬស្សីកែវ រាជធានីភ្នំពេញ។ ស្ត្រីរូបនេះ គឺមានប្រវត្តិធ្វើដំណើរមកពីប្រទេសបារាំង ឆ្លងកាត់ប្រទេសសាំងហ្គាពួរ រួចបន្តជើងហោះហើរមកដល់ប្រទេសកម្ពុជានៅថ្ងៃទី១៧ ធ្នូឆ្នាំ២០២១។
បើតាម ក្រសួងសុខាភិបាល ករណីទាំង២នេះ គឺជាករណីទី៣និងទី៤ បន្ទាប់ពីករណីដំបូងត្រូវបានប្រកាសរកឃើញនៅថ្ងៃទី១៤ ធ្នូ ទៅលើស្ត្រីជនជាតិខ្មែរអាយុ២៣ឆ្នាំ មានផ្ទៃពោះចំនួន១៥សប្តាហ៍ មានទីលំនៅក្នុងខេត្តស្វាយរៀង។ បន្ទាប់ពីស្ត្រីរូបនេះបានធ្វើដំណើរមកពីប្រទេសហ្គាណា តំបន់អាហ្វ្រិកខាងលិច និងដោយឆ្លងកាត់តាមទីក្រុងឌូបៃ រួចបន្តដំណើរមកទីក្រុងបាងកក និងបានមកកម្ពុជានៅថ្ងៃទី១២ ធ្នូ។
ដោយឡែកករណីទី២ ក្រសួងសុខាភិបាលខ្មែរ បានរកឃើញទៅលើបុរសជនជាតិអៀរ៉ង់ អាយុ ២៥ឆ្នាំ ស្នាក់នៅសណ្ឋាគារមួយកន្លែងក្នុងខណ្ឌដូនពេញ ដែលធ្វើដំណើរមកដល់ប្រទេសកម្ពុជានៅថ្ងៃទី១៧ ធ្នូ ក្រោយចាកចេញពីប្រទេសខេនញ៉ា តំបន់អាហ្វ្រិក ឆ្លងកាន់តាមទីក្រុងឌូបៃ រួចបន្តជើងហោះហើរមកទីក្រុងបាងកក និងមកដល់កម្ពុជានៅថ្ងៃទី១៦ ធ្នូ។ ជាការបញ្ជាក់បន្ថែមពីក្រសួងសុខាភិបាល អ្នកជម្ងឺទាំង៤នាក់ កំពុងសម្រាកព្យាបាលនៅមជ្ឈមណ្ឌលជាតិកំចាត់រោគរបេង និងហង់សិន ក្នុងទីក្រុងភ្នំពេញ។
ជុំវិញការប្រកាសរកឃើញករណីមេរោគបំប្លែងខ្លួនថ្មី«អូមីក្រុង»នេះ លោកនាយករដ្ឋមន្ត្រីហ៊ុន សែននាពេលកន្លងមកក៏បានចេញមកបញ្ជាក់ឱ្យប្រជាពលរដ្ឋខ្មែរកុំមានការភ័យស្លន់ស្លោខ្លាំងពេកចំពោះមេរោគប្រភេទថ្មីនេះ ខណៈមេរោគបំប្លែងខ្លួនថ្មីប្រភេទ«អូមីក្រុង» នៅមិនទាន់បង្កឱ្យមានករណីអ្នកជំងឺសម្លាប់ច្រើននៅឡើយនោះទេ ក្រៅតែពីអ្នកជំងឺម្នាក់ស្លាប់ក្នុងប្រទេសអង់គ្លេសប៉ុណ្ណោះ។
សម្រាប់ លោកហ៊ុន សែន មេរោគប្រភេទថ្មី«អូមីក្រុង» នៅមិនទាន់កាចសាហាវដូចមេរោគប្រភេទ«ដែលតា»ដែលបានសម្លាប់មនុស្សរាប់លាននាក់នៅលើពិភពលោកនោះទេ ខណៈដែលកម្ពុជាបានរកឃើញករណីមេរោគប្រភេទ«ដែលតា»ចំនួន១៩៩១០ករណី និងប្រភេទអាល់ហ្វាចំនួន៦៨៥១ករណី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ