ឆ្នាំ២០២១៖ កម្ពុជានាំចេញកសិផលជិត៥ពាន់លានដុល្លារ
ក្នុងរយៈពេល១២ខែ ឆ្នាំ២០២១ កន្លងទៅនេះ ប្រទេសកម្ពុជាបាននាំចេញផលិតផលកសិកម្មរបស់ខ្លួន ដែលមានតម្លៃជាទឹកប្រាក់ប្រមាណ៥ពាន់លានដុល្លារ។ របាយការណ៍បឋមរបស់ក្រសួងកសិកម្ម ដែលផ្សព្វផ្សាយនៅលើទំព័រហ្វេសប៊ុក លោក វេង សាខុន រដ្ឋមន្ត្រីក្រសួងកសិកម្មនាថ្ងៃសៅរ៍នេះ បង្ហាញថាការនាំចេញស្រូវ អង្ករ និងកសិផលក្រៅពីស្រូវ អង្ករ មានទំហំទឹកប្រាក់ធំជាងគេ ក្នុងចំណោមកសិផលសំខាន់ៗដទៃទៀតនៃវិស័យកសិកម្ម។
ចុះផ្សាយនៅថ្ងៃ៖
ស្តាប់ - ០២:២១
កសិផលដែលកម្ពុជានាំចេញទៅក្រៅប្រទេស ហើយដែលមានទំហំទឹកប្រាក់រហូតដល់ជិត ៥ពាន់លានដុល្លារនោះ រួមមាន ស្រូវ និងអង្ករ ដែលមានទំហំទឹកប្រាក់ ជាង១ពាន់លានដុល្លារ។ ដោយឡែកការនាំចេញកសិផលក្រៅពីស្រូវ អង្ករ មានចំនួនជាង៣ពាន់លានដុល្លារ។ ក្រៅពីនេះ ក៏មានការនាំចេញកសិផលមួយចំនួនទៀតដែរដូចជា ការនាំចេញកៅស៊ូធម្មជាតិចំនួនជាង ៦០០លានដុល្លារ ឈើកៅស៊ូជាង១,៥លានដុល្លារ ការនាំចេញឈើអារ និងសត្វស្វាមានជាង ៣៥លានដុល្លារ និងការនាំចេញត្រីគ្រប់ប្រភេទជាង ៤លានដុល្លារ។
ប្រព័ន្ធទិន្នន័យគ្រឹះភូតគាមអនាម័យជាតិ (National Phytosanitary Database) របស់អគ្គនាយកដ្ឋានកសិកម្មនៃក្រសួងកសិកម្ម បានឱ្យដឹងថា ក្នុងឆ្នាំ២០២១នេះ កម្ពុជាបាននាំចេញកសិផលទៅក្រៅប្រទេសមានបរិមាណសរុប ៧,៩លានតោន ទៅកាន់ទិសដៅ៦៨ប្រទេស គឺមានការកើនឡើងជាង ៣លានតោនស្មើនឹង ៦៣,៨៣% ធៀបទៅនឹងរយៈពេលដូចគ្នាក្នុងឆ្នាំ២០២០ ដែលទទួលបានត្រឹមតែជាង ៤,៨លានតោនប៉ុណ្ណោះ។
ជាការកត់សម្គាល់កសិផល ដែលមិនមែនជាស្រូវ អង្ករ មានការកើនឡើងច្រើនធៀបទៅនឹងឆ្នាំទៅ ពោលគឺក្នុងឆ្នាំ២០២១ ការនាំចេញកសិផលក្រៅពីស្រូវ-អង្ករ មានចំនួន ៥លានតោន កើនឡើងជាង ១,៦លានតោន ស្មើនឹង ៤៨,១៤% ធៀបទៅនឹងរយៈពេលដូចគ្នាក្នុងឆ្នាំ២០២០ មានចំនួនជាង ៣លានតោន។
កសិផលក្រៅពីស្រូវ អង្ករ មានចំណិតដំឡូងមីក្រៀម ដំឡូងមីស្រស់ ម្សៅដំឡូងមី កាកសំណល់ដំឡូងមីគ្រាប់ស្វាយចន្ទី គ្រាប់ពោត គ្រាប់សណ្ដែកបាយ គ្រាប់សណ្តែកសៀង ផ្លែចេកស្រស់ ផ្លែក្រូចថ្លុង ផ្លែស្វាយស្រស់ ដូងប្រេង ម្រេច បន្លែចម្រុះ និងផលិតផលចំនួនជាង៩០មុខ ផ្សេងទៀត។
សូមរំលឹកថា យោងតាមរបាយការណ៍ស្តីពីកំណើនសេដ្ឋកិច្ចកម្ពុជា ដែលចេញផ្សាយដោយស្ថាប័នហិរញ្ញវត្ថុអន្តរជាតិធំៗ ក៏ដូចជាការព្យាកររបស់រដ្ឋាភិបាលដែរ ការនាំចេញវិស័យកសិកម្មអំឡុងពេលនៃវិបត្តិកូវីដ-១៩នេះ គឺបានជួយដល់កំណើនសេដ្ឋកិច្ចកម្ពុជាមួយផ្នែកតូចដែរ ដោយវិស័យនេះ និងវិស័យកាត់ដេរ មិនមានការថមថយទេ ក្នុងការនាំចេញទៅកាន់ទីផ្សារខាងក្រៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ