សមាជិកសហជីព៩នាក់ត្រូវបានចាប់ខ្លួន ខណៈការតវ៉ានៅមុខណាហ្គាវើលអូសបន្លាយពេលកន្លះខែ
យ៉ាងហោចណាស់ថ្នាក់ដឹកនាំ និងសមាជិកសហជីពចំនួន៩នាក់ ដែលជាអ្នកតំណាងនៃក្រុមកូដករនៅមុខក្រុមហ៊ុនណាហ្គាវើល ត្រូវបានចាប់ខ្លួននៅយប់ថ្ងៃយប់មិញនេះ គឺតែប៉ុន្មានម៉ោងប៉ុណ្ណោះ មុនពេលឆ្លងឆ្នាំសកល។ ពីខាងអាជ្ញាធរក្រុងភ្នំពេញបានអះអាងថា ការចាប់ខ្លួនតំណាងកូដករទាំងនេះ គឺដោយសារតែពួកគេធ្វើបាតុកម្មខុសច្បាប់។
ចុះផ្សាយនៅថ្ងៃ៖
ស្តាប់ - ០១:៥៤
សមាជិកសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលចំនួន៩នាក់ដែលត្រូវបានចាប់ខ្លួននោះ គឺមានកញ្ញា ឈឹម សុខន ជាអគ្គលេខាធិការសហជីព និងស្ត្រី៨នាក់ទៀត ជាសកម្មជនសហជីព។
ការចាប់ខ្លួនតំណាងកូដករនៃក្រុមហ៊ុនណាហ្គាវើលនេះ គឺធ្វើឡើងនៅម៉ោងប្រមាណ៨យប់ថ្ងៃទី៣១ធ្នូ ពោលតែប៉ុន្មានម៉ោងប៉ុណ្ណោះ មុនពេលឆ្លងឆ្នាំសកល ដែលមនុស្សរាប់ម៉ឺននាក់ចេញដើរកំសាន្ត។
បើតាម កញ្ញា ឈឹម ស៊ីថរ ជាប្រធានសហជីព គឺសមត្ថកិច្ចបានដាក់កម្លាំង៣រថយន្តចុះទៅព័ទ្ធចាប់តំណាងកូដករទាំងនោះ ដល់ទីស្នាក់ការសហជីពដែលស្ថិតនៅលើផ្លូវសុធារស ក្នុងសង្កាត់ទន្លេបាសាក់ ខណ្ឌចំការមន ដែលនៅមិនឆ្ងាយប៉ុន្មានពីកន្លែងតវ៉ា។
ឆ្លើយតបនឹងការចាប់ខ្លួននេះ លោក ឃួង ស្រេង អភិបាលរាជធានីភ្នំពេញ ប្រាប់វិទ្យុបារាំងអន្តរជាតិRFI នៅព្រឹកថ្ងៃសៅរ៍ថា ការឈានទៅដល់ការចាប់ខ្លួនតំណាងកូដករទាំងនោះ គឺដោយសារតែពួកគេធ្វើបាតុកម្មខុសច្បាប់។ ខុសច្បាប់ដែលអភិបាលរាជធានីរូបនេះពន្យល់ថា មកពីក្រុមអ្នតវ៉ាទៅប្រមូលផ្តុំគ្នានៅលើសួនច្បារ និងធ្វើការបិទផ្លូវដែលធ្វើឲ្យប៉ះពាល់ដល់សណ្តាប់ធ្នាប់សាធារណៈ។
បើតាមលោក ឃួង ស្រេង អ្នកដែលត្រូវបានចាប់ខ្លួនទាំងនោះ គឺត្រូវបញ្ជូនទៅកាន់ស្នងការនគរបាលរាជធានីភ្នំពេញ ហើយពួកគេកំពុងស្ថិតក្នុងដៃតំណាងអយ្យការក្នុងការសាកសួរបន្ត។
សូមបញ្ជាក់ថា វិវាទការងាររបស់បុគ្គលិកក្រុមហ៊ុនណាហ្គាវើល បានអូសបន្លាយជិតមួយឆ្នាំមកហើយ ដោយសារតែក្រុមហ៊ុនបញ្ឈប់បុគ្គលិកជាង១៣០០នាក់។ នៅក្នុងចំណោមបុគ្គលដែលមានឈ្មោះត្រូវបញ្ឈប់ពីការងារ ក៏មានដែរថ្នាក់ដឹកនាំសហជីព និងសកម្មជនសហជីពដែលតែងតែចេញមុខតវ៉ាប្រឆាំងនឹងការរំលោភសិទ្ធិការងារនៅក្នុងក្រុមហ៊ុន។ ប៉ុន្តែក្នុងចំណោមបុគ្គលទាំងជាង១៣០០នាក់ គឺមានជាង៩០០នាក់ បានបង្ខំចិត្តទទួលយកសំណង តាមអ្វីដែលក្រុមហ៊ុនផ្តល់ឲ្យ ខណៈបុគ្គលិកដែលមិនព្រមទទួលសំណងសម្រេចធ្វើកូដកម្មចាប់តាំងពីថ្ងៃទី១៨ខែធ្នូកន្លងមកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ