ទីផ្សារកម្ចីឥណទានរបស់គ្រឹះស្ថានមីក្រូហិរញ្ញវត្ថុអេស៊ីលីដាក្នុងប្រទេសភូមានៅតែបន្តធ្លាក់ចុះ ក្រោយកង្វះតម្រូវការពីអ្នកកម្ចី
ធនាគារអេស៊ីដានៅព្រឹកថ្ងៃទី២២ ធ្នូបានអះអាងថា តម្លៃទីផ្សារកម្ចីឥណទានរបស់ខ្លួនក្នុងប្រទេសភូមានៅបន្តដាំក្បាលចុះបន្តិចបន្តូច បន្ទាប់ពីតម្រូវការកម្ចីមីក្រូហិរញ្ញវត្ថុធ្លាក់ចុះ ខណៈបរិមាណលក់ភាគហ៊ុនចេញមានចំនួនច្រើន។ ការធ្លាក់ចុះសកម្មភាពកម្ចីរបស់គ្រឹះស្ថានមីក្រូហិរញ្ញវត្ថុអេស៊ីលីដាក្នុងប្រទេសភូមា ត្រូវបានលោក អ៊ិន ចានី ប្រធាននាយកប្រតិបត្តិធនាគារអេស៊ីដាបានបញ្ជាក់ថា ដោយសារតែបញ្ហាកូវីដ១៩ និងបញ្ហានយោបាយក្នុងប្រទេសភូមាផ្ទាល់។
ចុះផ្សាយនៅថ្ងៃ៖
ស្តាប់ - ០១:៥៦
ក្នុងរយៈពេលជិត២សប្តាហ៍កន្លងមកនេះ ទីផ្សារកម្ចីឥណទានរបស់គ្រឹះស្ថានមីក្រូហិរញ្ញវត្ថុអេស៊ីលីដាក្នុងប្រទេសភូមា នៅតែបន្តធ្លាក់ចុះបន្តិចបន្តួច។ ការធ្លាក់ចុះនេះបន្ទាប់ពីបរិមាណអ្នកកម្ចីឥណទាន និងការធ្វើប្រតិបត្តិការកម្ចីរបស់អេស៊ីលីដាក្នុងប្រទេសភូមាត្រូវបង្អាក់បន្តិច។
ក្នុងនោះ លោកអ៊ិន ចាន់នី ប្រធាននាយកប្រតិបត្តិធនាគារអេស៊ីលីដាបានប្រាប់ឱ្យវិទ្យុបារាំងអន្តរជាតិដឹងថា បញ្ហាស្នូលសំខាន់ដែលពាក់ព័ន្ធទៅនឹងការធ្លាក់ចុះនៃសកម្មភាពកម្ចីឥណទានហិរញ្ញវត្ថុពីគ្រឹះស្ថានមីក្រូហិរញ្ញវត្ថុអេស៊ីលីដាក្នុងប្រទេសភូមានាពេលនេះ គឺដោយសារតែបញ្ហាកូវីដ១៩ ដែលប្រទេសភូមាកំពុងរងគ្រោះខ្លាំង មិនមានលទ្ធភាពស្វែងរកកម្ចីឥណទាន និងបញ្ហាចម្បងមួយទៀតនោះ គឺវិបត្តិនយោបាយក្នុងប្រទេសភូមាផ្ទាល់ដែលវាបានបង្អាក់សកម្មភាពរបស់ប្រជាជនភូមាមិនអាចធ្វើសកម្មភាពកម្ចីប្រាក់ឥណទានដូចនាពេលកន្លងទៅ។
បើតាម លោកអ៊ិន ចាន់នី បរិមាណធ្លាក់ចុះនៃសកម្មភាពកម្ចីឥណទាននេះ គឺមិនមានការជាប់ពាក់ព័ន្ធជាមួយការធ្វើពហិការមិនប្រើប្រាស់ផលិតផលខ្មែរពីប្រជាពលរដ្ឋភូមានោះទេ។ ហើយបញ្ហាធ្លាក់ចុះនៃបរិមាណកម្ចីឥណទាននេះ ក៏មិនបានបង្កជាក្តីព្រួយបារម្ភណាមួយធ្ងន់ធរដល់ប្រតិបត្តិការរបស់គ្រឹះស្ថានមីក្រូហិរញ្ញវត្ថុអេស៊ីលីដាក្នុងប្រទេសភូមាឡើយ ស្របពេលដែលដំណើរការរបស់អេស៊ីលីដានៅភូមាមានស្ថានភាពល្អប្រសើរ។ បន្ថែមពីនេះ ប្រធាននាយកប្រតិបត្តិរូបនេះបញ្ជាក់ សកម្មភាពកម្ចីនេះនឹងវិលមករកភាពល្អប្រសើរឡើងវិញនាពេលខាងមុខ។
ជាការបញ្ជាក់បន្ថែម លោកអ៊ិន ចាន់នីបានលើកឡើងថា ទីផ្សារហ៊ុនរបស់ធនាគារអេស៊ីលីដាក្នុងផ្សារមូលបត្រកម្ពុជាក្នុងរយៈពេលជិត២សប្តាហ៍នេះ ហាក់មានបរិយាកាប្រែប្រួល និងសន្ទស្សន៍ទីផ្សារផ្លាស់ប្តូរបន្តិចបន្តួច។
សូមបញ្ជាក់ផងដែរថា មីក្រូហិរញ្ញវត្ថុអេស៊ីលីដាក្នុងប្រទេសភូមាមានទីតាំងចំនួន១៦សាខានៅរដ្ឋធានីយ៉ាងហ្កូន និងស្ថិតក្នុងទីក្រុង Bago ទីក្រុង Magway និងរដ្ឋ Mon ដែលបានផ្ដល់ឳកាសការងារឱ្យបុគ្គលិកសរុបទាំងអស់ ៥៥៣ នាក់។ ក្នុងនោះក៏មានបុគ្គលិកជនជាតិខ្មែរចំនួន ៧ នាក់ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ