បុគ្គលិកក្រុមហ៊ុនណាហ្គាវើលដ៍ប្រកាន់ជំហរបន្តធ្វើកូដកម្ម ដោយមិនដាក់ពេលកំណត់
បុគ្គលិកនៃក្រុមហ៊ុនណាហ្គាវើលដ៍ដែលកំពុងធ្វើកូដកម្មរយៈពេល ៧ថ្ងៃជាប់ៗគ្នា នៅថ្ងៃទី២៤ធ្នូនេះ បានប្រកាសប្រកាន់ជំហរ បន្តធ្វើកូដកម្មដោយមិនដាក់ពេលកំណត់ ដើម្បីស្វែងរកដំណោះស្រាយសមស្រប។ នៅចំពោះមុខក្រុមហ៊ុនយក្សនេះ កញ្ញា ឈឹម ស៊ីថរ ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុន ណាហ្គាវើលដ៍ បានថែមទាំងស្រែកតាមក្បាលម៉េក្រូថា ការគម្រាមកំហែងសកម្មជន និងសមាជិកសហជីពអំឡុងពេលធ្វើកូដកម្មប៉ុន្មានថ្ងៃនេះ គឺជាការរំលោភសិទ្ធិកម្មករធ្ងន់ធ្ងរ។
ចុះផ្សាយនៅថ្ងៃ៖
ស្តាប់ - ០២:១៥
នៅខាងមុខក្រុមហ៊ុនណាហ្គាវើលដ៍ គឺមានកូដករភាគច្រើនជាស្ត្រី កំពុងបន្តធ្វើបាតុកម្មទាមទារអោយក្រុមហ៊ុនល្បែងនេះយល់ព្រមទទួលយកបុគ្គលិកជិត ៣០០នាក់ មកធ្វើការវិញ។ បើតាមកញ្ញា ឈឹម ស៊ីថរ ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុន ណាហ្គាវើលដ៍ លើកឡើងក្នុងសន្និសីទសារព័ត៌មាន នៅថ្ងៃទី២៤ធ្នូ ជំហររបស់តំណាងកម្មករនយោជិតក្នុងការស្វែងរកដំណោះស្រាយ និងជំហរកូដករក្នុងការបន្តធ្វើកូដកម្ម នឹងមិនផ្លាស់ប្តូរនោះទេ ដរាបណា មានការដោះស្រាយអាចទទួលយកបាន។
កញ្ញា ឈឹម ស៊ីថរ បានធ្វើការច្រានចោលទាំងស្រុងអំពីការលើកឡើងរបស់មន្ត្រីរដ្ឋាភិបាលមួយរូបថា កូដកម្មនេះជាការរៀបចំចលនាបដិវត្តពណ៍។ អ្នកតំណាងរូបនេះ ក៏បានសម្តែងក្តីបារម្ភអំពីការគំរាមកំហែងដល់សកម្មជននិងសមាជិកសហជីពអំឡុងពេលធ្វើកូដកម្មនេះដែរ។
គួរអោយដឹងដែរថា រយៈពេល ៣ថ្ងៃ ក្នុងដំណើរការចរចារដោះស្រាយវិវាទការងារ ចាប់ពីថ្ងៃទី២១ធ្នូមក គឺនៅបន្តជាប់គាំងនៅឡើយ បើទោះជា មានការចរចារនៅសាលារាជធានីភ្នំពេញចំនួន ១លើក ក៏ដូចជាកិច្ចប្រជុំរៀបចំសម្របសម្រួលដោយគណៈកម្មាធិការដោះស្រាយកូដកម្ម និងបាតុកម្មគ្រប់មុខសញ្ញាចំនួន ២លើកមកហើយដែរ។ បើតាមក្រសួងការងារ គិតត្រឹមថ្ងៃទី២៣ធ្នូ ក្នុងចំណោមបុគ្គលិកទាំង ៣៦៥នាក់ គឺមាន ៨៥នាក់ យល់ព្រមទទួលការទូទាត់ប្រាក់បំណាច់បញ្ចប់កិច្ចសន្យាការងារ ក៏ប៉ុន្តែថៅកែត្រូវតែទទួលយកបុគ្គលិកដែលនៅសេសសល់ប្រមាណជិត ៣០០នាក់ មកចូលបម្រើការងារវិញសិន ទើបពួកគេយល់ព្រម។
ទាក់ទិននឹងការដោះស្រាយវិវាទការងាររាំរៃនេះ អ្នកគ្រប់គ្រងកម្មវិធីសិទ្ធិការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់អង្គការសង់ត្រាល់ (CENTRAL) លោក ឃុន ថារ៉ូ យល់ឃើញថា ជាតាក់តិកក្នុងការពន្យារពេល ដើម្បីអោយកម្លាំងកូដកម្មថមថយទៅៗ និងជាការបង្ហាញពីចេទនាមិនស្មោះត្រង់របស់ថៅកែក្នុងការដោះស្រាយ។ លោក ឃុន ថារ៉ូ បន្តថា ក្រុមហ៊ុនគួរពិចារណាចរចារអោយស្របទៅតាមការស្នើរបស់បុគ្គលិក ដយោងទៅលើលទ្ធភាពជាក់ស្តែង ខណៈដំណើរការសេវាកម្មខ្លួនអាចដំណើរការវិញបានហើយនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ