ចំនួនករណី និងជនល្មើសគ្រឿងញៀនថយចុះឆ្នាំ២០២១ តែបរិមាណគ្រឿងញៀនកើនឡើងខ្លាំង
ពេញមួយឆ្នាំ ២០២១ សមត្ថកិច្ចបង្ក្រាបបានគ្រឿងញៀនសរុបជាង៦ពាន់ករណី ឃាត់ខ្លួនមនុស្សបានជាង១៣ ៧០០នាក់ និងរឹបអូសបានគ្រឿងញៀនជាង ៤,៥តោន។ នេះបើតាមរបាយការណ៍របស់អគ្គស្នងការនគរបាលជាតិក្រសួងមហាផ្ទៃ។ តាមរយៈលទ្ធផលនេះ បង្ហាញថាចំនួនករណី និងជនល្មើសពាក់ព័ន្ធនឹងគ្រឿងញៀនមានការថយចុះ តែបរិមាណគ្រឿងញៀនដែលរឹបអូសបាន មានការកើនឡើងធៀបទៅនឹងឆ្នាំមុន។
ចុះផ្សាយនៅថ្ងៃ៖
ស្តាប់ - ០២:១៣
ធៀបទៅនឹងឆ្នាំ២០២០ លទ្ធផលនៃការបង្ក្រាបគ្រឿងញៀននៅឆ្នាំ២០២១ មានការប្រែប្រួលច្រើន ដោយចំនួនករណីគ្រឿងញៀនដែលសមត្ថកិច្ចបង្ក្រាបបានមានតែជាង៦ពាន់ករណីប៉ុណ្ណោះ ធៀបទៅនឹងឆ្នាំមុន មានជាង១ម៉ឺនករណី។ ជាមួយគ្នានេះ ចំនួនជនល្មើសដែលសមត្ថកិច្ចចាប់ឃាត់ខ្លួនបានក៏ថយចុះដែរ គឺជាង១៣ ០០០នាក់ ធៀបទៅនឹងឆ្នាំចាស់ជាង ២ម៉ឺននាក់។
ក៏ប៉ុន្តែបរិមាណគ្រឿងញៀនគ្រប់ប្រភេទ ដែលសមត្ថកិច្ចរឹបអូសបាន គឺមានការកើនឡើងខ្ពស់ដល់ទៅទ្វេដង គឺមានជាង ៤,៥តោន ធៀបនឹងឆ្នាំ២០២០ ដែលមានប្រមាណជា៣តោនប៉ុណ្ណោះ។ ការកើនឡើងបរិមាណគ្រឿងញៀនខុសច្បាប់ដ៏ច្រើនសន្ធឹកសន្ធាប់នេះ ត្រូវនាយឧត្តមសេនីយ៍ ម៉ក់ ជីតូ អគ្គស្នងការរង នគរបាលជាតិទទួលផែនគ្រឿងញៀនបញ្ជាក់ថា ភាគច្រើននៃករណីជួញដូរនីមួយៗរបស់ឧក្រិដ្ឋជន គឺជាករណីធំៗ ដែលមិនធ្លាប់មានពីមុនមក។
ជាការកត់សម្គាល់ករណីគ្រឿងញៀនដ៏ធំបំផុត ដែលបានកើតឡើងនៅពាក់កណ្តាលខែធ្នូ ឆ្នាំ២០២១កន្លងទៅ គឺជនល្មើសបានលួចផលិតគ្រឿងញៀននៅក្នុងស្រុកឱរ៉ាល់ខេត្តកំពង់ស្ពឺចំនួន ១,៥តោន ជ្រកក្រោមរូបភាពរោងចក្រកែច្នៃដំណាប់ស្វាយ។ ប្រតិបត្តិការនេះ ធ្វើឲ្យជនល្មើសជនជាតិចិនតៃវ៉ាន់ម្នាក់ក្នុងចំណោម៣នាក់ស្លាប់ ដោយសារផ្ទុះអាវុធតទល់គ្នាជាមួយសមត្ថកិច្ច។
តាមលោក ម៉ក់ ជីតូ ការបង្ក្រាបបានគ្រឿងញៀនច្រើនជាងឆ្នាំមុនៗ ដោយសារក្នុងអំឡុងជំងឺកូវីដ-១៩នេះ ការផលិតគ្រឿងញៀននៅសល់ក្នុងឃ្លាំងច្រើន ចរាចរណ៍លក់ចេញមិនបានដូច្នេះពេលដែលពួកគេមានឱកាសលក់ចេញម្ដងៗ គឺនាំចេញច្រើនគីឡូក្រាម។ ហេតុនេះសមត្ថកិច្ចក៏បង្ក្រាបបានច្រើនទៅតាមហ្នឹងដែរ ដែលករណីទាំងអស់នេះ ពួកឧក្រិដ្ឋជនបាននាំចេញទៅបរទេសឆ្លងកាត់តាមកម្ពុជា ហើយកម្ពុជាក៏បានសហការជាមួយប៉ូលិសអន្តរជាតិបង្រ្កាបបានជាច្រើនដែរ។
តាមរបាយការណ៍សមត្ថកិច្ច ក្នុងចំណោមជនពាក់ព័ន្ធគ្រឿងញៀនជាង ១៣ ០០០នាក់នៅឆ្នាំ២០២១នេះ មានជនបរទេសចំនួន៣៦២នាក់ រួមមាន១៣សញ្ជាតិ ដែលពាក់ព័ន្ធនឹងសកម្មភាពជួញដូរ រក្សាទុក កែឆ្នៃ និងចាត់ចែងគ្រឿងញៀន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ