ក្រសួងទេសចរណ៍រំពឹងថា កំណើនភ្ញៀវទេសចរនឹងកើនខ្ពស់នាថ្ងៃឆ្លងឆ្នាំ ខណៈបន្ទប់ស្នាក់នៅជាង៨០%ត្រូវបានកក់រួចរាល់
ក្រសួងទេសចរណ៍នៅព្រឹកថ្ងៃទី២៧ ធ្នូបានបញ្ជាក់ថា កំណើនភ្ញៀវទេសចរនឹងបន្តកើនឡើងខ្ពស់នាថ្ងៃឆ្លងឆ្នាំខាងមុខ ខណៈអត្រានៃការកក់បន្ទប់ស្នាក់នៅក្នុងសណ្ឋាគារ ផ្ទះសំណាក់នៅតាមបណ្តាខេត្តជាគោលដៅទេសចរណ៍ធំៗមួយចំនួនបានបន្តកើនឡើងជាលំដាប់។ ចំនួនកើនឡើងនោះ គឺបន្ទប់ស្នាក់នៅជាង៨០%ហើយត្រូវបានភ្ញៀវកក់រួចរាល់។ ក្នុងនោះ លោក ជុក ជំនោរ អ្នកនាំពាក្យក្រសួងទេសចរណ៍បានអះអាងថា ចរន្តលំហូរនៃកំណើនភ្ញៀវទេសចរនាថ្ងៃឆ្លងឆ្នាំនឹងអាចកើនហួសពីបណ្តាថ្ងៃកន្លងទៅ។
ចុះផ្សាយនៅថ្ងៃ៖
ស្តាប់ - ០២:២៧
អ្នកនាំពាក្យក្រសួងទេសចរណ៍លោកជុក ជំនោរ បានបញ្ជាក់ប្រាប់វិទ្យុបារាំងអន្តរជាតិRFIថា គោលដៅទេសចរណ៍ធំៗដែលកំពុងតែស្រូបទាញនូវកំណើនភ្ញៀវទេសចរច្រើនជាងគេ សម្រាប់ថ្ងៃឆ្លងឆ្នាំសកលនាពេលខាងមុខនេះគឺ បណ្តាខេត្តជាប់មាត់សមុទ្រ ខេត្តនៅភាគឦសាន្ត និងបណ្តាខេត្តនៅភាគពាយព្យ។
បើតាម លោក ជុក ជំនោរ ខេត្តនៅជាប់មាត់សមុទ្ររួមមាន៖ខេត្តព្រះសីហនុ ខេត្តកែប និងខេត្តកំពត។ ដោយឡែក បណ្តាខេត្តដែលនៅប៉ែកឦសាន្តប្រទេសវិញមានដូចជា៖ ខេត្តមណ្ឌលគិរី និងរតនគិរី។ និងចុងក្រោយ បណ្តាខេត្តដែលស្ថិតនៅភាគពាយព្យរួមមានជាអាទិ៍៖ ខេត្តសៀមរាប ខេត្តបាត់ដំបង និងខេត្តពោធិ៍សាត់។
ជាការបញ្ជាក់បន្ថែមពីអ្នកនាំពាក្យក្រសួងទេសចរណ៍ខាងដើម សម្រាប់ចំនួននៃការកក់បន្ទប់ស្នាក់នៅវិញ គិតមកត្រឹមថ្ងៃទី២៦ ធ្នូ ខេត្តជាគោលដៅសំខាន់ៗមួយចំនួនដូចជា ខេត្តកែប កំពត និងមណ្ឌលគិរី បរិមាណនៃកក់បន្ទប់ស្នាក់នៅ គឺមានកម្រិតខ្ពស់ពោលកើនឡើងដល់ជាង ៨០%។ ចំណែកឯ គោលដៅខេត្តព្រះសីហនុ ខេត្តសៀមរាប ខេត្តបាត់ដំបង និងខេត្តរតនគិរី អត្រានៃការកក់បន្ទប់ស្នាក់នៅ ក៏ស្ថិតក្នុងចំនួនមួយខ្ពស់ផងដែរ។
បើតាមលោក ជុក ជំនោរ ក្រសួងទេសចរណ៍នឹងរៀបចំកន្លែងបោះតង់បន្ថែមទៀត សម្រាប់ទទួលភ្ញៀវទេសចរ ប្រសិនបើចំនួនបន្ទប់ស្នាក់នៅមិនអាចផ្គត់ផ្គង់បានគ្រប់តម្រូវការ។ និងថា ក្រសួងនឹងពិនិត្យតាមដានទៅលើផ្នែកសេវាកម្ម បដិសណ្ឋារកិច្ច ជាពិសេសតម្លៃម្ហូបអាហារនៅតាមតំបន់កម្សាន្តនានា។
ជុំវិញកំណើននៃការកក់បន្ទប់ស្នាក់នៅនេះ លោកស្រី ខៃ ចិន្តា អនុប្រធានសមាគមសណ្ឋាគារកម្ពុជាបានប្រាប់វិទ្យុបារាំងអន្តរជាតិថា ទិដ្ឋាភាពបែបនេះបានបង្ហាញនូវក្តីសង្ឃឹមកាន់តែខ្ពស់ចំពោះម្ចាស់អាជីវកម្មសណ្ឋាគារ និងផ្ទះសំណាក់ ក្រោយពួកគេបានផ្អាកប្រតិបត្តិការមួយរយៈពេលធំ។ លោកស្រី ចិន្តាបន្តថា សណ្ឋាគារបានរៀបចំខ្លួនរួចរាល់ហើយ សម្រាប់ទទួលភ្ញៀវស្នាក់នៅ ទាំងគុណភាព និងតម្លៃសមរម្យ។
សូមជម្រាបថា បើយោងតាមរបាយការណ៍របស់ក្រសួងទេសចរណ៍ ចំនួនភ្ញៀវទេសចរដែលបានដើរលេងកម្សាន្តក្នុងសប្តាហ៍ទី៤ បើធៀបទៅនឹងសប្តាហ៍ទី៣ក្នុងខេត្តធ្នូ គឺបរិមាណភ្ញៀវទេសចរបន្តកើនឡើងចំនួន ២៤.៧%។ ក្នុងនោះ គោលដៅទេសចរណ៍សំខាន់ៗ រួមមាន៖ រាជធានីភ្នំពេញមានភ្ញៀវទេសចរដើរលេងកម្សាន្តប្រមាណជាង ៥ម៉ឺន៥ពាន់នាក់, ខេត្តព្រះសីហនុប្រមាណ ៤ម៉ឺន៥ពាន់នាក់, ខេត្តសៀមរាបជាង២ម៉ឺន៥ពាន់នាក់, ខេត្តពោធិ៍សាត់ជាង ២ម៉ឺន៣ពាន់នាក់, ខេត្តកំពតជាង ២ម៉ឺន១ពាន់នាក់, ខេត្តបាត់ដំបងជាង ១ម៉ឺន៣ពាន់នាក់ និងខេត្តមណ្ឌលគិរីជាង ១ម៉ឺន១ពាន់នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ