លោកអេង ហ៊ី៖ ជាជំហានបឋម កម្លាំងអាវុធហត្ថកំពុងស្តាប់ចម្លើយក្រុមជនសង្ស័យ ដើម្បីស្រាវជ្រាវអ្នកពាក់ព័ន្ធបន្ថែម
យុទ្ធនាការស្រាវជ្រាវ និងបង្រ្កាបក្រុមជនសង្ស័យដែលបានប្លន់អ្នកលក់ឡេ អ៊ាន សៀវម៉ី កាលពីថ្ងៃអាទិត្យកន្លងទៅ បានឈានដល់ការឃាត់ខ្លួនក្រុមជនសង្ស័យចំនួន១២នាក់ នៅយប់ថ្ងៃចន្ទទី២០ម្សិលមិញនេះ នៅឯបុរី ប៉េង ហួត ផ្លូវ៦០ម៉ែត្រ។ នេះបើតាមការបញ្ជាក់របស់កងរាជអាវុធហត្ថរាជធានីភ្នំពេញ។ លោកអេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស បានបញ្ជាក់ប្រាប់វិទ្យុបារាំងអន្តរជាតិបន្ថែមថា ក្រុមជនសង្ស័យកំពុងស្ថិតក្នុងការស្តាប់ចម្លើយ ដើម្បីស្រាវជ្រាវកំណត់មុខសញ្ញាបន្ថែម។ ទោះជាយ៉ាងណា លោកអេង ហ៊ី មិនអាចបញ្ជាក់ពីអត្តសញ្ញាណនៃក្រុមជនសង្ស័យដែលធ្វើសកម្មភាពប្លន់នោះទេ នៅខណៈដែលជនសង្ស័យម្នាក់ត្រូវបានបង្ហាញមុខជាសាធារណៈ និងត្រូវសាធារណជនស្គាល់ថា គឺលោក សុខសុវណ្ណ វឌ្ឍនាសាប៊ុង ហៅ William Guang ជាប្រធានគណបក្សខ្មែរក្រោក។
ចុះផ្សាយនៅថ្ងៃ៖
សូមស្តាប់ការលើកឡើងរបស់លោកអេង ហ៊ី៖
ដោយឡែក កាលពីយប់ថ្ងៃទី២០ម្សិលមិញនេះ ស្នងការដ្ឋាននគរបាលរាជធានីភ្នំពេញ ក៏បានបង្រ្កាបបានជនសង្ស័យជាបុរសម្នាក់ និងស្ត្រីម្នាក់ ដែលសង្ស័យពាក់ព័ន្ធនឹងករណីប្លន់នេះដែរ។ តាមការបញ្ជាក់ពីលោកសាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញ ជនសង្ស័យទាំងពីររូប ត្រូវបានសមត្ថកិច្ចខណ្ឌពោធិ៍សែនជ័យ នាំខ្លួនយកមកសាកសួរបន្ថែម។
គួរជម្រាបជូនថា កាលពីថ្ងទី១៩ មានករណីក្រុមជនសង្ស័យប្រដាប់អាវុធ បានចូលប្លន់ផ្ទះអ្នកលក់ឡេ អ៊ាន សៀវម៉ី ក្នុងបុរីញូថោន។ ជាតុល្យការ កងកម្លាំងអាវុធហត្ថនិងស្នងការរាជធានីភ្នំពេញ ឃាត់ខ្លួនក្រុមជនសង្ស័យសរុបចំនួន១៤នាក់ ដោយដកហូតគ្រឿងពេជ្រត្រលប់មកវិញ និងអាវុធវែងខ្លីចំនួន៥ដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ