២០២១៖ កម្ពុជា សម្រេចបានការនាំចេញកសិផលក្រៅពីស្រូវ-អង្ករចំនួនជាង៣ពាន់លានដុល្លារ កើន៤៨,១៤%
ក្នុងឆ្នាំ២០២១នេះ កម្ពុជាបានសម្រេចលទ្ធផលនៃការនាំចេញទំនិញកសិផលក្រៅពីស្រូវ-អង្ករ ទៅកាន់ទីផ្សារក្រៅប្រទេសមានចំនួនជាង៥លានតោន ដោយគិតជាទំហំទឹកប្រាក់មានតម្លៃប្រមាណ៣ពាន់លានដុល្លារ។ បើតាមរបាយការណ៍ពីក្រសួងកសិកម្ម បរិមាណនាំចេញក្នុងឆ្នាំនេះ បន្តកើនឡើងជាង១លានតោន រឺស្មើ៤៨,១៤% បើធៀបនឹងឆ្នាំ២០២០ មានទំហំនាំចេញត្រឹមតែជាង៣លានតោនប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:៣៨
យោងតាមរបាយការណ៍ពីប្រព័ន្ធទិន្នន័យគ្រឹះភូតគាមអនាម័យជាតិរបស់អគ្គនាយកដ្ឋានកសិកម្មនៃក្រសួងកសិកម្មបានបង្ហាញថា ក្នុងរយៈពេល១២ខែ កម្ពុជាបាននាំចេញកសិផលក្រៅពីស្រូវ-អង្ករទៅកាន់ទីផ្សារអន្តរជាតិជាង៤០ប្រទេសនៅលើពិភពលោក ដោយមុខទំនិញដែលកម្ពុជាបាននាំចេញមានចំនួន១១៣ប្រភេទ។
ក្នុងចំណោម កសិផលក្រៅពីស្រូវ-អង្ករចំនួន១១៣ប្រភេទខាងដើមនោះរួមមាន៖ ការនាំចេញចំណិតដំឡូងមីក្រៀមកម្ពុជាសម្រេចបានចំនួនជាង១លាន៦សែនតោន កើនឡើង ៥២,៦%, ម្សៅដំឡូងមីមានចំនួនជាង៣ម៉ឺនតោន កើន២,៦៦%, កាកសំណល់ដំឡូងមីមានចំនួនជាង៣ពាន់តោន ថយចុះ-៣៣,០៦%, គ្រាប់ស្វាយចន្ទីបាននាំចេញចំនួនជិត១លានតោន បន្តកើនឡើងរហូតដល់ ៣២៨,៣៤%, គ្រាប់ពោតមានទំហំនាំចេញចំនួនប្រមាណ២០ម៉ឺនតោន កើនឡើង៣,៥៨%, គ្រាប់សណ្តែកបាយមានចំនួនជិត៣ម៉ឺនតោន កើនឡើង១៨៩,៦១% និងគ្រាប់សណ្តែកសៀងមានចំនួន១០ម៉ឺនតោន បន្តកើនឡើង២៦៤,២៤%។
បន្ថែមពីនេះ របាយការណ៍ដដែលបន្តទៀតថា ការនាំចេញផ្លែចេកស្រស់របស់កម្ពុជាមានចំនួនប្រមាណ៤២ម៉ឺនតោន កើនឡើង២៧,០២%, ផ្លែក្រូចថ្លុងមានចំនួន៣៨ម៉ឺនតោន កើនឡើង១២២,២៣%, ផ្លែស្វាយស្រស់មានចំនួនជាង២៤ម៉ឺនតោន បន្តកើនឡើង១៤៨,៣៨% និងដំណាប់ស្វាយមានចំនួន១ម៉ឺន៧ពាន់តោន កើនឡើង១៧៩,៣០%។ ដោយឡែកដូងប្រេង កម្ពុជាបាននាំចេញមានចំនួន២ម៉ឺន ៨ពាន់តោន កើនឡើង ១៤,២២% និងកសិផលម្រេចវិញ កម្ពុជាក៏សម្រេចចំនួនជាង២៨ម៉ឺនតោន ដោយបន្តកើនឡើងរហូតដល់ ៤៥២,៧២% និងផលិតផលចំនួន១០០មុខផ្សេងទៀតកម្ពុជាសម្រេចបានចំនួនជិត៣០ម៉ឺនតោន។
បើតាមក្រសួងកសិកម្ម ទីផ្សារនាំចេញទំនិញកសិផលរបស់កម្ពុជាក្នុងចំណោម៤០ប្រទេសនោះរួមមាន៖ ប្រទេសចិន វៀតណាម ថៃ កូរ៉េខាងត្បូង ជប៉ុន ឥណ្ឌា អារ៉ាប់រួម សហរដ្ឋអាមេរិក ប៊ែលហ្ស៊ិក និងប្រទេសបង់ក្លាដែស។
សូមជម្រាបថា វិស័យកសិកម្ម ត្រូវបានប្រមុខរដ្ឋាភិបាលកម្ពុជាចាត់ទុកថា ជាវិស័យអាទិភាពដែលបានចូលរួមចំណែកយ៉ាងសំខាន់ក្នុងការរក្សាលំនឹងកំណើនសេដ្ឋកិច្ចកម្ពុជា។ ជាក់ស្តែង ក្នុងអំឡុងវិបត្តិជំងឺកូវីដ១៩ ការចេញលើវិស័យមួយនេះ ហាក់មិនមានឃើញសញ្ញាណាមួយថមថយនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ