សាលាក្រុងភ្នំពេញ ព្រមានឱ្យបុគ្គលិកក្រុមហ៊ុនណាហ្គាវើលដ៍បញ្ឈប់សកម្មតវ៉ាខុសច្បាប់តទៀត
រដ្ឋបាលរាជធានីភ្នំពេញនៅថ្ងៃទី៣០ ធ្នូមិ្សលមិញ បានព្រមានឱ្យកម្មករនិយោជិតនៃក្រុមហ៊ុនណាហ្គាវើលដ៍ទាំងអស់ត្រូវបញ្ឈប់សកម្មភាពតវ៉ាខុសច្បាប់គ្រប់រូបភាពទាំងអស់ចាប់ពីថ្ងៃទី៣១ ធ្នូនេះតទៅ។ ការចេញមកព្រមានបែបនេះ បន្ទាប់ពីសាលាក្រុងបានអះអាងថា បានបង្កផលប៉ះពាល់ដល់សណ្តាប់ធ្នាប់ និងអសន្តិសុខសង្គម ជាពិសេសដើម្បីផ្តល់ជាលក្ខណៈងាយស្រួលដល់ការធ្វើដំណើររបស់ភ្ញៀវទេសចរ និងប្រជាពលរដ្ឋ នាអំឡុងពិធីបុណ្យចូលឆ្នាំសាកលខាងមុខនេះ។ ប៉ុន្តែសម្រាប់សង្គមស៊ីវិលថា នេះគឺជារំលោភសិទ្ធមនុស្សពីសំណាកអាជ្ញាធរ។
ចុះផ្សាយនៅថ្ងៃ៖
ស្តាប់ - ០២:៣៣
ក្រោមហេតុផលប៉ះពាល់ដល់សន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈ សាលាក្រុងភ្នំពេញកាលពីថ្ងៃទី៣០ ធ្នូ ចេញមកព្រមានឱ្យបុគ្គលិក នយោជិកទាំងអស់របស់ក្រុមហ៊ុនណាហ្គាវើលដ៍ ដែលកំពុងតែបន្តសកម្មភាពធ្វើកូដកម្ម ទាមទារដំណោះស្រាយពីសំណាក់ម្ចាស់ភាគីជាក្រុមហ៊ុន ត្រូវតែបញ្ឈប់សកម្មភាពសម្តែងមតិដោយខុសច្បាប់នៅលើសួនច្បារសាធារណៈ និងនៅតាមដងផ្លូវសាធារណៈចាប់ពីថ្ងៃទី៣១ និងថ្ងៃទី១ មករាតទៅ។ បើតាម សាលាក្រុងភ្នំពេញ ការស្នើឱ្យបញ្ឈប់សកម្មភាពបែបនេះ ក៏ដើម្បីបង្កជាភាពងាយស្រួលចំពោះប្រជាពលរដ្ឋទូទៅ ភ្ញៀវទេសចរ ធ្វើដំណើរកម្សាន្តនាឱកាសពិធីបុណ្យឆ្លងឆ្នាំសាកលក្នុងភូមិសាស្ត្ររាជធានីភ្នំពេញ។
បន្ថែមពីនេះ សាលាក្រុងបានក៏ចោទប្រកាន់ទៅលើបុគ្គលិកនយោជិកទាំងអស់នោះថា បានបិទផ្លូវច្រកចេញ-ចូលរបស់ក្រុមហ៊ុនឯកជនថែមទៀតផង ដែលសកម្មភាពនេះបានធ្វើឱ្យប៉ះពាល់ធ្ងន់ធ្ងរដល់សន្តិសុខ និងសិទ្ធស្របច្បាប់របស់ក្រុមហ៊ុន ជាពិសេសពុំបានចូលរួមទបស្កាត់ការរីករាលនៃជំងឺកូវីដ១៩ ស្របពេលដែលក្រសួងការងារ និងរដ្ឋបាលរាជធានីភ្នំពេញចូលខ្លួនសម្របសម្រួលដោះស្រាយជាបន្តបន្ទាប់យ៉ាងណាក្តី។
ជាការឆ្លើយតបទៅនឹងការលើកឡើងរបស់សាលាក្រុងភ្នំពេញនាពេលនេះ កញ្ញាឈុន សុខា អនុប្រធានសហជីពកម្មករក្រុមហ៊ុនណាហ្គាវើលដ៍បាននិយាយប្រាប់វិទ្យុបារាំងអន្តរជាតិថា ការតវ៉ានេះមិនមែនជាសកម្មភាពខុសច្បាប់នោះទេ ហើយក៏បង្កជាបញ្ហាអសន្តិសុខសង្គមនោះដែរ។ ប៉ុន្តែផ្ទុយទៅវិញ សកម្មភាពតវ៉ានេះគឺជាការធ្វើកូដកម្មដោយអហិង្សា ដើម្បីទាមទាររកដំណោះស្រាយសមស្របដែលអាចទទួលយកបានពីសំណាកនិយោជិកទាំងអស់ដែលត្រូវបានក្រុមហ៊ុនបញ្ឈប់ពីការងារដោយឥតលក្ខខណ្ឌរយៈពេលជាង៨ខែ។ កញ្ញា ឈុន សុខាបានបន្តទៀតថា ការចោទប្រកាន់ពីអាជ្ញាធរមកលើនិយោជិកទាំងអស់នេះ គឺជាទង្វើដែលមិនអាចទទួលយកបានឡើយ។
ដោយឡែក លោក អំ សំអាត នាយករងទទួលបន្ទុកកម្មវិធីឃ្លាំមើលនៃអង្គការលីកាដូបានប្រាប់វិទ្យុបារាំងអន្តរដែរថា ការចេញមកព្រមានបែបនេះរបស់អាជ្ញាធរ ដូចជានៅមិនទាន់ឆ្លើយតបជាមួយនឹងដំណោះស្រាយរបស់បុគ្គលិកណាហ្គាវើលដ៍នោះទេ ខណៈការធ្វើកូដកម្មនេះ គឺដើម្បីស្វែងរកដំណោះស្រាយ ពីភាគីក្រុមហ៊ុន។ បើតាមលោក អំ សំអាត អាជ្ញាធរគួរមានការសម្របសម្រួលណាមួយឱ្យល្អប្រសើរជាងនេះ ជាជាងធ្វើឱ្យរួចពីដៃ និងជៀសវាងពីការចោទប្រកាន់ទៅលើកម្មករក្នុងរូបភាពផ្សេងៗគ្នាដូចជា ការធ្វើបដិវត្តន៍ពណ៌ និងថា សកម្មភាពតវ៉ានោះគឺខុសច្បាប់ជាដើម។ បន្ថែមពីនេះ មន្ត្រីសិទ្ធមនុស្សរូបនេះបានបន្តថា អាជ្ញធរក៏ត្រូវតែបញ្ឈប់សកម្មភាពរើសអើងទៅលើសហជីពក្រុមហ៊ុនហ្គាវើលដ៍ និងប្រកាន់ខ្ជាប់នូវការគោរពសិទ្ធមនុស្ស និងសិទ្ធការងារជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ