សមាជិកសហជីព៩នាក់ដែលត្រូវចាប់ខ្លួន ត្រូវការមេធាវីការពារក្តី
សមាជិកសហជីពចំនួន៩នាក់ដែលត្រូវបានចាប់ខ្លួន កាលពីយប់ថ្ងៃទី៣១ធ្នូ នៅមិនទាន់ទទួលបានមេធាវីការពារក្តីនៅឡើយ ខណៈដែលអ្នកទាំង៩នាក់កំពុងឃុំខ្លួននៅស្នងការនគរបាលរាជធានីភ្នំពេញ។ នេះបើតាមមន្ត្រីសិទ្ធិមនុស្ស។ ជុំវិញការចាប់ខ្លួនអ្នកតវ៉ានៅក្រុមហ៊ុនណាហ្គាវើលនេះ បានធ្វើឲ្យមានប្រតិកម្មនានាពីសំណាក់អង្គការសង្គមស៊ីវិលថា ជាការរំលោភសិទ្ធិសេរីភាពសំដែងមតិ ហើយពួកគេទាមទារឲ្យដោះលែងជាបន្ទាន់ និងឥតលក្ខខណ្ឌ។
ចុះផ្សាយនៅថ្ងៃ៖
ស្តាប់ - ០១:៥១
លោក អំ សំអាត នាយករងអង្គការសិទ្ធិមនុស្សលីកាដូ ប្រាប់វិទ្យុបារាំងអន្តរជាតិRFI នៅម៉ោងជិត១២ថ្ងៃត្រង់នេះថា សមាជិកសហជីពដែលត្រូវបានចាប់ខ្លួន គឺមិនទាន់ទទួលបានមេធាវីការពារក្តីទៅតាមផ្លូវច្បាប់នៅឡើយ។ ប៉ុន្តែលោកថា ខាងក្រុមគ្រួសាររបស់សកម្មជនទាំងនោះ បានទៅពឹងពាក់អង្គការលីកាដូ អង្គការ សង់ត្រាល់ និងសមាគមអាដហុក ដើម្បីផ្តល់មេធាវីការពារក្តីដោយឥតគិតថ្លៃ។
បើតាមអ្នកការពារសិទ្ធិមនុស្សរូបនេះ ចាប់តាំងពីពេលចាប់ខ្លួនមក គឺសកម្មជនទាំង៩នាក់ត្រូវបានឃុំខ្លួននៅស្នងការនគរបាលរាជធានីភ្នំពេញ បន្ទាប់ពីសមត្ថកិច្ចបានឡោមព័ទ្ធទីស្នាក់ការសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលនៅម៉ោងប្រមាណ៨យប់ថ្ងៃទី៣១ធ្នូ ពោលតែប៉ុន្មានម៉ោងប៉ុណ្ណោះ មុនពេលឆ្លងឆ្នាំសកល។
ជុំវិញការចាប់ខ្លួនសកម្មជនសហជីពដែលតវ៉ារយៈពេលកន្លះខែនៅមុខក្រុមហ៊ុនណាហ្គាវើលដែលជាកន្លែងលេងល្បេងស៊ីសងដ៍ធំជាងគេនៅភ្នំពេញនេះ បានញាំឲ្យមានប្រតិកម្មធ្លាក់មក ជាបន្តបន្ទាប់ ពីសំណាក់អង្គការនៅក្នុងស្រុក។
សហភាពសហជីពកម្ពុជា របស់លោក រ៉ុង ឈុន សម្ព័ន្ធសហជីពកម្ពុជា របស់លោកស្រី យ៉ាង សោភ័ណ្ឌ និងសហព័ន្ធសហជីពកម្មករចំណីអាហារ និងសេវាកម្មកម្ពុជា បានថ្កោលទោសការចាប់ខ្លួននេះ។ ពួកគេបានហៅការចាប់ខ្លួននេះថា ជាការបំភិតបំភ័យទៅលើសេរីភាពនៃការសំដែងមតិដោយសន្តិវិធី និងជាការដាក់សម្ពាធឲ្យបុគ្គលិកទទួលយកអ្វីដែលក្រុមហ៊ុនផ្តល់ឲ្យជាថ្នូរនឹងការបញ្ឈប់ពីការងារ។ ប៉ុន្តែពីខាងអាជ្ញាធរក្រុងភ្នំពេញបានអះអាងថា ការចាប់ខ្លួនតំណាងកូដករទាំងនេះ គឺដោយសារតែពួកគេធ្វើបាតុកម្មខុសច្បាប់ ហើយថាការធ្វើបាតុកម្មមិនមែនជាដំណោះស្រាយឡើយ។
យ៉ាងណាក៏ដោយក្រុមសហជីព បានទទួចឲ្យមានការដោះលែងជាបន្ទាន់ និងឥតលក្ខខណ្ឌ ចំពោះថ្នាក់ដឹកនាំសហជីព និងសកម្មជនសហជីពនៅក្រុមហ៊ុនណាហ្គាវើលនេះ ដោយចាត់ទុកថា ការតវ៉ារបស់បុគ្គលិកទាំងនោះគឺជាសិទ្ធិសំដែងមតិស្របតាមរដ្ឋធម្មនុញ្ញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ