លោកថោង ខុន៖ ទេសចរផ្ទៃក្នុងជាងមួយលាននាក់ដើរលេងកម្សាន្តថ្ងៃឆ្លងឆ្នាំ លើសពីឆ្នាំចាស់ជាង៦០%
ភ្ញៀវទេសចរផ្ទៃក្នុងប្រមាណ១លាន១សែននាក់ បានធ្វើដំណើរទៅកម្សាន្តតាមតំបន់ទេសចរណ៍នានានៅទូទាំងប្រទេស ក្នុងអំឡុងពេលឆ្លងឆ្នាំសកល២០២១ ចូល២០២២។ នេះបើតាមរបាយការណ៍របស់លោកថោង ខុន រដ្ឋមន្ត្រីក្រសួងទេសចរណ៍ នៅថ្ងៃសៅរ៍ ទី០១ មករា ២០២២។ បើតាមរដ្ឋមន្ត្រីក្រសួងទេសចរណ៍ ឆ្នាំនេះកំណើនភ្ញៀវទេសចរដើរកម្សាន្ត មានលើសពីឆ្នាំចាស់ ប្រមាណជាង៦០%។
ចុះផ្សាយនៅថ្ងៃ៖
ស្តាប់ - ០២:១៩
ក្នុងចំណោមទេសចរប្រមាណ ១ ១៣៩ ៣៨៧នាក់នោះ កម្ពុជាមានភ្ញៀវទេសចរជាតិប្រមាណជាង១លាននាក់ និងភ្ញៀវអន្តរជាតិផ្ទៃក្នុងប្រមាណជាង៥ពាន់នាក់។ មានរាជធានី-ខេត្តចំនួនពីរធំៗដែលទទួលបានភ្ញៀវទេសចរដើរកម្សាន្តច្រើនជាងគេ។ ក្នុងនោះរាជធានីភ្នំពេញ មានចំនួន ៣៦៥ ៦៥៣នាក់ និងខេត្តសៀមរាបមាន ១៨៩ ៤៣៦នាក់។ ដោយឡែកសម្រាប់ទេសចរណ៍បែបឆ្នេរសមុទ្រប៉ែកនិរតីវិញ ក៏មានភ្ញៀវទេសចរគួរឲ្យកត់សម្គាល់ផងដែរ។ ខេត្តព្រះសីហនុមានចំនួន ៥៥ ៧១៧នាក់ ខេត្តកំពតមាន ៩៦ ១៣៨នាក់ ខេត្តកែប ៦៦ ១៣៥នាក់ និងខេត្តកោះកុង ២៣ ៣៩៤នាក់។ នេះបើតាមរបាយការណ៍របស់លោកថោង ខុន។
បើតាមលោកថោង ខុន ចំនួនភ្ញៀវទេសចរផ្ទៃក្នុងទាំងជាតិនិងអន្តរជាតិ បានដើរកម្សាន្តក្នុងឱកាសឆ្លងឆ្នាំសកល ឆ្នាំ២០២២នេះ មានការកើនឡើង ខុសពីឱកាសឆ្លងឆ្នាំសកលកាលពីឆ្នាំ២០២១។ នៅឆ្នាំនេះ បើតាមតួលេខ មានការកើនឡើងដល់ទៅ៦៣.៦៥% បើធៀបទៅនឹងឆ្នាំចាស់។ កំណើននៃភ្ញៀវទេសចរនេះ ត្រូវបានរដ្ឋមន្ត្រីក្រសួងទេសចរណ៍ដដែល លើកឡើងពីអំណះអំណាង នៃការបិទបញ្ចប់ព្រឹត្តិការណ៍សហគមន៍២០កុម្ភៈ និងការរៀបចំពិធីអបអរនៅតាមខេត្ត-ក្រុងទូទាំងប្រទេស។
នៅទន្ទឹមនឹងការដើរកម្សាន្ត លោកថោង ខុន បានគូសបញ្ជាក់ថា គ្រប់ទីតាំងទេសចរណ៍ទាំងអស់ បានអនុវត្តនូវវិធានសុវត្ថិភាពទេសចរណ៍ និងនីតិប្រតិបត្តិស្តង់ដារអប្បបរមា (SOP)។ ហើយចំពោះបញ្ហាគ្រប់គ្រងសន្តិសុខ និងសណ្តាប់ធ្នាប់ ក៏មិនមានអ្វីរំខានជាបញ្ហាដែរ។ នេះបើតាមលោកថោង ខុន។
កំណើននៃភ្ញៀវទេសចរផ្ទៃក្នុង ក្នុងពេលឆ្លងឆ្នាំសកលឆ្នាំ២០២២នេះ លោកហូ វណ្ឌី ទីប្រឹក្សាសមាគមទេចរណ៍កម្ពុជា បានសម្តែងភាពត្រេកអរ ដ្បិតម្ចាស់អាជីវកម្មទេសចរណ៍អាចរកកម្រៃមកវិញ។ បើតាមលោកហូ វណ្ឌី ការដើរកម្សាន្តរបស់ប្រជាពលរដ្ឋពេលនេះ បង្ហាញនូវសញ្ញាណមួយល្អសម្រាប់វិស័យទេសចរណ៍នៅឆ្នាំ២០២២ ហើយប្រសិនបើគ្មានភាពរំខានពីជំងឺកូវីដ-១៩ នោះវិស័យទេសចរណ៍នៅឆ្នាំនេះនឹងមានភាពល្អប្រសើរឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ