កម្ពុជាប្រកាសប្រើប្រាស់ក្របខណ្ឌយុទ្ធសាស្ត្រនិងកម្មវិធីស្តារសេដ្ឋកិច្ចក្នុងការរស់នៅជាមួយកូវីដ១៩
ក្រសួងសេដ្ឋកិច្ចនិងហិរញ្ញវត្ថុ នៅព្រឹកថ្ងៃទី២២ ខែធ្នូនេះ បានប្រកាសប្រើប្រាស់ជាផ្លូវការនូវក្របខណ្ឌយុទ្ធសាស្ត្រនិងកម្មវិធីស្តារសេដ្ឋកិច្ចចេញពីវិបត្តិកូវីដ១៩ ដោយផ្តោតលើការកែលំអជន្ទល់កំណើនសេដ្ឋកិច្ចកម្ពុជា ក្នុងវិស័យ ៤ធំៗ។ ក្នុងនោះដែរ ក្រសួងសេដ្ឋកិច្ចក៏បានប្រកាសបន្តអនុគ្រោះពន្ធដល់វិស័យទេសចរណ៍និងអាកាសចរណ៍ ក៏ដូចជាការបន្តអនុវត្តកម្មវិធីឧបត្ថម្ភសាច់ប្រាក់ដល់គ្រួសារក្រីក្រនិងងាយរងគ្រោះរហូតដល់ឆ្នាំ ២០២២។
ចុះផ្សាយនៅថ្ងៃ៖
ស្តាប់ - ០២:៤៤
ថ្លែងក្នុងពិធីប្រកាសដាក់អោយអនុវត្តជាផ្លូវការនូវ "ក្របខណ្ឌយុទ្ធសាស្រ្ត និងកម្មវិធីស្ដារ និងជំរុញកំណើនសេដ្ឋកិច្ចក្នុងការរស់នៅជាមួយកូវីដ១៩ តាមគន្លងប្រក្រតីភាពថ្មី សម្រាប់ឆ្នាំ ២០២១-២០២៣" នាថ្ងៃទី២២ ខែធ្នូ រដ្ឋមន្ត្រីក្រសួងសេដ្ឋកិច្ច លោក អូន ព័ន្ធមុនីរ័ត្ន បានអោយដឹងថា រដ្ឋាភិបាលបានត្រៀមខ្លួនរួចរាល់នៅក្នុងការទាញសេដ្ឋកិច្ចកម្ពុជាអោយមានកំណើនល្អមកវិញ បន្ទាប់ពីរងគ្រោះពីវិបត្តិកូវីដ១៩កន្លងមក។ ក្នុងន័យនេះ ជាក្របខណ្ឌយុទ្ធសាស្ត្រ រដ្ឋាភិបាលនឹងផ្តោតលើការស្តារ និងជំរុញកំណើនលើវិស័យចំនួន៤ រួមមាន វិស័យកសិកម្ម និងកសិ-ឧស្សាហកម្ម, វិស័យទេសចរណ៍, វិស័យកាត់ដេរ និងវិស័យកម្មន្តសាលមិនមែនកាត់ដេរ។
ទន្ទឹមនឹងការដាក់ចេញកិច្ចការចម្បងសម្រាប់វិស័យ ៤ខាងលើនេះ លោករដ្ឋមន្ត្រីក្រសួងសេដ្ឋកិច្ច អះអាងថា រដ្ឋាភិបាលនឹងនៅតែបន្តរក្សាលំនឹងជីវភាពរស់នៅរបស់ប្រជាជន និងលំនឹងសេដ្ឋកិច្ចរបស់វិស័យឯកជនដែលបាននិងកំពុងរងគ្រោះពីវិបត្តិកូវីដ១៩ តាមរយៈការបន្តអនុវត្តវិធានការអន្តរាគមន៍ទាំងឡាយដែលត្រូវបានដាក់ចេញ ១០ជុំរួចមកហើយនោះ។
បើតាមលោក អូន ព័ន្ធមុនីរ័ត្ន រដ្ឋនឹងបន្តអនុត្តកម្មវិធីឧបត្ថម្ភសាច់ប្រាក់ដល់គ្រួសារក្រីក្រនិងងាយរងគ្រោះ ក្នុងអំឡុងពេលប្រយុទ្ធជំងឺកូវីដ សម្រាប់រយៈពេល៩ខែទៀត រហូតដល់ចុងខែកញ្ញា ឆ្នាំ២០២២។ ចំពោះវិស័យទេសចរណ៍និងអាកាសចរណ៍ដែលរងផលប៉ះពាល់ធ្ងន់ធ្ងរជាងគេវិញ រដ្ឋនឹងអនុគ្រោះផ្នែកពន្ធដល់ធុរកិច្ចបន្តទៀត សម្រាប់ឆមាសទី១ ឆ្នាំ២០២២ ដើម្បីត្រៀមទទួលភ្ញៀវទេសចរណ៍ ក្រោយកម្ពុជាត្រូវបានប្រកាសបើកពេញលេញឡើងវិញចាប់ពីថ្ងៃទី០១ ខែវិច្ឆិកា ឆ្នាំ២០២១។
នៅក្នុងក្របខណ្ឌយុទ្ធសាស្ត្រនិងកម្មវិធីស្តារសេដ្ឋកិច្ចនេះដែរ រដ្ឋាភិបាលក៏បានត្រៀមថវិកាប្រមាណ ២៥០ លានដុល្លារអាមេរិកនៅឆ្នាំ២០២២ សម្រាប់ផ្តល់ឥណទានដោយត្រង់ពីធនាគារ សហគ្រាសធុនតូច និងមធ្យម និងធនាគារអភិវឌ្ឍជនបទនិងកសិកម្ម ដោយកំណត់អាត្រាការប្រាក់បែបប្រកួតប្រជែង (៥ ដល់៥.៥ភាគរយ) សម្រាប់វិស័យសំខាន់ៗដូចជា កសិកម្ម និងអេកូទេសចរណ៍ជាដើម។
គួរជម្រាបជូនថា កាលពីសប្តាហ៍មុននេះ ក្រសួងសេដ្ឋកិច្ចបានដាក់ក្តីរំពឹងខ្ពស់ថាសេដ្ឋកិច្ចកម្ពុជានឹងវិលទៅរកស្ថានភាពដើមក្នុងរង្វង់ ៧% នៅឆ្នាំ២០២៤ ខណៈកំណើនសេដ្ឋកិច្ចកម្ពុជាឆ្នាំ២០២១នេះ នឹងងើបខ្ពស់ជាងការរំពឹងទុក ដែលកាលពីពេលកន្លងមករដ្ឋាភិបាលបានព្យាករថាសេដ្ឋកិច្ចកម្ពុជានឹងមានកំណើន២,៤%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ